.jpg)
កសិករកំពុងរៀបចំការុងដាក់ស្រូវចេញពីម៉ាស៊ីនច្រូតនៅក្នុងខេត្តសៀមរាប នាពេលកន្លងមក។ ហុង មិនា
ភ្នំពេញៈ សហព័ន្ធស្រូវអង្ករកម្ពុជា (CRF) បានអំពាវនាវដល់កសិករពន្យារពេលការលក់ស្រូវរហូតដល់បុណ្យភ្ជុំបិណ្ឌរួចរាល់ដើម្បីចៀសវាងពីការទម្លាក់ថ្លៃពីឈ្មួញកណ្តាល។
សហព័ន្ធស្រូវអង្ករកម្ពុជាកាលពីថ្ងៃទី ២៤ ខែ កញ្ញា ឆ្នាំ ២០១៩ បានឲ្យដឹងថា ខណៈថ្ងៃភ្ជុំបិណ្ឌខិតជិតមកដល់មានរោងម៉ាស៊ីនកិនស្រូវប្រមាណជាង ៨០ ភាគរយ បានបិទទ្វារជាហេតុធ្វើឲ្យក្រុមឈ្មួញឆ្លៀតឱកាសទម្លាក់តម្លៃស្រូវនៅតាមវាលស្រែនានា។ សហព័ន្ធសូមអំពាវនាវដល់ប្រជាកសិករដែលមានស្រូវគុណភាពល្អ សូមកុំប្រញាប់ច្រូតកាត់ ឬលក់ស្រូវពេកដោយគួររង់ចាំក្រោយបុណ្យភ្ជុំបិណ្ឌបញ្ចប់សិន។
លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជាកាលពីថ្ងៃម្សិលមិញបាននិយាយថាចាប់ពីដើមសប្តាហ៍នេះមកមានរោងម៉ាស៊ីនកិនស្រូវជាច្រើនបានផ្អាកសកម្មភាពប្រមូលទិញស្រូវជាហេតុធ្វើឲ្យក្រុមឈ្មួញមានឱកាសដើរប្រមូលទិញស្រូវក្នុងតម្លៃទាបជាងទីផ្សារ។
លោកថ្លែងថា៖ «បើស្រូវ មិនរងផលប៉ះពាល់ដោយសារទឹកជំនន់ ឬការបំផ្លាញពីសត្វ កសិករមិនគួរប្រញាប់ច្រូតពេកទេ គួររង់ចាំពេលបុណ្យភ្ជុំបិណ្ឌរួចរាល់សិន។ ស្រូវល្អមិនគួរមានតម្លៃក្រោមតម្លៃ ១ ១៥០-១ ២០០ រៀលក្នុង ១ គីឡូក្រាមឡើយ»។
កសិករក្នុងស្រុកចិត្របុរី ខេត្តក្រចេះលោក ណារុំ បាននិយាយថាតម្លៃស្រូវក្នុងខេត្តក្រចេះនៅពេលនេះលក់មិនបានខ្ពស់ដូចឆ្នាំមុនទេ ដោយមានតម្លៃចន្លោះពី ៧០០-៨០០ រៀលក្នុង ១ គីឡូក្រាម ខណៈរយៈពេលដូចគ្នាឆ្នាំមុនមានតម្លៃ ៩០០-១ ០០០ រៀល។ លោកបន្តថា ប្រសិនបើតម្លៃស្រូវធ្លាក់ចុះបែបនេះ វាមិនអាចជួយឲ្យប្រជាកសិករទទួលបានប្រាក់ចំណេញទេ និងត្រូវខាតបង់ប្រសិនបើមានការខូចខាតដោយគ្រោះទឹកជំនន់។
លោកថ្លែងថា៖ «តម្លៃស្រូវនៅខេត្តក្រចេះធ្លាក់ចុះ ដោយសារក្រុមឈ្មួញនិយាយថា ត្រូវចំណាយលើថ្លៃដឹកជញ្ជូនខ្ពស់ជាងឆ្នាំមុន»។
ខណៈស្រូវច្រូតកាត់រួច ភាគច្រើនត្រូវបានកសិករនាំគ្នាលក់ទៅឲ្យឈ្មួញភ្លាមៗនោះលោក ណារុំ អះអាងថាបច្ចុប្បន្នក្នុងខេត្តក្រចេះមិនសូវមានឃ្លាំងស្តុក និងឡសម្ងួតទេ ដែលជាហេតុធ្វើឲ្យកសិករមិនមានជម្រើសអ្វីផ្សេងៗក្រៅពីលក់ទៅឲ្យឈ្មួញបន្ទាប់ពីការច្រូតកាត់។
លោកបន្តថា៖ «ដោយសារតែខេត្តក្រចេះមិនសូវមានឡសម្ងួត និងឃ្លាំងស្តុកច្រើន បច្ចុប្បន្នការកំណត់តម្លៃស្រូវនៅពេលប្រមូលផលគឺស្ថិតក្នុងកណ្តាប់ដៃរបស់ឈ្មួញទាំងស្រុង»។
លោក ហេង ផេង នាយកប្រតិបត្តិក្រុមហ៊ុន Thmor Korl Rice Import Export Co.,Ltd ដែលជាក្រុមហ៊ុនប្រមូលទិញស្រូវ និងនាំចេញអង្ករនៅខេត្តបាត់ដំបង បានប្រាប់ថាតម្លៃស្រូវនៅខេត្តបាត់ដំបងឆ្នាំនេះគឺប្រហាក់ប្រហែលនឹងឆ្នាំមុន តែគុណភាពស្រូវហាក់មានការធ្លាក់ចុះ ព្រោះអាកាសធាតុក្តៅមិនសូវមានភ្លៀងបានធ្វើឲ្យស្រូវស្កក។
លោកបន្តថា ក្រុមហ៊ុនរបស់លោកប្រមូលទិញតែស្រូវប្រភេទលេខ ១ ប៉ុណ្ណោះ ដោយថ្ងៃនេះ (ម្សិលមិញ) មានតម្លៃ ១ ១៥០ រៀលក្នុង ១ គីឡូក្រាម។ លោកបន្តថា៖ «បច្ចុប្បន្នកម្មករនៅតាមរោងម៉ាស៊ីនជាច្រើនបាននាំគ្នាសម្រាកទៅស្រុក ហេតុនេះកសិករមិនគួរព្យាយាមច្រូតកាត់ស្រូវពេលនេះទេ ព្រោះវានឹងធ្វើឲ្យតម្លៃធ្លាក់ចុះ»។
លោក គឹម ហួត ប្រធានមន្ទីរពាណិជ្ជកម្មខេត្តបាត់ដំបងបានប្រាប់ថា ការប្រមូលផលស្រូវក្នុងខេត្តបាត់ដំបង ពេលនេះទើបសម្រេចបានប្រមាណ ៣០-៤០ ភាគរយប៉ុណ្ណោះ ដោយសារការរាំងស្ងួតមានរយៈពេលយូរ។ ស្រូវក្រអូបនៅខេត្តបាត់ដំបងកាលពីថ្ងៃម្សិលមិញមានតម្លៃ ១ ១៣០ រៀលក្នុង ១ គីឡូក្រាម ចំណែកស្រូវប្រភេទ IR មានតម្លៃ ៧០០ រៀលបើធៀបនឹងឆ្នាំ ២០១៨ មានតម្លៃប្រហែល ៨៥០ រៀល។
លោកថ្លែងថា៖ «ទីផ្សារ និងតម្លៃស្រូវក្នុងខេត្តបាត់ដំបងមានភាពល្អប្រសើរដោយមិនមានបញ្ហាអ្វីគួរឲ្យកត់សម្គាល់ទេ»៕ LA
