ភ្នំពេញៈ ថ្នាក់ដឹកនាំសហព័ន្ធស្រូវអង្ករកម្ពុជា (CRF) បានឲ្យដឹងថា ខ្លួនគ្រោងចរចាជាមួយសមភាគីចិនសម្រាប់ការទូទាត់សាច់ប្រាក់ជារូបិយប័ណ្ណប្រាក់យន់ និងប្រាក់រៀលនៅក្នុងការនាំចេញអង្ករពីប្រទេសកម្ពុជាដែលជាវិធានការមួយដើម្បីជួយសម្រួលមធ្យោបាយទូទាត់កាន់តែមានភាពងាយស្រួល និងបង្កើនការនាំចេញ។
លោក ចាន់ សុឃាំង អនុប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្ដិ៍ កាលពីម្សិលមិញថា ចាប់តាំងពីការនាំចេញអង្ករទៅទីផ្សារប្រទេសចិន បានកើនឡើងយ៉ាងខ្លាំងក្នុងរយៈពេលប៉ុន្មានឆ្នាំចុងក្រោយនេះ សហព័ន្ធបានប្រជុំជាមួយសមាជិកទាំងអស់ជាង ៦ ខែមកហើយ ជុំវិញការទូទាត់សាច់ប្រាក់ជារូបិយប័ណ្ណប្រាក់យន់របស់ចិន និងប្រាក់រៀល ដើម្បីជួយសម្រួលមធ្យោបាយនៃការទូទាត់រវាងរូបិយប័ណ្ណទាំង ២។
លោកបានលើកឡើងថា៖ «នៅពេលនេះសមាជិកទាំងអស់បានយល់ស្របក្នុងការធ្វើសំណើទៅកាន់ធនាគារជាតិនៃកម្ពុជា (NBC) ដើម្បីសម្របសម្រួលក្នុងការទូទាត់សាច់ប្រាក់រវាងរូបិយប័ណ្ណ ប្រាក់យន់របស់ចិន និងប្រាក់រៀល ជាពិសេស យើងនឹងទូទាត់ថ្លៃស្រូវ និងដឹកជញ្ជូនជាប្រាក់រៀល ខណៈដែលការនាំចេញជាប្រាក់ដុល្លារអាមេរិក ដែលតម្រូវឲ្យពួកយើងត្រូវប្តូរពីប្រាក់យន់ទៅជាប្រាក់ដុល្លារអាមេរិក និងពីប្រាក់ដុល្លារអាមេរិកទៅជាប្រាក់យន់ ហើយបន្ទាប់មកទៅជាប្រាក់រៀល ដែលធ្វើឲ្យភាគីទាំង ២ ខាតបង់លើអត្រាប្តូរប្រាក់ និងខាតពេល»។
លោកបន្តថា៖ «ប្រសិនបើយើងអាចទូទាត់ជាប្រាក់យន់ដោយផ្ទាល់តាមរយៈធនាគារនៅក្នុងប្រទេសចិន និងធនាគារដែលគ្រប់គ្រងដោយចិននៅកម្ពុជា ពួកយើងនឹងចំណេញលើអត្រាប្តូរប្រាក់ និងសន្សំពេលវេលា និងក៏អាចបង្កើនការនាំចេញ»។
លោកលើកឡើងថា លោកបានជួបខាងធនាគារជាតិ និងបានធ្វើសំណើដើម្បីជួយសម្រួលជុំវិញបញ្ហានេះ ប៉ុន្តែទាមទារធនាគារនៅក្នុងប្រទេសចិនជួយសម្រួលលើអត្រាការប្រាក់ ដែលជាការព្យាករអត្រាប្តូរប្រាក់ថេររវាងប្រាក់រៀល និងប្រាក់យន់នៅក្នុងពេលវេលាជាក់លាក់មួយ។
លោកថា៖ «ប្រសិនបើយើងអាច ធ្វើរឿងនោះបាន យើងអាចបង្កើនល្បឿននៃការចុះអនុស្សរណៈ (MoU) ជុំវិញការទូទាត់សាច់ប្រាក់នេះ»។
សហព័ន្ធស្រូវអង្ករបានឲ្យដឹងនៅក្នុងរបាយការណ៍មួយថា ប្រទេសកម្ពុជាបាននាំចេញអង្ករជាង ៣ សែនតោន ទៅទីផ្សារអន្តរជាតិក្នុងរយៈពេល ៤ ខែដំបូងនៅឆ្នាំនេះ មានតម្លៃប្រមាណ ២១០ លានដុល្លារ ដែលជាបរិមាណនាំចេញខ្ពស់បំផុតក្នុងរយៈពេល ១ ទសវត្សរ៍កន្លងមក ដោយកើនឡើង ៤០,៤៦ ភាគរយ ធៀបនឹងជាង ២១៣ ៧៦៣ តោន ក្នុងរយៈពេលដូចគ្នាកាលពីឆ្នាំមុន ក្នុងនោះប្រទេសចិននាំចូលអង្ករកម្ពុជាចំនួន ៤១ ភាគរយនៃការនាំចេញ ឬ ១២២ ០៩៤ តោន។
លោក ចាន់ សុឃាំង ក៏ជាប្រធាន និងអគ្គនាយកក្រុមហ៊ុន Signatures of Asia Co Ltd ផងដែរបានឲ្យដឹងថា ការនាំចេញរបស់លោកទៅទីផ្សារប្រទេសចិនបានកើនឡើងជាបន្តបន្ទាប់ ដែលមានចំនួន ១៥ ភាគរយនៃការនាំចេញសរុប។ លោកសង្ឃឹមថា នឹងមានការកើនឡើងបន្ថែមទៀតនៅពេលការទូទាត់សាច់ប្រាក់ត្រូវបានធ្វើឡើងរវាងរូបិយវត្ថុទាំង ២។
លោកលើកឡើងថា៖ «ប្រសិនយើងអាចធ្វើការទូទាត់នេះដោយរលូន យើងនឹងមើលឃើញការកើនឡើងខ្លាំងទៅប្រទេសចិន។ ហើយប្រទេសកម្ពុជានឹងក្លាយជាប្រទេសគំរូនៃការទូទាត់ប្រាក់យន់នៅលើពិភពលោកសម្រាប់ពាណិជ្ជកម្មអន្តរជាតិ ដូច្នេះមេដឹកនាំរបស់ប្រទេសចិននឹងផ្សព្វផ្សាយដល់ពិភពលោក បន្ទាប់មកយើងនឹងទទួលបានលទ្ធភាពចូលទីផ្សារកាន់តែច្រើន និងផលិតផលផ្សេងៗទៀត»។
ប្រទេសកម្ពុជា និងចិនបានបញ្ចប់ការចរចាជុំទី ៣ រួចហើយសម្រាប់កិច្ចព្រមព្រៀងពាណិជ្ជកម្មសេរី។ កិច្ចព្រមព្រៀងនេះត្រូវបានរំពឹងថានឹងត្រូវចុះហត្ថលេខាដោយមេដឹកនាំប្រទេសទាំង ២ ត្រឹមចុងឆ្នាំនេះ៕LA