.jpg)
ពិធីបើកមជ្ឈមណ្ឌលចែកចាយថ្មីរបស់ក្រុមហ៊ុន DKSH នៅបាត់ដំបង។ ហ្វេសប៊ុក
ភ្នំពេញៈ DKSH ជាក្រុមហ៊ុនចុះបញ្ជីនៅប្រទេស ស្វ៊ីស ដែលផ្ដល់សេវាការពង្រីកទីផ្សារឈានមុខគេ បានបើកមជ្ឈមណ្ឌលចែកចាយថ្មីទំហំ ១ ៦០០ ម៉ែត្រការ៉េ នៅខេត្តបាត់ដំបង ដើម្បីពង្រីកទីតាំងឈរជើងរបស់ខ្លួន នៅក្នុងប្រទេស កម្ពុជា។ នេះបើយោងតាមសេចក្ដីប្រកាសព័ត៌មានរបស់ក្រុមហ៊ុននេះកាលពីម្សិលមិញ។
DKSH Business Unit Consumer Goods បានឲ្យដឹងថា មជ្ឈមណ្ឌលទំនើបនេះ ដើរតួនាទីដ៏សំខាន់ក្នុងការផ្ដល់ការគាំទ្រសម្រាប់ការចែកចាយដំណាក់កាលដំបូង និងឡូជីស្ទីកដល់អតិថិជន និងការបម្រើសេវាតំបន់ពាយព្យរបស់ប្រទេសនេះ ជាមួយនឹងផលិតផលមានគុណភាពខ្ពស់។ ក្រុមហ៊ុនបានឲ្យដឹងថា៖ «មជ្ឈមណ្ឌលថ្មីនេះ នឹងត្រូវបានប្រើប្រាស់ជាមជ្ឈមណ្ឌលតំបន់ពាយព្យដើម្បីពង្រឹងបណ្ដាញចែកចាយដែលជាសរសៃឈាមតែមួយគត់នៅកម្ពុជា»។
មជ្ឈមណ្ឌលចែកចាយកាន់តែធំ និងកាន់តែទំនើបនេះ នឹងជំនួសមជ្ឈមណ្ឌលចាស់ ដែលកំពុងប្រតិបត្តិការនៅក្នុងសមត្ថភាពពេញទៅហើយ និងតំណាងឲ្យការបង្កើនសមត្ថភាពដ៏សំខាន់មួយនៅក្នុងហេដ្ឋារចនាសម្ព័ន្ធទំនិញប្រើប្រាស់នៅក្នុងប្រទេស កម្ពុជា របស់ក្រុមហ៊ុន DKSH។
ក្រុមហ៊ុននេះបន្តថា ជាមួយនឹងបុគ្គលិកជិត ១ ៨០០ នាក់ DKSH គឺជាអង្គការពាណិជ្ជកម្មឈានមុខគេរបស់ប្រទេស កម្ពុជា ហើយមជ្ឈមណ្ឌលចែកចាយត្រូវបានគ្រប់គ្រងដោយប្រព័ន្ធគ្រប់គ្រងឃ្លាំងទំនើបបំផុត និងត្រូវតភ្ជាប់នឹងគេហទំព័រ SAP ពិភពលោករបស់ DKSH។
មជ្ឈមណ្ឌលចែកចាយថ្មីនៅក្នុងខេត្តបាត់ដំបងនេះ តភ្ជាប់ជាមួយនឹងមជ្ឈមណ្ឌលដំណាក់កាលដំបូងរបស់ក្រុមហ៊ុន DKSH នៅភ្នំពេញ ដែលបានបើកដំណើរការកាលពីឆ្នាំ ២០១៥ និងសៀមរាប កាលពីឆ្នាំ ២០១៧។
លោកប្រធានផ្នែកគ្រប់គ្រងប្រចាំប្រទេស និងជាអនុប្រធាន ក្រុមហ៊ុន Business Unit Consumer Goods ក្រុមហ៊ុន DKSH Cambodia និងប្រទេស ឡាវ បានឲ្យដឹងថា ជាមួយនឹងប្រជាជនមានប្រាក់ចំណូលមធ្យមកើនឡើងរហ័ស ដែលត្រូវការផលិតផលមានគុណភាពខ្ពស់កម្ពុជា គឺជាទីផ្សារកំណើនរបស់តំបន់នេះ។
លោកថ្លែងថា៖ «យើងបង្កើតបទពិសោធជាង ៦០ ឆ្នាំ នៅក្នុងប្រទេស កម្ពុជា និងការគ្រប់គ្រងបណ្ដាញក្នុងតំបន់ដ៏រឹងមាំមួយ។ ការបើកមជ្ឈមណ្ឌលមួយនៅខេត្តបាត់ដំបង មានន័យថា យើងបានពង្រឹងវត្តមានរបស់យើងដ៏សំខាន់នៅភាគពាយព្យប្រទេស កម្ពុជា»។
DKSH គឺជាក្រុមហ៊ុនផ្ដល់សេវាពង្រីកទីផ្សារឈានមុខគេ ដោយផ្ដោតលើតំបន់អាស៊ី។ ក្រុមហ៊ុននេះជួយក្រុមហ៊ុន និងយីហោផ្សេងទៀត ឲ្យរីកចម្រើននៅក្នុងវិស័យទំនិញប្រើប្រាស់ ថែរក្សាសុខភាព ប្រតិបត្តិការសម្ភារ និងបច្ចេកវិទ្យា៕LA
