ភ្នំពេញៈ ក្រុមហ៊ុន CP របស់ប្រទេស ថៃ បានបង្ហាញបំណងក្នុងការវិនិយោគលើការដាំកាហ្វេនៅកម្ពុជាដើម្បីនាំទៅកាន់ប្រទេស ថៃ ខណៈតម្រូវការគ្រាប់កាហ្វេកំពុងមានកំណើនខ្ពស់ក្នុងប្រទេស ថៃ។
ក្នុងជំនួបពិភាក្សាជាមួយរដ្ឋមន្ត្រីក្រសួងពាណិជ្ជកម្មលោក ប៉ាន សូរស័ក្ដិ កាលពីថ្ងៃសុក្រ ធុរជនថៃរបស់ក្រុមហ៊ុន CP បានលើកឡើងថា ទោះបីថៃជាប្រទេសផលិតកាហ្វេ តែកំណើនដ៏ច្រើននៃតម្រូវការបានធ្វើឲ្យការផ្គត់ផ្គង់ក្នុងស្រុកមិនអាចឆ្លើយតបនឹងតម្រូវការបានទេដែលទាមទារឲ្យមានការនាំចូលបន្ថែម។ លោកបន្តថា ក្រុមហ៊ុន CP កំពុងមានផែនការពិនិត្យលទ្ធភាពលើការដាំកាហ្វេនៅកម្ពុជាដើម្បីនាំចេញទៅកាន់ប្រទេស ថៃ។
លោក ប៉ាន សូរស័ក្ដិ បានស្វាគមន៍ចំពោះក្រុមហ៊ុនដែលចង់ចូលមកវិនិយោគលើគ្រាប់កាហ្វេកម្ពុជា ដោយលោកលើកឡើងថា គ្រាប់កាហ្វេនៅកម្ពុជាមានគុណភាពល្អ និងមានការដាំដុះច្រើនក្នុងខេត្តមណ្ឌលគិរី និងរតនគិរី។ លោកបន្តថា៖ «ខ្ញុំសូមលើកទឹកចិត្តឲ្យក្រុមហ៊ុន ចុះពិនិត្យផ្ទាល់ និងសហការជាមួយសហគមន៍ផលិតគ្រាប់កាហ្វេនៅទីនោះ ដើម្បីពិនិត្យលើលទ្ធភាពជាក់ស្ដែង»។
បន្ថែមពីលើនេះលោកក៏បានស្នើឲ្យក្រុមហ៊ុន CP បង្កើនប្រតិបត្តិការរបស់ខ្លួននៅកម្ពុជាឲ្យបានច្រើនបន្ថែមទៀត ពិសេសលើការកែច្នៃ អង្ករ ដំឡូងមី ពោត និងផលិតផលដទៃទៀតដែលសុទ្ធតែជាផលិតផលមានសក្ដានុពលសម្រាប់នាំចេញ។
មិនមានតួលេខពីបរិមាណនាំចេញកាហ្វេក្នុងឆ្នាំ ២០១៩ ទេ ប៉ុន្តែតាមរបាយការណ៍ក្រសួងកសិកម្មបានឲ្យដឹងថា កាលពីឆ្នាំ ២០១៨ កម្ពុជាបាននាំចេញគ្រាប់កាហ្វេ ចំនួន ២,២៥ តោនធ្លាក់ចុះ ១៥,៤១ ភាគរយ ធៀបនឹងឆ្នាំ ២០១៧ ដែលមានចំនួន ២,៦៦ តោន។ កាលពីឆ្នាំ ២០១៦ ការនាំចេញ កាហ្វេ ២,២៥ តោន៕