ភ្នំពេញៈ ក្រុមហ៊ុន Danaco ដែលចុះបញ្ជីនៅផ្សារហ៊ុនប្រទេសអូស្ត្រាលីបានឲ្យដឹងថា ក្រុមហ៊ុនរំពឹងថានឹងត្រូវចំណាយប្រាក់ពី ៨០ ម៉ឺនទៅ ៩០ ម៉ឺនដុល្លារក្នុង ១ ខែដើម្បីថែរក្សាទ្រព្យសម្បត្តិក្នុងកាស៊ីណូ និងការចំណាយប្រតិបត្តិការផ្សេងទៀតរបស់ក្រុមហ៊ុន បន្ទាប់ពីកាស៊ីណូខ្លួនចំនួន ១ កន្លែងនៅក្នុងប្រទេសកម្ពុជា និង ១ កន្លែងទៀតក្នុងប្រទេសវៀតណាមត្រូវបានផ្អាកដំណើរការបណ្តោះអាសន្នដោយសារការរីករាលដាលជំងឺកូវីដ១៩។
រដ្ឋាភិបាលកម្ពុជាបានប្រកាសផ្អាកជាបណ្តោះអាសន្ននៃដំណើរការកាស៊ីណូនៅទូទាំងប្រទេសដែលបានចូលជាធរមានចាប់តាំងពីថ្ងៃទី ១ ខែមេសា រហូតដល់មានសេចក្តីជូនដំណឹងជាថ្មី ខណៈរដ្ឋាភិបាលវៀតណាមក៏បានប្រកាសឲ្យផ្អាកប្រតិបត្តិការចាប់ពីខែមេសារយៈពេល ១៥ ថ្ងៃ។
បច្ចុប្បន្ន Danaco បានដំណើរការ Star Vegas Resort នៅក្រុងប៉ោយប៉ែត ខេត្តបន្ទាយមានជ័យ និងសណ្ឋាគារ Aristo International Hotel នៅ Lao Cai ប្រទេសវៀតណាម។
Danaco បានសរសេរក្នុងឯកសារដែលផ្ញើទៅកាន់ផ្សារហ៊ុនអូស្ត្រាលីកាលពីថ្ងៃអង្គារថា «ការផ្អាកសកម្មភាពបណ្តោះអាសន្ននេះបានធ្វើឡើងបន្ទាប់ពីការប្រកាសរបស់រដ្ឋាភិបាលកម្ពុជាដែលបានបញ្ជាឲ្យបិទកាស៊ីណូទាំងអស់ចាប់ពីថ្ងៃទី ១ ខែមេសា ឆ្នាំ ២០២០ ស្របគ្នាជាមួយនឹងវិធានការរបស់រដ្ឋាភិបាលវៀតណាមក្នុងការបិទកាស៊ីណូទាំងអស់ជាបណ្តោះអាសន្នក្នុងរយៈពេល ១៥ ថ្ងៃចាប់ពីថ្ងៃទី ១ ខែមេសា ឆ្នាំ ២០២០។
ដោយសារការបិទកាស៊ីណូបណ្តោះអាសន្ននឹងជះឥទ្ធិពលអវិជ្ជមានដល់ក្រុមហ៊ុន ហេតុនេះក្រុមហ៊ុនកំពុងចាត់វិធានការជាច្រើនក្នុងការកាត់បន្ថយថ្លៃដើម ដើម្បីធានានិរន្តរភាពទៅពេលអនាគត។ វិធានការទាក់ទងនឹងបុគ្គលិកមានដូចជា ការកាត់បន្ថយប្រាក់ចំណាយតាមរយៈការដាក់ឲ្យបុគ្គលិកឈប់សម្រាក និងកាត់បន្ថយការចំណាយមិនចាំបាច់មួយចំនួនទៀត។
ក្រុមហ៊ុនអះអាងថានឹងផ្តោតលើការកាត់បន្ថយប្រតិបត្តិការ និងចំណាយមូលធន ខណៈគិតត្រឹមថ្ងៃទី ៣១ ខែមីនា ឆ្នាំ ២០២០ ក្រុមហ៊ុនមានសមតុល្យ ១១,៦ លានដុល្លារ។
លោក Mel Ashton ប្រធានក្រុមហ៊ុនបានថ្លែងថា៖ «ស្ថានភាពដែលយើងកំពុងប្រឈមនឹងជំងឺរាតត្បាតនេះគឺមិនធ្លាប់មានពីមុនឡើយ ហើយជាអកុសលយើងត្រូវចាត់វិធានការយ៉ាងម៉ឺងម៉ាត់ជាមួយបុគ្គលិករបស់យើងរួមទាំងការកាត់បន្ថយចំនួនបុគ្គលិក និងការកាត់បន្ថយប្រាក់ខែ។ ការធ្វើទាំងឡាយនេះ គឺដើម្បីធានាបាននូវស្ថានភាពហិរញ្ញវត្ថុនៅតែរឹងមាំនៅពេលដែលយើងកសាងក្រុម និងចាប់ផ្តើមប្រតិបត្តិការឡើងវិញ។ យើងនឹងបន្តតាមដានការវិវឌ្ឍ ហើយនឹងផ្តល់ព័ត៌មានថ្មីៗបន្ថែមទៀតនៅក្នុងពេលវេលាជាក់លាក់មួយនៅពេលដែលវិធានការកំពុងដំណើរការទៅមុខ»។
រយៈពេលនៃវិបត្ដិជំងឺកូវីដ១៩ និងរយៈពេលនៃការបិទកាស៊ីណូគឺពិតជាប៉ះពាល់ដល់តម្រូវការសម្រាប់ការចាក់មូលធន តែក្នុងករណីណាក៏ដោយក្រុមប្រឹក្សាភិបាលក្រុមហ៊ុននៅតែមានទំនុកចិត្តក្នុងការរក្សាអាជីវកម្មក្នុងអំឡុងពេលបិទទ្វារនេះ។ នេះបើតាមការអះអាងរបស់ក្រុមហ៊ុន។
យោងតាមទិន្នន័យក្រសួងសេដ្ឋកិច្ច និងហិរញ្ញវត្ថុគិតត្រឹមខែមិថុនា ឆ្នាំ ២០១៩ កម្ពុជាបានផ្តល់អាជ្ញាប័ណ្ណកាស៊ីណូចំនួន ១៦៣ កន្លែងក្នុងនោះ ៩១ ទីតាំងស្ថិតនៅក្នុងខេត្តព្រះសីហនុ និងផ្សេងទៀតភាគច្រើនស្ថិតនៅជាប់ព្រំដែនវៀតណាម និងថៃ៕