ភ្នំពេញៈ សហព័ន្ធស្រូវអង្ករកម្ពុជា (CRF) បានប្តេជ្ញាថានឹងនាំចេញអង្ករឲ្យបាន ១ លានតោន ត្រឹមឆ្នាំ ២០២២ បន្ទាប់ពីទិសដៅនេះត្រូវបានកំណត់រួចម្តងហើយកាលពីឆ្នាំ ២០១៥។
នៅក្នុងសិក្ខាសាលាពិគ្រោះយោបល់លើផែនការយុទ្ធសាស្ត្រសម្រាប់ឆ្នាំ ២០២០-២០២៣ កាលពីថ្ងៃពុធដោយមានការចូលរួមពីសមាជិកក្រុមប្រឹក្សាភិបាល សមាជិកសហព័ន្ធ តំណាងក្រសួង ស្ថាប័នរដ្ឋាភិបាល និងអង្គការដៃគូអន្តរជាតិ សហព័ន្ធស្រូវអង្ករកម្ពុជាបានកំណត់យកគោលដៅត្រឹមឆ្នាំ ២០២២ ត្រូវតែនាំចេញអង្ករឲ្យបាន ១ លានតោន។
លោកប្រធានសហព័ន្ធស្រូវអង្ករកម្ពុជាបានលើកឡើងក្នុងសិក្ខាសាលានោះថា៖ «ដើម្បីបំពេញតម្រូវការនាំចេញនេះ កញ្ចប់ឥណទានក្នុងអត្រាការប្រាក់ពិសេស ២០០ លានដុល្លារសម្រាប់បំពេញបន្ថែមក្នុងការទិញស្រូវនារដូវប្រមូលផល»។
តាមលោក សុង សារ៉ន កញ្ចប់ថវិកា ២០០ លាននេះអាចទិញបានស្រូវប្រមាណជាត្រឹម ៥០ ម៉ឺនតោនស្រូវនារដូវប្រមូលផល ពិសេសស្រូវពូជ ផ្កាម្លិះ។
របាយការណ៍នាំចេញអង្ករបានឲ្យដឹងថា ការនាំចេញអង្ករពីកម្ពុជាទៅកាន់ទីផ្សារអន្តរជាតិក្នុងរយៈពេល ៩ ខែ ឆ្នាំ ២០១៩ សម្រេចបាន ៣៩៨ ៥៨៦ តោនកើនឡើង ២,៣ ភាគរយ បើធៀបនឹងរយៈពេលដូចគ្នាឆ្នាំ ២០១៨ ដែលមាន ៣៨៩ ២៦៤ តោន។ ក្នុងនោះការនាំចេញទៅទីផ្សារចិន មាន ១៥៧ ៧៩៣ តោនកើនជាង ៤៤ ភាគរយ និងទៅអឺរ៉ុបមានចំនួន ១៣៥ ៤៧១ តោនធ្លាក់ចុះជិត ៣០ ភាគរយ។
មិនអាចសុំការបញ្ជាក់បន្ថែមពីលោក សុង សារ៉ន លើការប្តេជ្ញានេះបានទេកាលពីថ្ងៃម្សិលមិញ។
ទោះបីយ៉ាងនេះក្តីលោក សុង សារ៉ន បានប្រាប់ភ្នំពេញប៉ុស្តិ៍ពីដើមខែនេះថា ការនាំចេញអង្ករកម្ពុជាទៅទីផ្សារអឺរ៉ុបរំពឹងថានឹងមានកំណើនឡើងវិញក្នុងត្រីមាសទី ៤ ឆ្នាំ ២០១៩ នេះបន្ទាប់ពីដំណើរទស្សនកិច្ចរបស់ក្រុមការងារសហព័ន្ធស្រូវអង្ករ (CRF) ទៅកាន់សហភាពអឺរ៉ុប ដើម្បីបង្កើនការផ្សព្វផ្សាយពីផលិតផលអង្ករកម្ពុជាលោកថ្លែងថា៖ «អឺរ៉ុបនៅតែជាទីផ្សារមានសក្តានុពលសម្រាប់អង្ករកម្ពុជា ខណៈបច្ចុប្បន្នយើងកំពុងតែស្វែងរកតម្រូវការពិតប្រាកដ។ តាមរយៈនេះយើងក៏ត្រូវធ្វើពិពិធកម្មទីផ្សាររបស់យើង ដើម្បីឲ្យដើរស្របតាមតម្រូវការទីផ្សារសហគមន៍អឺរ៉ុប។ ខ្ញុំសង្ឃឹមថា ការនាំចេញអង្ករទៅទីផ្សារអឺរ៉ុបនឹងកើនឡើងនៅចុងឆ្នាំ ២០១៩ នេះ»។
តាមលោក សុង សារ៉ន បានលើកឡើងក្នុងសិក្ខាសាលាកាលពីថ្ងៃម្សិលមិញថា ដើម្បីអាចសម្រេចបានគោលដៅនេះសហព័ន្ធបានកំណត់ការនាំចេញទៅទីផ្សារចិនឲ្យបាន ៣៥ ភាគរយ ទីផ្សារអឺរ៉ុប ៣០ ភាគរយ នាំចេញទៅបណ្តាប្រទេសរដ្ឋអាស៊ានឲ្យបាន ៣០ ភាគរយ និង ៥ ភាគរយទៀត ទៅកាន់ទីផ្សារផ្សេងៗ។
លោកបន្តថាក្នុងនោះនឹងកំណត់ការនាំចេញអង្ករក្រអូបប្រណីត ៣០ ភាគរយ អង្ករក្រអូបធម្មតា ៤០ ភាគរយ និងអង្ករធម្មតា ៣០ ភាគរយ។
លោកនាយករដ្ឋមន្ត្រី ហ៊ុន សែន ធ្លាប់បានប្រកាសថា កម្ពុជានឹងនាំចេញអង្ករឲ្យ ១ លានតោន ត្រឹមឆ្នាំ ២០១៥ ប៉ុន្តែគិតត្រឹមឆ្នាំ ២០១៩ នេះទំហំនៃការនាំចេញអង្កររបស់កម្ពុជាសម្រេចបានតែជាង ៦០ ម៉ឺនតោនប៉ុណ្ណោះ ខណៈអ្នកនៅក្នុងវិស័យនេះបានលើកឡើងពីបញ្ហាប្រឈមនានា ដូចជាកង្វះទុន ឃ្លាំងស្តុកស្រូវ និងឡសម្ងួតជាដើម៕LA