ភ្នំពេញៈ សហព័ន្ធស្រូវអង្ករកម្ពុជា (CRF) គ្រោងនឹងស្នើសុំឲ្យក្រសួងសេដ្ឋកិច្ច និងហិរញ្ញវត្ថុទម្លាក់កញ្ចប់ថវិកាប្រមាណ ៣០ លានដុល្លារបន្ថែមទៀត តាមរយៈធនាគារអភិវឌ្ឍន៍ជនបទ និងកសិកម្ម (ARDB) ដើម្បីត្រៀមសម្រាប់ទិញស្រូវប្រមាណ ១ លានតោន នៅក្នុងរដូវប្រមូលផលឆ្នាំនេះ។
លោក សុង សារ៉ន ប្រធានសហព័ន្ធស្រូវអង្ករកម្ពុជាប្រាប់ភ្នំពេញប៉ុស្តិ៍កាលពីថ្ងៃចន្ទថា នៅក្នុងជំនួបជាមួយលោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីសប្តាហ៍មុន CRF បានស្នើសុំកញ្ចប់ថវិកា ៣០ លានដុល្លារបន្ថែមទៀតលើកញ្ចប់ថវិកាដែលមានស្រាប់ ៥០ លានដុល្លារនៃថវិកាសរុប ២០០ លានដុល្លារ។
លោកបន្តថា ការស្នើសុំកញ្ចប់ថវិកាបន្ថែមពីរដ្ឋាភិបាលនេះគឺដើម្បីត្រៀមសម្រាប់ទិញស្រូវនារដូវប្រមូលផលខាងមុខ។ កញ្ចប់ថវិកានេះនឹងជួយបង្កើនប្រសិទ្ធភាពនៃការប្រមូលទិញស្រូវស្តុកទុក និងទប់ស្កាត់ការធ្លាក់តម្លៃស្រូវដែលតែងធ្វើឲ្យប្រជាកសិករមួយចំនួនមិនសប្បាយចិត្ត។
លោកថ្លែងថា៖ «បើតាមការប៉ាន់ប្រមាណទិន្នផលស្រូវក្នុងរដូវប្រមូលផលខាងមុខនឹងមានចន្លោះពី ៨០ ម៉ឺនទៅ ១ លានតោន ដូច្នេះយើងត្រូវការលុយ ៣០ លានដុល្លារបន្ថែមទៀតតាមរយៈ ARDB ឬធនាគារពាណិជ្ជ ដើម្បីផ្តល់លទ្ធភាពឲ្យរោងម៉ាស៊ីនស្រូវ និងក្រុមហ៊ុនអាចបញ្ជាទិញឲ្យអស់ពីស្រែ»។
លោក កៅ ថាច់ អគ្គនាយកធនាគារអភិវឌ្ឍន៍ជនបទ និងកសិកម្មបានឲ្យដឹងថា លោកមិនទទួលបានសំណើផ្លូវការពីសហព័ន្ធស្រូវអង្ករទេ។
របាយការណ៍នាំចេញអង្ករកម្ពុជាបានបង្ហាញថា ក្នុងរយៈពេល ៤ ខែ ឆ្នាំ ២០២០ ការនាំចេញអង្ករសម្រេចបាន ៣០០ ២៥២ តោន កើនឡើង ៤០,៤៦ ភាគរយធៀបនឹងរយៈពេលដូចគ្នាកាលពីឆ្នាំមុន។ ប្រាក់ចំណូលទទួលបានពីការនាំចេញក្នុងរយៈពេលនេះគឺចំនួន ២១០ លានដុល្លារ។
របាយការណ៍បន្តថា ការនាំចេញទៅកាន់ប្រទេស ចិន មាន ៤១ ភាគរយ ទៅសហគមន៍អឺរ៉ុប និងអង់គ្លេស ៣២ ភាគរយ ប្រទេសក្នុងតំបន់អាស៊ាន ១៣ ភាគរយ និងប្រទេសផ្សេងៗទៀតចំនួន ១៤ ភាគរយ៕LA