ភ្នំពេញៈ សហព័ន្ធស្រូវអង្ករកម្ពុជា (CRF) បានស្នើរដ្ឋាភិបាលរក្សាកញ្ចប់ថវិកាចំនួន ៨០ លានដុល្លារនៅធនាគារអភិវឌ្ឍន៍ជនបទ (RDB) សម្រាប់ប្រមូលទិញស្រូវនៅក្នុងរដូវប្រមូលផលថ្មីនាឆ្នាំ ២០២០ នេះដើម្បីស្តុកទុក និងកែច្នៃសម្រាប់នាំចេញ។
លោក ច័ន្ទ សុឃាំង អនុប្រធានសហព័ន្ធស្រូវអង្ករកម្ពុជាបានប្រាប់ភ្នំពេញប៉ុស្ដិ៍ កាលពីថ្ងៃព្រហស្បតិ៍ថា CFR បានស្នើសុំរដ្ឋាភិបាលកម្ពុជាឲ្យរក្សាទឹកប្រាក់ ៥០ លានដុល្លារនៃកញ្ចប់ថវិកាពិសេស និងបានស្នើសុំបន្ថែម ៣០ លានដុល្លារទៀត ដើម្បីប្រមូលទិញស្រូវនៅក្នុងរដូវប្រមូលផលឆ្នាំ ២០២០ និងឆ្នាំ ២០២១ ខាងមុខ។
លោកថ្លែងថា៖ «ថវិកានេះត្រូវបានបង្វែរទៅក្រសួងសេដ្ឋកិច្ច និងហិរញ្ញវត្ថុ ដូច្នេះ CRF បានស្នើឲ្យរដ្ឋាភិបាលរក្សាថវិកានេះនៅក្នុងធនាគារអភិវឌ្ឍន៍ជនបទដែលធនាគារនេះអាចផ្ដល់មូលនិធិសម្រាប់វិស័យស្រូវអង្ករនៅរដូវនេះ។ រដូវកាលទិញស្រូវនឹងចាប់ផ្តើមនៅពាក់កណ្ដាលខែមេសា»។
លោកថ្លែងថា៖ «ការកម្រិតលទ្ធភាពទទួលបានហិរញ្ញប្បទាន ខណៈធនាគារពាណិជ្ជបានកាត់បន្ថយទំហំប្រាក់កម្ចីសម្រាប់វិស័យកសិកម្មពីចំនួន ១ លានដុល្លារមកនៅត្រឹម ៥០ ម៉ឺនដុល្លារ ដូច្នេះ CRF បានស្នើសុំមូលនិធិពីរដ្ឋាភិបាល ដើម្បីសម្រេចបានទិសដៅនាំចេញអង្ករ ១ លានតោន»។
សេចក្ដីប្រកាសព័ត៌មានបានពី CRF ក៏បានស្នើសុំធនាគារអភិវឌ្ឍន៍ជនបទពន្យារពេលការសងប្រាក់ចាប់ពី ៦ ខែទៅដល់ ១២ ខែផងដែរ។ «CRF ស្នើសុំពន្យារពេលការសងប្រាក់របស់ក្រុមហ៊ុននាំចេញអង្ករមួយចំនួន និងម្ចាស់រោងម៉ាស៊ីនកិនស្រូវក្នុងអំឡុងការរីករាលដាលវីរុសកូវីដ ១៩ ខណៈលំហូរសាច់ប្រាក់របស់ក្រុមហ៊ុនត្រូវបានរំខាន»។
លោក សុឃាំង បានបញ្ជាក់ថាលោក កៅ ថាច អគ្គនាយកធនាគារអភិវឌ្ឍន៍ជនបទបានទទួលយកសំណើរបស់សហព័ន្ធស្រូវអង្ករកម្ពុជាហើយ ប៉ុន្តែលោកត្រូវសុំគោលការណ៍រដ្ឋាភិបាលជាមុនសិន។
កាលពីខែធ្នូឆ្នាំមុន ក្រសួងសេដ្ឋកិច្ច និងហិរញ្ញវត្ថុបានបញ្ចេញមូលនិធិ ៥០ លានដុល្លារឲ្យ RDB ដើម្បីប្រើប្រាស់ជាដើមទុនក្នុងការប្រមូលទិញស្រូវស្ដុកបន្ថែមក្នុងអំឡុងរដូវប្រមូលផល។
លោក ចាន់ ពេជ្រ ប្រធានគ្រប់គ្រងទូទៅក្រុមហ៊ុន Signatures of Asia បានប្រាប់ភ្នំពេញប៉ុស្ដិ៍ថា ក្រុមហ៊ុនលោកគ្រោងនឹងទិញស្រូវប្រមាណ ២០០ ០០០ តោននៅរដូវប្រមូលផលនេះ ហើយក្រុមហ៊ុនរបស់លោកក៏គ្រោងនឹងខ្ចីប្រាក់ពី RDB ចំនួន ៥០០ ០០០ ដុល្លារ ដើម្បីទិញស្រូវស្ដុកទុកផងដែរ។
លោកបានថ្លែងថា៖ «ខ្ញុំគិតថា ប្រសិនបើរដ្ឋាភិបាលបង្វែរថវិកាហិរញ្ញប្បទាននេះ វានឹងជួយក្នុងការរក្សាតម្លៃស្រូវនៅរដូវប្រមូលផលនេះ។ ក្រុមហ៊ុនរបស់ខ្ញុំគ្រោងនឹងចំណាយប្រហែល ៤ លានដុល្លារដើម្បីទិញស្រូវក្នុងចំណោមនេះគឺប្រាក់មួយចំនួនទៀតគ្រោងនឹងខ្ចីពី RDB»។
សហព័ន្ធស្រូវអង្ករកម្ពុជាបានប្ដេជ្ញាចិត្តថា នឹងបង្កើនការនាំចេញអង្ករកម្ពុជាឲ្យបាន ១ លានតោនត្រឹមឆ្នាំ ២០២១។ នេះបើយោងតាមលោក សុង សារ៉ន ប្រធាន CRF បានឲ្យដឹងកាលពីខែតុលាឆ្នាំមុន។
លោកនិយាយថា៖ «ដើម្បីឆ្លើយតបតាមតម្រូវការនាំចេញ យើងត្រូវមានកញ្ចប់ឥណទានអត្រាការប្រាក់ពិសេសចំនួន ២០០ លានដុល្លារ ដើម្បីទិញស្រូវក្នុងអំឡុងពេលរដូវប្រមូលផល»។ លោកបានបន្ថែមទៀតថា មូលនិធិដែលអាចរកបានអាចទិញស្រូវប្រហែល ៥០០ ០០០ តោន ជាពិសេសស្រូវក្រអូបនៅក្នុងអំឡុងរដូវប្រមូលផលឆ្នាំនេះ»។
កាលពីឆ្នាំ ២០១៩ កម្ពុជានាំចេញអង្ករបាន ៦២០ ១០៦ តោនធ្លាក់ចុះ ០,៩៧ ភាគរយបើធៀបនឹង ៦២៦ ២២៥ តោនកាលពីឆ្នាំ ២០១៨។
តម្លៃសរុបនៃការនាំចេញអង្ករកម្ពុជាទៅកាន់ទីផ្សារអន្តរជាតិមានតម្លៃប្រហែល ៥០១ លានដុល្លារកាលពីឆ្នាំមុន ធ្លាក់ចុះ ៤,៣ ភាគរយ បើធៀបទៅនឹង ៥២៤ លានដុល្លារកាលពីឆ្នាំ ២០១៨។ នេះបើយោងតាមរបាយការណ៍របស់សហព័ន្ធស្រូវអង្ករកម្ពុជា៕LA