.jpg)
លោក Cook កំពុងថ្លែងសុន្ទរកថាក្នុងវេទិកាអភិវឌ្ឍន៍ចិនកាលពីថ្ងៃសៅរ៍។ រូបថត AFP
ក្រុងប៉េកាំងៈ លោក Tim Cook នាយកប្រតិបត្តិក្រុមហ៊ុន Apple កាលពីថ្ងៃសៅរ៍ បានជំរុញឲ្យប្រទេស ចិន បន្តបើកចំហសេដ្ឋកិច្ចរបស់ខ្លួនបន្តទៀត ខណៈដែលក្រុមហ៊ុនចិនដែលជាគូរប្រជែងក្នុងស្រុកបានដណ្តើមចំណែកប្រាក់ចំណេញរបស់ក្រុមហ៊ុនផលិតទូរស័ព្ទ iPhone មួយនេះក្នុងគ្រាដែលមានសង្គ្រាមពាណិជ្ជកម្មរវាងប្រទេសមហាអំណាចសដ្ឋកិច្ចទាំង ២ របស់ពិភពលោកនេះ។
ក្នុងអំឡុងថ្លែងសុន្ទរកថានៅឯវេទិកាអភិវឌ្ឍន៍ចិនប្រចាំឆ្នាំក្នុងទីក្រុងប៉េកាំងកាលពីថ្ងៃសៅរ៍ លោក Cook បានថ្លែងថា៖ «យើងបានមើលឃើញថា ចិនបន្តផ្លាស់ប្តូរ និងកែប្រែ។ យើងលើកទឹកចិត្តឲ្យប្រទេស ចិន បន្តបើកចំហថែមទៀត»។
លោកថ្លែងថា៖ «យើងមើលឃើញថា វាមានសារៈសំខាន់មិនមែនសម្រាប់តែប្រទេស ចិន ប៉ុណ្ណោះទេ ដើម្បីសម្រេចបានសក្តានុពលពេញលេញរបស់ខ្លួន ប៉ុន្តែថែមទាំងសម្រាប់ភាពរុងរឿងរបស់សេដ្ឋកិច្ចពិភពលោកផងដែរ»។
ក្រុមហ៊ុន Apple កាលពីខែមករា បានបង្ហាញថា ខ្លួនបានទទួលរងគ្រោះនៅក្នុងតំបន់ចិនទាំងមូល (រួមទាំងតៃវ៉ាន់ ហុងកុង ម៉ាកាវ) ជាទីដែលប្រាក់ចំណូលបានធ្លាក់ចុះជិត ២៧ ភាគរយនៅត្រីមាសថ្មីចុងក្រោយបំផុតនេះ។
ការធ្លាក់ចុះនេះត្រូវបានរំពឹងថានឹងកើតមានឡើង បន្ទាប់ពីមានការព្រមានពីប្រាក់ចំណូលរបស់ក្រុមហ៊ុននេះកាលពីខែធ្នូ ជាពេលដែលក្រុមហ៊ុន Apple បានសារភាពថា ការលក់ទូរស័ព្ទ iPhone និងប្រាក់ចំណេញសរុបនឹងមានកម្រិតទាបជាងការព្យាករភាគច្រើន ដោយសារការធ្លាក់ចុះសេដ្ឋកិច្ចក្នុងប្រទេស ចិន និងជម្លោះពាណិជ្ជកម្មរវាងទីក្រុងវ៉ាស៊ីនតោន និងទីក្រុងប៉េកាំង។
ទូរស័ព្ទដែលមានតម្លៃថោកជាងទូរស័ព្ទ iPhone របស់ក្រុមហ៊ុន Huawei, Xiaomi និង Oppo ក៏បានដណ្តើមទទួលចំណែកទីផ្សារនៅចិនពី ក្រុមហ៊ុន Apple ផងដែរ។
កាលពីឆ្នាំមុនលោក Cook បានប្រើប្រាស់វេទិកានេះដើម្បីជំរុញឲ្យមេដឹកនាំរបស់ប្រទេសទាំង ២ បន្ធូរស្ថានការណ៍ជម្លោះពាណិជ្ជកម្មនេះ៕ AFP/KC
