ភ្នំពេញៈ តំណាងផ្សារមូលបត្រកម្ពុជា (CSX) កាលពីម្សិលមិញបានចុះកិច្ចសហការជាមួយក្រុមហ៊ុនក្នុងស្រុកដែលជំនាញផ្នែកបណ្តុះបណ្តាល និងអភិវឌ្ឍន៍ភាពជាសហគ្រិននៅកម្ពុជាក្នុងគោលដៅសហការបង្កើនការយល់ដឹងរបស់ពាណិជ្ជករខ្នាតតូចអំពីចំណេះដឹងផ្នែកហិរញ្ញវត្ថុ និងលទ្ធភាពទទួលបានប្រភពទុនពីផ្សារភាគហ៊ុន។
CSX បានចុះអនុស្សរណៈនៃការយោគយល់គ្នានេះជាមួយក្រុមហ៊ុន Successco ដែលជាស្ថាប័នទើបបង្កើតឡើងនៅចុងឆ្នាំ ២០១៧ ដើម្បីផ្តល់ការបណ្តុះបណ្តាលគំនិតអាជីវកម្មដល់ម្ចាស់អាជីវកម្មខ្នាតតូចនៅកម្ពុជា។ មកទល់ពេលនេះ Successco មានសមាជិក ៥០ នាក់ជាសហគ្រិន។
លោក ហុង សុខហួរ អគ្គនាយក CSX បានស្វាគមន៍កិច្ចព្រមព្រៀងនេះថាជាឱកាសមួយក្នុងការពង្រីកជម្រើសហិរញ្ញវត្ថុសម្រាប់សហគ្រាសធុនតូច និងមធ្យម (SME) របស់កម្ពុជា។
លោកថ្លែងថា៖ «នៅក្នុងប្រទេសកម្ពុជាមានប្រជាជនជាច្រើនដែលបានដំណើរការអាជីវកម្មល្អ និងមានគំនិតអាជីវកម្មល្អ ប៉ុន្តែពួកគេមិនអាចរីកចម្រើនទៅដល់សក្ដានុពលពេញលេញបានទេ ដោយសារកង្វះយុទ្ធសាស្ដ្រហិរញ្ញវត្ថុ»។ លោកបានបន្តថា៖ «យើងសង្ឃឹមថា កិច្ចសហប្រតិបត្តិការនេះនឹងផ្ដល់ការរួមចំណែកដ៏ធំក្នុងការបង្កើនកំណើនបន្ថែមទៀតរបស់សហគ្រិនកម្ពុជា»។
កិច្ចព្រមព្រៀងនេះគឺជាជំហានដំបូងសម្រាប់ CSX ហើយផ្សារហ៊ុននេះគ្រោងនឹងចុះហត្ថលេខាលើ MoU ផ្សេងទៀតជាមួយនឹងអគ្គនាយកក្រុមហ៊ុន Master Club ជាក្រុមហ៊ុនមួយដែលផ្ដល់ការបណ្ដុះបណ្ដាលអាជីវកម្ម និងបណ្ដាញដល់អ្នកគ្រប់គ្រង និងម្ចាស់ក្រុមហ៊ុនធុនតូច។
លោក ស៊ីម តារា អគ្គនាយកក្រុមហ៊ុន Successco បានថ្លែងថា យុទ្ធសាស្ដ្រហិរញ្ញវត្ថុដែលសហគ្រិនកម្ពុជាអាចទទួលបានមូលនិធិពីក្រុមហ៊ុនផ្សេងទៀតតាមរយៈផ្សារហ៊ុនគឺជាគំនិតផ្ដួចផ្ដើមដ៏ល្អដែលសហគ្រិនកម្ពុជាត្រូវតែយល់ដឹង។
លោកបន្ថែមថា សហគ្រិនជាច្រើនតែងតែផ្ដោតភាគច្រើនលើយុទ្ធសាស្ដ្រទីផ្សារ ប៉ុន្តែមិនមែនយុទ្ធសាស្ដ្រហិរញ្ញវត្ថុនោះទេ ដែលបានរារាំងដល់សក្ដានុពលកំណើន។
លោកថ្លែងថា៖ «យើងត្រូវតែដឹងថា យុទ្ធសាស្ដ្រទីផ្សារ និងហិរញ្ញវត្ថុចាំបាច់ត្រូវធ្វើស្របគ្នាដើម្បីបង្កើនកំណើនអាជីវកម្ម»។ លោកបន្ថែមថា ការទទួលបានកិច្ចសហការជាមួយ CSX ដើម្បីបង្កើនការយល់ដឹងរបស់សហគ្រិនស្ដីពីនីតិវិធីក្នុងការទទួលបានមូលនិធិតាមរយៈផ្សារហ៊ុននឹងមានប្រយោជន៍។
CSX បានជម្នះក្នុងការទាក់ទាញការចុះបញ្ជី ជាពិសេសពី SME។ កាលពីចុងឆ្នាំ ២០១៥ ផ្សារហ៊ុននេះបានបង្កើតទីផ្សារកំណើន ដើម្បីស្វែងរកការទាក់ទាញការចុះបញ្ជីរបស់ SME ដោយការបន្ទាបតម្រូវការទុនពី ៧,៥ លានដុល្លារមកនៅត្រឹម ៥០ ម៉ឺនដុល្លារ និងកាត់បន្ថយតម្រូវការរបាយការណ៍ហិរញ្ញវត្ថុដែលធ្វើសវនកម្មរួច។ វិធានការនេះមិនទាន់ទាក់ទាញក្រុមហ៊ុនមួយនៅឡើយទេ៕ LA