ភ្នំពេញ: សហគមមីក្រូហិរញ្ញវត្ថុកម្ពុជា (CMA) បានច្រានចោលចំពោះសេចក្តីថ្លែងការណ៍របស់អង្គការសម្ព័ន្ធខ្មែរជំរឿន និងការពារសិទ្ធិមនុស្ស លីកាដូ ដែលអះអាងថា ប្រជាពលរដ្ឋកម្ពុជារាប់លាននាក់រងគ្រោះពីវិបត្តិសេដ្ឋកិច្ចនៃការរីករាលដាលជំងឺកូវីដ១៩ បាននិងកំពុងរងគ្រោះបន្ថែមទៀតពីវិបត្តិជំពាក់បំណុលច្រើនលើសលប់នៃកម្ចីឥណទានជាង ១០ ពាន់លានដុល្លារ ពីគ្រឹះស្ថានមីក្រូហិរញ្ញវត្ថុនៅកម្ពុជា។
ការច្រានចោលនេះធ្វើឡើងបន្ទាប់ពីអង្គការលីកាដូចេញសេចក្តីថ្លែងការណ៍រួមដែលមានអង្គការសង្គមស៊ីវិលចំនួន ១៣៥ ស្តីពី «បំណុលមីក្រូហិរញ្ញវត្ថុគួរត្រូវបានព្យួរ និងប្រគល់បណ្ណកម្មសិទ្ធិដីធ្លីឲ្យម្ចាស់ទ្រព្យវិញនាអំឡុងការរីករាលដាលជំងឺកូវីដ ១៩» កាលពីថ្ងៃទី ២៧ ខែមេសា។
ទន្ទឹមនឹងនេះអង្គការសង្គមស៊ីវិលនេះក៏បានទទូចឲ្យគ្រឹះស្ថានមីក្រូហិរញ្ញវត្ថុធ្វើការប្រគល់បណ្ណកម្មសិទ្ធិដីធ្លីដែលជាទ្រព្យបញ្ចាំឲ្យទៅអ្នកខ្ចីវិញ និងធ្វើការផ្អាកការសងប្រាក់កម្ចី និងការប្រាក់ទាំងអស់ក្នុងរយៈពេលយ៉ាងតិច ៣ ខែដើម្បីធានាថា ប្រជាពលរដ្ឋនឹងគ្មានហានិភ័យចំពោះសុខភាព បំណុល ការជួញដូរមនុស្ស និងការរំលោភសិទ្ធិមនុស្សក្នុងអំឡុងពេលនេះ។ នេះបើតាមសេចក្តីថ្លែងការណ៍។
សេចក្តីថ្លែងការណ៍បានឲ្យដឹងថា៖ «យើងខ្ញុំសូមសំណូមពរដោយទទូចឲ្យរាជរដ្ឋាភិបាល និងគ្រឹះស្ថានមីក្រូហិរញ្ញវត្ថុត្រូវផ្ដល់អាទិភាពដល់សុខភាព និងជីវភាពរស់នៅរបស់ប្រជាពលរដ្ឋកម្ពុជាដែលជាអ្នកខ្ចីប្រាក់ ដោយផ្អាកការសងប្រាក់កម្ចីមីក្រូហិរញ្ញវត្ថុ និងការប្រាក់សម្រាប់រយៈពេលយ៉ាងតិច ៣ ខែ ក៏ដូចជាប្រគល់បណ្ណកម្មសិទ្ធិដីធ្លីជូនម្ចាស់ទ្រព្យដែលមានសិទ្ធិពេញលេញវិញ»។
សេចក្តីថ្លែងការណ៍បានបន្តថា បច្ចុប្បន្នប្រជាពលរដ្ឋកម្ពុជាច្រើនជាង ២,៥ លាននាក់ ដែលបានជាប់បំណុលខ្នាតតូចនៅក្នុងអត្រាប្រាក់កម្ចីជាមធ្យម ៣ ៨០០ ដុល្លារ ដែលជាចំនួនច្រើនជាងគេលើពិភពលោក។ ការណ៍នេះធ្វើឲ្យជីវភាពរស់នៅ សុខភាព និងសុវត្ថិភាពកម្មសិទ្ធិដីធ្លីរបស់ប្រជាពលរដ្ឋកម្ពុជារាប់លាននាក់ប្រឈមនឹងហានិភ័យ។
លោក ប៊ុន មុនី អនុប្រធានក្រុមប្រឹក្សាភិបាលនៃសមាគមមីក្រូហិរញ្ញវត្ថុកម្ពុជា បានប្រាប់ភ្នំពេញប៉ុស្តិ៍កាលពីថ្ងៃអង្គារថា ទោះបីអ្នកខ្ចីប្រាក់ពីគ្រឹះស្ថានមីក្រូហិរញ្ញវត្ថុទាំងអស់នៅកម្ពុជាមានចំនួនជាង ២ លាននាក់ ប៉ុន្តែគ្រឹះស្ថានមីក្រូហិរញ្ញវត្ថុបានសម្រេចយកទ្រព្យបញ្ចាំពីអតិថិជនប្រមាណ ១ លាននាក់ប៉ុណ្ណោះ។
លោកថ្លែងថា៖ «យើងមិនមែនយកទ្រព្យបញ្ចាំមករឹបអូសរបស់គេ ដើម្បីទុកប្រើប្រាស់ជារបស់យើងទេ គឺពួកគេនៅតែប្រើប្រាស់វាដដែល គឺបើគេដាក់ប្លង់ផ្ទះ ពួកគេនៅតែរស់នៅលើផ្ទះ បើគាត់ដាក់ប្លង់ដីគាត់នៅតែរស់នៅលើដីនោះ»។
លោកបានបន្តថា៖ «ចំពោះគេ [អង្គការលីកាដូ] និយាយថាយើងត្រូវឲ្យបណ្ណកម្មសិទ្ធិដីធ្លីទៅពួកគេវិញទៅ ដើម្បីគេអាចមានមធ្យោបាយប្រកបរបររកស៊ី វាមិនត្រឹមត្រូវទេ ការពិតគេនៅតែប្រើប្រាស់ដីធ្លីផ្ទះសំបែងរបស់ពួកគេជាធម្មតា គ្រាន់តែយើងយកបណ្ណកម្មសិទ្ធិមករក្សាទុក។ ខ្ញុំគិតថា អង្គការលីកាដូ មិនមានចំណេះដឹងផ្នែកសេដ្ឋកិច្ចនោះទេ»។
លោកប្រាប់ទៀតថា សមាគមគ្រឹះស្ថានមីក្រូហិរញ្ញវត្ថុកម្ពុជាបាននិងកំពុងអនុវត្តវិធានការទន់ភ្លន់ក្នុងការដោះស្រាយបំណុលជាមួយអតិថិជនតាមការអំពាវនាវរបស់លោកនាយករដ្ឋមន្ត្រី ហ៊ុន សែន និងធនាគារជាតិនៃកម្ពុជា។
លោកឲ្យដឹងថា៖ «យើងនឹងធ្វើការព្យួរការសងបំណុលតាមការស្នើសុំរបស់អតិថិជនដែលបានស្នើសុំមកគ្រឹះស្ថានមីក្រូហិរញ្ញវត្ថុ។ យើងមិនបង្ខំឲ្យគេលក់ដីធ្លី ផ្ទះទេក្នុងកាលៈទេសៈនេះ ព្រោះយើងដឹងថា ពួកគេកំពុងមានបញ្ហាលំបាក ហើយយើងក៏មិនទារបង់ប្រាក់ពិន័យពីគាត់ដែរ បើគាត់យឺតយ៉ាវតាមដំណើរទៅ យើងអនុញ្ញាតឲ្យគាត់យឺតយ៉ាវដែរ»។
លោកបញ្ជាក់ថា៖ «ជោគជ័យពិតប្រាកដរបស់អតិថិជនគឺជាជោគជ័យរបស់គ្រឹះស្ថានមីក្រូហិរញ្ញវត្ថុ ហើយគ្រឹះស្ថានមីក្រូហិរញ្ញវត្ថុមិនអាចជោគជ័យលើការបរាជ័យរបស់អតិថិជនខ្លួននោះទេ»។
លោក សុខ វឿន នាយកប្រតិបត្តិមីក្រូហិរញ្ញវត្ថុអិលអូ អិលស៊ី បានឲ្យដឹងថា គ្រឹះស្ថានរបស់លោកកំពុងគោរពតាមការណែនាំរបស់ NBC ក្នុងការដោះស្រាយបំណុលជាមួយអតិថិជនក្នុងអំឡុងពេលនេះ។
លោកថ្លែងថា៖ «ចំពោះពួកគាត់សុំដកយកបណ្ណកម្មសិទ្ធិវិញ តើយកទៅធ្វើអ្វី? វាគ្មានហានិភ័យអ្វីត្រូវបាត់បង់នោះទេ យើងកំពុងធ្វើការដោះស្រាយដោយសន្តិវិធីជាមួយគ្នា។ ខ្ញុំឆ្ងល់ថា តើគាត់យកបណ្ណកម្មសិទ្ធិទៅណា? គាត់យកទៅខ្ចីគេទៀត យើងអត់យល់?»។
ទោះយ៉ាងណា អង្គការលីកាដូបានទទួលស្គាល់ពីវិធានការដែលដាក់ចេញដោយធនាគារជាតិនៃកម្ពុជាក្នុងការលើកទឹកចិត្តឲ្យគ្រឹះស្ថានមីក្រូហិរញ្ញវត្ថុ រៀបចំឥណទានឡើងវិញ និងការពន្យារពេលសងប្រាក់ដោយផ្អែកតាមករណីជាក់ស្ដែងនីមួយៗ។ នេះបើតាមសេចក្តីថ្លែងការណ៍។
សេចក្តីថ្លែងការណ៍បន្តថា៖ «យើងខ្ញុំសង្ឃឹមថាធនាគារជាតិនៃកម្ពុជា និងរាជរដ្ឋាភិបាលមេត្តាពិចារណាចេញបទបញ្ជាចំពោះវិស័យនេះ ដើម្បីបង្គាប់ឱ្យគ្រឹះស្ថានមីក្រូហិរញ្ញវត្ថុជួយសម្រាលបន្ទុករបស់អ្នកខ្ចីប្រាក់ឲ្យបានឆាប់»។
គិតត្រឹមចុងឆ្នាំ ២០១៩ នៅកម្ពុជា មានគ្រឹះស្ថានមីក្រូហិរញ្ញវត្ថុ ៨២ ប្រតិបត្តិករឥណទានជនបទ ២៤៨ ក្រុមហ៊ុនភតិសន្យា ១៥ និងក្រុមហ៊ុនផ្ដល់សេវាទូទាត់ ២០។ ខណៈប្រាក់កម្ចីនៅគ្រឹះស្ថានមីក្រូហិរញ្ញវត្ថុមានចំនួន ៧,២ ពាន់លានដុល្លារ និងប្រាក់បញ្ញើមាន ៣,៩ ពាន់លានដុល្លារ។ នេះបើតាមធនាគារជាតិ៕