.jpg)
ក្រសួងពាណិជ្ជកម្មដឹកលក់ស្បៀងអាហារ នៅតាមបណ្ដោយផ្លូវវែងស្រេង កាលពីថ្ងៃទី ២២ មេសា។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ អគ្គលេខាធិការសហព័ន្ធស្រូវ អង្ករកម្ពុជា (CRF) លោក លន់ យ៉េង ឲ្យដឹងថា ក្នុងរយៈពេល ១ សប្តាហ៍កន្លងមកនេះ សមាជិក CRF សហព័ន្ធបានបញ្ចេញលក់រាយជូនប្រជាជននៅក្នុងតំបន់បិទខ្ទប់បានចំនួន ២ ០០០ តោន បន្ទាប់ពីមានការសម្របសម្រួលដល់ការដឹកជញ្ជូនពីសាលារាជធានីភ្នំពេញតាមការស្នើសុំរបស់សហព័ន្ធកាលពីថ្មីនេះ។
ដើម្បីកាត់ផ្តាច់ការឆ្លងរាលដាលជំងឺកូវីដ ១៩ នៃព្រឹត្តិការណ៍ ២០ កុម្ភៈ ឲ្យបានឆាប់ រដ្ឋាភិបាលចេញវិធានការរឹតបន្តឹងការធ្វើដំណើរ និងដឹកជញ្ជូនទំនិញឆ្លងកាត់តំបន់បិទខ្ទប់។
លោក លន់ យ៉េង ប្រាប់ ភ្នំពេញ ប៉ុស្តិ៍ កាលពីថ្ងៃសៅរ៍ថា ចាប់ពីថ្ងៃទី ១៦ ដល់ ២៣ មេសា សមាជិកសហព័ន្ធដែលបានប្រកាសចូលរួមជាមួយក្រសួងពាណិជ្ជកម្មបានលក់អង្ករចំនួនប្រហែល ២ ០០០ តោន ដោយលោករំពឹងបរិមាណនេះនឹងកើនឡើងថែមទៀត។
លោកថ្លែងថា៖ «ទាក់ទងនឹងការដឹកជញ្ជូនមិនទាន់រលូន ១០០ ភាគរយទេ ប៉ុន្តែខាងសាលាក្រុងគាត់បានជួយសម្រួលបានច្រើនទៅតាមទីតាំងជាក់ស្តែង និងគោលដៅត្រួតពិនិត្យ ជាលទ្ធភាពយើងអាចលក់បានច្រើនជាងនេះ ប្រសិនបើមានការសម្រួលដល់ការដឹកជញ្ជូនបន្ថែមទៀត»។
កាលពីថ្ងៃអាទិត្យ ទី ១៨ សមាជិករបស់ CRF យ៉ាងតិចចំនួន ៧ បានធ្វើការលក់អង្ករបញ្ចុះតម្លៃចន្លោះពី ១ ម៉ឺនរៀល ដល់ ២ ម៉ឺនរៀលក្នុង ១ បេ នៃតម្លៃគោល ដើម្បីចូលរួមជាមួយរដ្ឋាភិបាលសម្រួលដល់ជីវភាពរបស់ប្រជាជនអំឡុងពេលអនុវត្តវិធានការបិទខ្ទប់ក្រុងភ្នំពេញ និងក្រុងតាខ្មៅ។
ប្រធានសហព័ន្ធស្រូវ អង្ករកម្ពុជា (CRF) លោក សុង សារ៉ន ប្រាប់ ភ្នំពេញ ប៉ុស្តិ៍ កាលពីថ្ងៃចន្ទ (១៩) ថា សហព័ន្ធប៉ាន់ប្រមាណថា តម្រូវការអង្ករសម្រាប់ទីក្រុងភ្នំពេញ និងក្រុងតាខ្មៅ គឺក្នុងរង្វង់ ៤ ម៉ឺនតោន សម្រាប់រយៈពេល ១ ខែ៕
