.jpg)
ក្រុងញូវយ៉កៈ ក្រុមហ៊ុន Dell Technologies កាលពីថ្ងៃអង្គារបានប្រកាសកិច្ចព្រមព្រៀងលក់ក្រុមហ៊ុនសន្ដិសុខអ៊ីនធឺណិត RSA ក្នុងតម្លៃ ២,០៨ ពាន់លានដុល្លារទៅឲ្យក្រុមហ៊ុនដៃគូមួយដែលដឹកនាំដោយក្រុមហ៊ុន Symphony Technology Group។
RSA គឺជាក្រុមហ៊ុនមានឯកទេសខាងការពារប្រព័ន្ធកុំព្យូទ័រ និងដំណើរការសន្ដិសុខអ៊ីនធឺណិត។
កិច្ចព្រមព្រៀងនេះត្រូវបានរំពឹងថា នឹងសម្រេចឲ្យបានត្រឹមចុងឆ្នាំនេះ។ ក្រុមហ៊ុននេះរួមបញ្ចូលទាំងក្រុមប្រឹក្សាផែនការសោធននិវត្តន៍របស់គ្រូ និងក្រុមហ៊ុន Alpinvest Partners។
លោក William Chisholm ដៃគូគ្រប់គ្រងក្រុមហ៊ុន Symphony បានឲ្យដឹងក្នុងសេចក្ដីប្រកាសព័ត៌មានរួមមួយថា៖ «ក្នុងនាមជាម៉ាកយីហោសន្ដិសុខឈានមុខគេរបស់ពិភពលោក ក្រុមហ៊ុន RSA គឺជាតំណាងដ៏ល្អបំផុតមួយសម្រាប់ការដោះស្រាយបញ្ហាប្រឈមនានារបស់អតិថិជនដែលកំពុងមានការអភិវឌ្ឍទៅមុខយ៉ាងរហ័សរួមជាមួយនឹងការផ្លាស់ប្តូរបែបឌីជីថល»។
ក្រុមហ៊ុន RSA មានអតិថិជនជាង ១២ ៥០០ នាក់ ហើយសន្និសីទសំខាន់ៗរបស់ខ្លួនត្រូវបានផ្សព្វផ្សាយថា ជាសន្និសីទឈានមុខគេក្នុងឧស្សាហកម្មសន្ដិសុខអ៊ីនធឺណិត។ នេះបើយោងតាមក្រុមហ៊ុន Dell។
លោក Jeff Clarke ប្រធានផ្នែកប្រតិបត្តិការនៅក្រុមហ៊ុន Dell Technologies បានថ្លែងថា៖ «ប្រតិបត្តិការនឹងកាន់តែងាយស្រួលបន្ថែមទៀតដល់អាជីវកម្ម និងផលបត្រផលិតផលរបស់យើង»។
លោកបន្តថា៖ «វាក៏អាចឲ្យក្រុមហ៊ុន Dell Technologies ផ្ដោតលើយុទ្ធសាស្ដ្ររបស់យើងក្នុងការបង្កើតសន្ដិសុខស្វ័យប្រវត្តិកម្ម និងវៃឆ្លាតទៅក្នុងហេដ្ឋារចនាសម្ព័ន្ធ គេហទំព័រ និងឧបករណ៍នានា ដើម្បីរក្សាសុវត្ថិភាពទិន្នន័យ ការពារ និងភាពរឹងមាំផងដែរ»។
បង្កើតឡើងនៅក្នុងឆ្នាំ ១៩៨២ ក្រុមហ៊ុន RSA បានបង្កើតនូវប្រព័ន្ធកូដសម្ងាត់មួយ។ ក្រុមហ៊ុនអាមេរិកមួយនេះត្រូវបានទិញកាលពីឆ្នាំ ២០០៦ ក្នុងតម្លៃប្រហែល ២,១ ពាន់លានដុល្លារដោយក្រុមហ៊ុន EMC ហើយដែលត្រូវបានទិញក្នុងរយៈពេល ១ ទសវត្សរ៍ក្រោយដោយក្រុមហ៊ុន Dell ក្នុងតម្លៃ ៦៧ ពាន់លានដុល្លារ៕LA
