.jpg)
រោងចក្រផលិតកំប៉ុងក្រោន មួយកន្លែងក្នុងព្រះរាជាណាចក្រកម្ពុជា។ រូបថត ហ្វេសប៊ុក
ភ្នំពេញៈ ក្រុមហ៊ុនធ្វើផលិតផលសម្រាប់ការវេចខ្ចប់មានមូលដ្ឋាននៅអាមេរិក Crown Holdings Inc នៅខែមករា បានដាក់ដំណើរការខ្សែចង្វាក់ផលិតកម្មផលិតសម្បកកំប៉ុងទី៣ របស់ខ្លួននៅភ្នំពេញ ជាអ្វីដែលក្រុមហ៊ុនលើកឡើងថា ជាផ្នែកមួយក្នុងការពង្រីកប្រតិបត្តិការនៅទីផ្សារអន្តរជាតិ។ នេះបើយោងតាមសេចក្តីជូនដំណឹងរបស់ក្រុមហ៊ុនកាលពីម្សិលមិញ។
យោងតាមសេចក្តីជូនដំណឹងក្នុងរបាយការណ៍ប្រចាំត្រីមាសទី៤ ឆ្នាំ ២០១៨ ក្រុមហ៊ុន Crown Holdings Inc ដែលចុះបញ្ជីក្នុងផ្សារភាគហ៊ុនក្រុងញូវយ៉កបានឲ្យដឹងថា ការពង្រីកខ្សែចង្វាក់ផលិតកម្មថ្មីនេះគឺ ដើម្បីឆ្លើយតបនឹងកំណើនតម្រូវការសម្បកកំប៉ុងសម្រាប់ការវេចខ្ចប់ផលិតផលស្រាបៀរ ភេសជ្ជៈប៉ូវកម្លាំង និងភេសជ្ជៈប្រភេទតែជាដើម។
សេចក្តីជូនដំណឹងក្នុងរបាយការណ៍របស់ក្រុមហ៊ុន Crown Holdings បានលើកឡើងថា៖ «នៅខែមករាឆ្នាំ ២០១៩ យើងបានចាប់ផ្តើមដំណើរការខ្សែចង្វាក់ផលិតកម្មទី៣ របស់យើងនៅភ្នំពេញ»។
ក្រុមហ៊ុនមិនទាន់បានបញ្ជាក់លម្អិតពីចង្វាក់ផលិតកម្មថ្មីនេះដូចជាសមត្ថភាពផលិតកម្ម ដើមទុនវិនិយោគ ឬ ទីតាំងជាក់លាក់នោះទេនៅក្នុងសេចក្តីជូនដំណឹងក្នុងរបាយការណ៍ប្រចាំត្រីមាសទី៤ របស់ខ្លួននោះទេ។
Crown Asia Pacific ជាក្រុមហ៊ុនបុត្រសម្ព័ន្ធមានមូលដ្ឋាននៅប្រទេស សិង្ហបុរី របស់ Crown Holdings បានមានប្រតិបត្តិការនៅក្នុងប្រទេសមួយចំនួនក្នុងការផលិតសំបកកំប៉ុងស្រាបៀរ ដូចជានៅ កម្ពុជា ចិន ឥណ្ឌូនេស៊ី ម៉ាឡេស៊ី សិង្ហបុរី ថៃ និងវៀតណាម ដែលការលក់ពីឆ្នាំ ២០១៨ ចំនួន ១,៣១ ពាន់លានដុល្លារ កើនឡើងពី ១,១៧ ពាន់លានដុល្លារកាលពីឆ្នាំ ២០១៧។
ក្រុមហ៊ុន Crown បានចូលមកកម្ពុជាដំបូងកាលពីឆ្នាំ ២០០៧ ជាមួយនឹងចង្វាក់ផលិតតែមួយគត់នៅក្រុងព្រះសីហនុ។ ដល់ពាក់កណ្ដាលឆ្នាំ ២០១៦ Crown ប្រតិបត្តិការរោងចក្រផលិត ៣ នៅកម្ពុជា ២ នៅភ្នំពេញ និង ១ នៅខេត្តព្រះសីហនុ៕LA
