ភ្នំពេញៈ ក្រុមហ៊ុនផ្សារមូលបត្រកម្ពុជា (CSX) កាលពីម្សិលមិញបានរៀបចំសិក្ខាសាលាបង្ហាញពីយុទ្ធសាស្រ្តជួញដូររបស់វិនិយោគិនក្នុងផ្សារហ៊ុន ៨ នាក់ដែលត្រូវបានជ្រើសរើសជាជ័យលាភីនៃការប្រកួតប្រជែងជួញដូរភាគហ៊ុន ដែលសុទ្ធសឹងបានទទួលប្រាក់ចំណេញខ្ពស់ពីការវិនិយោគក្នុងទីផ្សារក្មេងខ្ចីមួយនេះ។
វិនិយោគិនទាំង ៨ នាក់ដែលបានចូលរួមការប្រកួតប្រជែងរយៈពេល ៣ ខែសុទ្ធសឹងទទួលបានប្រាក់ចំណេញខ្ពស់ពីការជួញដូរហ៊ុនដែលប្រាក់ចំណេញមានចន្លោះពី ៨៥ ភាគរយ ដល់ ២៤៧ ភាគរយ។
ការប្រកួតប្រជែងតម្រូវឲ្យអ្នកចូលរួមត្រូវមានទុនជួញដូរអប្បបរមា ១០០ ដុល្លារ សម្រាប់រយៈពេលចាប់ពីថ្ងៃទី ៣០ ខែតុលា ដល់ថ្ងៃទី ១៨ ខែមករា ឆ្នាំ ២០១៩។
លោក ទៀង ឆ្នើម ដែលជាពេទ្យធ្មេញជាជើងឯកនៅក្នុងការប្រកួតប្រជែងនេះ ដែលទទួលរង្វាន់ ៨ លានរៀល (២ ០០០ដុល្លារ) ជាសាច់ប្រាក់សុទ្ធ។ លោកបានបង្កើនប្រាក់ចំណេញរបស់លោកពីការទិញលក់ភាគហ៊ុនរហូតដល់ ២៤៧ ភាគរយ ក្នុងការប្រកួតប្រជែងរយៈពេល ៣ ខែ ដែលទឹកប្រាក់វិនិយោគរបស់លោកបានកើនឡើងពី ៤០០ ០០០ រៀល (១០០ ដុល្លារ) នៅថ្ងៃដំបូងនៃការប្រកួតប្រជែងនេះដល់ ១,៣៩ លានរៀល (៣៤៨ ដុល្លារ) នៅថ្ងៃប្រកួតប្រជែងចុងក្រោយ។
អ្នកស្រី សោម នី អ្នកឈ្នះលេខ ២ ខណៈប្រាក់ចំណេញរបស់អ្នកស្រីកើនឡើង ៩៤ ភាគរយពី ១,២៨ លានរៀលនៅថ្ងៃដំបូង ដល់ ២,៤៩ លានរៀលនៅថ្ងៃចុងក្រោយនៃការប្រកួតប្រជែងនេះ។ អ្នកឈ្នះ ៦ រូបផ្សេងទៀតបានទទួលបានប្រាក់ចំណេញកើនឡើងយ៉ាងហោចណាស់ ៨៥ ភាគរយ។
លោក ទៀង ឆ្នើម បានឲ្យដឹងកាលពីម្សិលមិញថា លោកចូលរួមក្នុងការប្រកួតប្រជែងនេះដោយធ្វើការទិញភាគហ៊ុនរបស់ក្រុមហ៊ុនរោងចក្រកាត់ដេរ Grand Twins International (GTI) ដោយទិញក្នុងតម្លៃ ៣ ៣០០រៀលប៉ុណ្ណោះក្នុង ១ ភាគហ៊ុន ហើយបន្ទាប់មកចាប់ផ្ដើមការជួញដូរភាគហ៊ុនផ្សេងទៀតនៅពេលមើលឃើញឱកាស។
លោកថ្លែងថា៖ «ខ្ញុំទិញ និងលក់ភាគហ៊ុនផ្សេងទៀត នៅពេលខ្ញុំឃើញមានឱកាសក្នុងការទទួលបានប្រាក់ចំណេញ»។ លោកបន្តថា៖ «ខ្ញុំចំណាយពេលវេលាក្នុងការពិនិត្យការប្រែប្រួលតម្លៃរបស់ភាគហ៊ុននីមួយៗ និងតាមដានភាគហ៊ុនមានសក្ដានុពលណាមួយដើម្បីជួញដូរ»។
ក្នុងអំឡុងការប្រកួតប្រជែងនេះ តម្លៃភាគហ៊ុនរបស់ GTI កើនឡើង ៦៦ ភាគរយពី ៣ ៣០០ រៀល ដល់ ៥ ៥០០ រៀល។ តម្លៃភាគហ៊ុនរបស់កំពង់ផែព្រះសីហនុ (PAS) កើនឡើង ៩៥ ភាគរយ ពី ៦ ៤០០ រៀល នៅថ្ងៃដំបូងនៃការប្រកួតប្រជែងដល់ ១២ ៥០០ រៀលនៅក្នុងថ្ងៃចុងក្រោយ ខណៈកំពង់ផែភ្នំពេញ (PPAP ) កើនឡើងពី ៦ ៤០០ រៀលក្នុង ១ ភាគហ៊ុន ដល់ ១១ ២០០ រៀលក្នុង ១ ភាគហ៊ុន។ តម្លៃភាគហ៊ុនរបស់ រដ្ឋាករទឹក (PWSA) កើនឡើង ៤០ ភាគរយ និងតំបន់សេដ្ឋកិច្ចពិសេសភ្នំពេញ (PPSP) កើនឡើង ១៣ ភាគរយ ក្នុងអំឡុងការប្រកួតប្រជែងនេះ។
លោក Jong Weon-ha ប្រធានផ្នែកប្រតិបត្តិការរបស់ CSX បានឲ្យដឹងកាលពីម្សិលមិញថា រឿងរ៉ាវប្រកបដោយជោគជ័យរបស់អ្នកឈ្នះ ដែលទទួលបានប្រាក់ចំណេញខ្ពស់ពីការវិនិយោគរបស់ពួកគេ ឆ្លុះបញ្ចាំងពីសារៈសំខាន់ និងសក្ដានុពលកំណើននៃផ្សារមូលបត្រកម្ពុជា។
លោកថ្លែងថា៖ «នៅក្នុងប្រទេស កម្ពុជា ប្រជាជនជាច្រើនកំណត់ទិសដៅក្នុងការវិនិយោគខាងអចលនទ្រព្យ ប៉ុន្តែលទ្ធផលបានពីការប្រកួតប្រជែង គឺជាភ័ស្ដុតាងដ៏រឹងមាំ ក្នុងការបង្ហាញថា វាមានសក្ដានុពលក្នុងការដាក់ការវិនិយោគរបស់ពួកគេនៅទីនេះ CSX ដើម្បីទទួលបានប្រាក់ចំណេញខ្ពស់»។
លោកថ្លែងថា៖ «នេះជាសញ្ញាវិជ្ជមានមួយ ដែលបង្ហាញកំណើនថ្មីមួយសម្រាប់ផ្សារហ៊ុនរបស់កម្ពុជាក្នុងការបន្តទាក់ទាញចំណាប់អារម្មណ៍បន្ថែមទៀតពីក្រុមវិនិយោគិន»៕LA