ភ្នំពេញៈ ក្រុមហ៊ុនបុត្រសម្ព័ន្ធអាមេរិករបស់ក្រុមហ៊ុន 7-Eleven Japan Co នឹងពង្រីកហាងលក់ទំនិញរបស់ខ្លួនមកកម្ពុជានៅឆ្នាំក្រោយ ដោយអនុញ្ញាតឲ្យ CP Group ដែលជាក្រុមហ៊ុនពហុផលិតផលរបស់ថៃជាអ្នកគ្រប់គ្រង។
Kyodo News បានរាយការណ៍កាលពីថ្ងៃសុក្រថា CP All Plc ដែលជាសាខាក្រុមហ៊ុនលក់រាយចុះបញ្ជីនៅផ្សារហ៊ុនថៃបានសម្រេចកិច្ចព្រមព្រៀងជាមួយក្រុមហ៊ុនអាមេរិក ដើម្បីប្រតិបត្តិការហាងលក់ទំនិញ 7-Eleven តាមរយៈក្រុមហ៊ុន CP All (Cambodia) Co ដែលនឹងចាប់ផ្ដើមនៅឆ្នាំ ២០២១ ខាងមុខ។
ស្ដ្រីអ្នកនាំពាក្យរបស់ Seven & I Holdings Co ដែលជាក្រុមហ៊ុនលក់រាយរបស់ប្រទេស ជប៉ុន បានឲ្យដឹងថា ហាងលើកដំបូងនឹងបើកក្នុងទីក្រុងភ្នំពេញ។
Kyodo News បានដកស្រង់សម្ដីស្ដ្រីអ្នកនាំពាក្យរូបនោះថា៖ «កម្ពុជាគឺជាទីផ្សារ ១ ក្នុងចំណោមទីផ្សារក្រៅប្រទេសជាច្រើនដែលក្រុមហ៊ុនលក់រាយរបស់ប្រទេសជប៉ុននឹងបើកហាងលក់ទំនិញដ៏ទំនើបរបស់ខ្លួន»។
ប្រធានសម្ព័ន្ធសមាគមសហគ្រាសធុនតូច និងមធ្យមលោក តែ តាំងប៉ បានប្រាប់ភ្នំពេញប៉ុស្តិ៍កាលពីថ្ងៃអាទិត្យថា លោកស្វាគមន៍ការនាំយក ហ្វ្រេនឆាយផ្សារទំនើប 7-eleven របស់ថៃចូលមកទីផ្សារកម្ពុជា។ លោកបន្តថា ទោះយ៉ាងណា ប្រសិនបើផ្សារនេះដាក់តាំងលក់តែផលិតផលរបស់ប្រទេសថៃវានឹងធ្វើប៉ះពាល់ដល់ផលិតផលក្នុងស្រុករបស់កម្ពុជា។
ក្រុមហ៊ុននេះក៏គ្រោងចូលទៅទីផ្សារឥណ្ឌានៅក្នុងឆ្នាំនេះផងដែរ។ នេះបើយោងតាមស្ដ្រីអ្នកនាំពាក្យរូបនោះ៕ LA