ភ្នំពេញ: ធនាគារ DGB Daegu Bank របស់កូរ៉េខាងត្បូងបានរាយការណ៍ថា ខ្លួនទទួលបានការផ្ដល់អាជ្ញាប័ណ្ណពីធនាគារជាតិនៃកម្ពុជា (NBC) ដើម្បីប្រែក្លាយពីធនាគារឯកទេសទៅធនាគារពាណិជ្ជសម្រាប់ការពង្រីកអាជីវកម្មធនាគាររបស់ខ្លួនពេញលេញហើយនៅកម្ពុជា។
យោងតាម Yonhap News Agency ជាទីភ្នាក់ងារព័ត៌មានរបស់ប្រទេសកូរ៉េខាងត្បូងដែលបានរាយការណ៍កាលពីថ្ងៃទី ៨ ខែតុលាថា ធនាគារឯកទេស DGB ដែលជាក្រុមហ៊ុនបុត្រសម្ព័ន្ធគ្រប់គ្រងទាំងស្រុងរបស់ធនាគារ DGB Daegu Bank បានទទួលការយល់ព្រមពីអាជ្ញាធរកម្ពុជាក្នុងការប្រតិបត្តិការជាធនាគារពាណិជ្ជនៅក្នុងប្រទេសអាស៊ីអាគ្នេយ៍មួយនេះកាលពីថ្ងៃទី ៣០ ខែកញ្ញា។
មន្ដ្រី ១ រូបនៅធនាគារ DGB Daegu Bank ត្រូវដកស្រង់សម្ដីថា៖ «បច្ចុប្បន្ន ធនាគារ DGB Specialized Bank ត្រូវបានអនុញ្ញាតឱ្យពង្រីកកម្ចីដល់ប្រជាជនកម្ពុជា។ ធនាគារ DGB នឹងគ្រប់គ្រងលើប្រតិបត្តិការសម្រាប់ប្រាក់បញ្ញើ ការចេញកាតឥណទានប្តូរប្រាក់បរទេស និងធនាគារអនឡាញនៅឆមាសទី ១ ឆ្នាំ ២០២១»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជាបានឱ្យដឹងថា ការប្រែក្លាយរបស់ធនាគារ DGB ទៅជាធនាគារពាណិជ្ជគឺជាសញ្ញាមួយនៃការរីកចម្រើនរបស់ឧស្សាហកម្មធនាគារនៅក្នុងប្រទេសកម្ពុជា និងលំហូរចូលនៃបច្ចេកវិទ្យាធនាគាររបស់ប្រទេសកូរ៉េមកប្រទេសកម្ពុជា។
លោកថា៖ «បច្ចុប្បន្នធនាគារ ពាណិជ្ជរបស់ប្រទេសកូរ៉េជាច្រើនកំពុងមានវត្តមាននៅក្នុងប្រទេសកម្ពុជា ដូចជាធនាគារ PPCB ធនាគារ Shinhan Bank ធនាគារ Kookmin Bank ។ល។ DGB គឺជាធនាគារមានការប្រកួតប្រជែង និងល្បីឈ្មោះយ៉ាងខ្លាំង។ ធនាគារ DGB Bank នឹងផ្ដល់ដល់ប្រជាជនកម្ពុជានូវបទពិសោធថ្មី ១ នៃការផ្ដល់ជូនភាពប្រកួតប្រជែងប្រកបដោយស្ដង់ដារបស់ធនាគាររបស់ប្រទេសកូរ៉េ»។
កាលពីសប្ដាហ៍មុន កម្ពុជា និងកូរ៉េខាងត្បូងបានបញ្ចប់ការចរចាកិច្ចព្រមព្រៀងពាណិជ្ជកម្មសេរី (FTA) ជុំទី ៣ ប្រកបដោយផ្លែផ្កា ដែលត្រូវបានរំពឹងថានឹងជំរុញពាណិជ្ជកម្ម និងការវិនិយោគទ្វេភាគី នៅពេលកិច្ចព្រមព្រៀងនេះចូលជាធរមាន។
លោក Ha បានឱ្យដឹងថា FTA នេះ នឹងធ្វើឱ្យតម្លៃពាណិជ្ជកម្មរបស់ប្រទេសទាំង ២ កាន់តែធំឡើង ហើយនិងមានលំហូរចូលការវិនិយោគជាច្រើនរវាងប្រទេសទាំង ២ ដោយសារតែអត្ថប្រយោជន៍នៃការប្រកួតប្រជែង។ លោកបញ្ជាក់ថា ជាឧទាហរណ៍រោងចក្ររបស់ប្រទេសកូរ៉េកាន់តែច្រើននឹងមានបំណងក្នុងការបង្កើតនៅក្នុងប្រទេសកម្ពុជា ដោយសារតែតម្លៃពលកម្មទាប និងមិនមានពន្ធនាំចេញទៅកូរ៉េ។
លោកថ្លែងថា៖ «កិច្ចព្រមព្រៀងពាណិជ្ជកម្មសេរីនឹងនាំយកការអភិវឌ្ឍនជាច្រើនទៅកាន់ប្រទេសទាំង ២ ជាពិសេសប្រទេសកម្ពុជា។ អតិថិជនរបស់ប្រទេសទាំង ២ ក៏នឹងទទួលបានអត្ថប្រយោជន៍ពីកិច្ចព្រមព្រៀងនេះផងដែរ។ ផលិតផលកូរ៉េដែលមានគុណភាពខ្ពស់នឹងមានតម្លៃកាន់តែទាប និងគួរឱ្យទាក់ទាញចំពោះកម្ពុជា ម្យ៉ាងវិញទៀតផលិតផលកសិកម្មរបស់ប្រទេសកម្ពុជាអាចពង្រីកទៅទីផ្សារនៅក្នុងប្រទេសកូរ៉េកាន់តែងាយស្រួល»។
គួរបញ្ជាក់ថា កាលពីឆ្នាំ ២០១៨ ធនាគារ DGB Daegu Bank បានទិញភាគហ៊ុន ១០០ ភាគរយនៅក្នុងធនាគារពាណិជ្ជ CamCapital Specialized Bank ដែលក្រោយមកត្រូវបានប្តូរឈ្មោះទៅជាធនាគារ DGB Specialized Bank ៕LA