ភ្នំពេញៈ ផ្សារមូលបត្រកម្ពុជា (CSX) នឹងដាក់ឲ្យដំណើរការសាកល្បងនូវប្រព័ន្ធជួញដូរចល័ត (MTS) តាមអនឡាញដែលអនុញ្ញាតឲ្យក្រុមវិនិយោគិនជួញដូរមូលបត្រដែលចុះបញ្ជីនៅផ្សារហ៊ុនដោយប្រើប្រាស់ស្មាតហ្វូន និងឧបករណ៍ចល័តផ្សេងទៀត។ នេះបើតាមសេចក្តីប្រកាសរបស់ផ្សារហ៊ុន។
ប្រព័ន្ធជួញដូរនេះនឹងដាក់ឲ្យដំណើរការនៅថ្ងៃទី ២៥ ខែមិថុនាហើយដើម្បីប្រើប្រាស់ប្រព័ន្ធនេះ វិនិយោគិនត្រូវមានគណនីជួញដូរនៅក្រុមហ៊ុនមូលបត្រណាមួយដែលជាសមាជិករបស់ CSX និងបានចុះឈ្មោះជាមួយ CSX។
ប្រព័ន្ធជួញដូរចល័តគឺជាប្រព័ន្ធជួញដូរតាមអ៊ីនធឺណិតដែលត្រូវបានអភិវឌ្ឍឡើងក្រោមការជួយគាំទ្រពីសំណាក់ភ្នាក់ងារសហប្រតិបត្តិការអន្តរជាតិកូរ៉េ ដោយដំណើរការនៅលើ browser ដែលមានស្រាប់នៅលើស្មាតហ្វូន និង Tablet។
ប្រព័ន្ធនេះនឹងអនុញ្ញាតឲ្យវិនិយោគិនដាក់ការបញ្ជាជួញដូរ កែប្រែ និងលុបចោលការបញ្ជារបស់ខ្លួនបានដោយខ្លួនឯង។
លោក ល្មុន សូឡី ប្រធាននាយកដ្ឋានប្រតិបត្តិការទីផ្សារនៃក្រុមហ៊ុនមូលបត្រកម្ពុជាឲ្យដឹងថា MTS គឺជាប្រព័ន្ធថ្មីសម្រាប់ក្រុមវិនិយោគិនប្រើប្រាស់ចូលទៅក្នុងទីផ្សារមូលបត្រដោយផ្ទាល់នូវប្រព័ន្ធដំណើរការលើអ៊ីនធឺណិត។
លោកថ្លែងថា៖ «ជាមួយប្រព័ន្ធថ្មីនេះ ក្រុមវិនិយោគិនអាចចូលទៅក្នុងទីផ្សារមូលបត្របានភ្លាមៗនៅគ្រប់កន្លែង និងគ្រប់ពេលនៅពេលដែលពួកគេមានសេវាអ៊ីនធឺណិត ពួកគេមិនចាំបាច់ «ឆ្លងកាត់តាម» ក្រុមហ៊ុនកម្រៃជើងសារនោះទេ»។
លោកបន្តថា៖ «ក្រុមវិនិយោគិនអាចតាមដានព័ត៌មានយ៉ាងដិតដល់នៅក្នុងផ្សារហ៊ុននេះ»។
លោក ល្មុន សូឡី បន្ថែមថានៅពេលនេះវានៅក្នុងដៃរបស់ពួកគេ ការទិញ ឬការលក់ ភាគហ៊ុនភ្លាមៗពេលឱកាសកើនឡើង ដើម្បីរកប្រាក់ចំណេញនៅក្នុងអំឡុងពេលខ្លី។
យោងតាមសេចក្តីប្រកាសព័ត៌មានប្រព័ន្ធនេះនឹងដាក់ឲ្យប្រើប្រាស់ដោយឥតគិតថ្លៃនៅក្នុងអំឡុងពេលនៃការដាក់ឲ្យដំណើរការបឋមនេះ ហើយនឹងត្រូវបន្តរយៈពេល ១ ឆ្នាំទៀត បន្ទាប់ពីការប្រកាសដាក់ដំណើរការជាផ្លូវការដែលនឹងប្រកាសនៅពេលក្រោយ។
លោកស្រី យឹម រ៉ាដែន ប្រធានប្រតិបត្តិការនៅក្រុមហ៊ុនមូលបត្រ Yuanta Securities បានឲ្យដឹងកាលពីម្សិលមិញថា ការប្រើប្រាស់ប្រព័ន្ធ MTS គឺជាព្រឹត្តិការណ៍ដ៏សំខាន់ផ្សេងទៀតសម្រាប់ផ្សារមូលធនកម្ពុជា។ វានឹងដាក់ប្រទេសកម្ពុជាក្នុងកម្រិតស្រដៀងគ្នានឹងផ្សារមូលធនផ្សេងទៀតនៅក្នុងបណ្ដាប្រទេសផ្សេងទៀត។
លោកស្រីថ្លែងថា៖ «វាត្រូវបានរំពឹងផងដែរថានឹងជួយបង្កើនសាច់ប្រាក់ងាយស្រួលផ្នែកទីផ្សារដែលទាក់ទាញក្រុមវិនិយោគិនកាន់តែច្រើនហើយទីបំផុតលើកទឹកចិត្តក្រុមហ៊ុនកាន់តែច្រើនឲ្យចុះបញ្ជីនៅផ្សារហ៊ុននេះ»។
លោកស្រីបន្តថា៖ «ប្រព័ន្ធនេះនឹងជួយផ្សារមូលបត្រយ៉ាងខ្លាំង។ ក្នុងចំណោមក្រុមហ៊ុនផ្សេងទៀតវានឹងជួយដាក់ការបញ្ជាទិញ និងអនុវត្តដោយស្វ័យប្រវត្តិដែលនឹងកាត់បន្ថយកម្លាំងមនុស្ស កែលម្អការងារប្រកបដោយប្រសិទ្ធភាព បង្កើនល្បឿនការប្រតិបត្តិការ»៕LA