ភ្នំពេញៈ ក្រុមហ៊ុន Donaco International Limited បានប្រកាសទិញរមណីយដ្ឋាន និងក្លិប Star Vegas Resort តម្លៃ៣៦០លានដុល្លារអាមេរិកនៅក្រុងប៉ោយប៉ែត ដែលជាផ្នែកមួយនៃការពង្រីកអាជីវកម្មរបស់ខ្លួនក្នុងតំបន់អាស៊ីប៉ាស៊ីហ្វិក។
ការទិញនេះគ្រោងនឹងបញ្ចប់នៅខែមេសា ឆ្នាំ២០១៥។ នេះបើតាមការចេញផ្សាយនៅលើ ASX កាលពីថ្ងៃសុក្រ។
សេចក្ដីប្រកាសព័ត៌មានឲ្យដឹងថា៖ «ក្រុមហ៊ុន Donaco International Limited (ASX:DNA) (“Donaco”) មានសេចក្ដីរីករាយ ដែលបានប្រកាសថា ខ្លួនបានប្រតិបត្តិការលើកិច្ចព្រមព្រៀងទិញរួមគ្នាមួយជាមួយក្រុមហ៊ុន Star Vegas នៅក្រុងប៉ោយប៉ែតប្រទេសកម្ពុជា។ ការទិញនេះគ្រោងបញ្ចប់នៅខែមេសាឆ្នាំ២០១៥ ដែលស្ថិតក្រោមការបញ្ចប់វិធានការត្រួតពិនិត្យយ៉ាងល្អិតល្អន់»។
លោក Joey Lim នាយកគ្រប់គ្រង និងជាអគ្គនាយករបស់ក្រុមហ៊ុនបានថ្លែងនៅក្នុងសេចក្ដីប្រកាសព័ត៌មាននេះថា៖ «ក្រុមហ៊ុន Star Vegas ត្រូវបានបង្កើតឡើងបានយ៉ាងល្អហើយជាអាជីវកម្មដែលទទួលបានជោគជ័យខ្លាំង ជាមួយនឹងចំណែកទីផ្សារនិងចក្ខុវិស័យកំណើនល្អអស្ចារ្យគួរឲ្យចង់បាន។ រាល់ភាគីពាក់ព័ន្ធទាំងអស់នឹងទទួលបានអត្ថប្រយោជន៍ដ៏ធំពីការបង្កើនទំហំនិងវិសាលភាពរបស់ក្រុមហ៊ុននេះ និងការធ្វើពិពិធកម្មលើចរន្តប្រាក់ចំណូលរបស់យើង»។ លោកបន្តថា៖ «ការទិញយកនេះ គឺជាជំហានដ៏សំខាន់ឆ្ពោះទៅមុខនៅក្នុងយុទ្ធសាស្ដ្រពង្រីករបស់យើង»។
វិធានការនេះត្រូវបានគេមើលឃើញថាជាកិច្ចខិតខំប្រឹងប្រែងរបស់ក្រុមហ៊ុន Donaco International Ltd ផងដែរក្នុងការពង្រីកអតិថិជនមូលដ្ឋានរបស់ខ្លួនដោយសារភាពមិនច្បាស់លាស់ពីភាពតឹងតែងផ្នែកនយោបាយនៅក្នុងប្រទេសចិន និងវៀតណាម។
នៅក្នុងការធ្វើបទបង្ហាញរបស់លោកក្នុងកិច្ចប្រជុំប្រចាំឆ្នាំជាមួយភាគីពាក់ព័ន្ធកាលពីចុងឆ្នាំមុន លោក Joey Lim បានថ្លែងថា ភាពតានតឹងនៅប្រទេសចិន និងវៀតណាម បាល់ទាត់ពិភពលោក និងការរញ្ជួយដីនៅខេត្តយូណានក្នុងប្រទេសចិនបានធ្វើឲ្យអាជីវកម្មល្អបំផុតរបស់ខ្លួនគឺសណ្ឋាគារ Aristo International Hotel ទទួលបានប្រាក់ចំណូលទាបជាងការរំពឹងទុក។
លោកបន្តថា៖ «ការទិញនេះត្រូវបានគេរំពឹងថានឹងរកបានចំណូលកាន់តែខ្លាំង ហើយក៏បានផ្ដល់វិសាលភាព និងអត្ថប្រយោជន៍ពីការធ្វើពិពិធកម្មផងដែរ។ អតិថិជនមូលដ្ឋានមិនមែនពឹងលើជនជាតិចិននោះទេ»។ លោកបន្ថែមថា៖ «ការគ្រប់គ្រងគឺដឹងច្បាស់ពីការផ្លាស់ប្តូរដ៏មានសក្ដានុពលក្នុងប្រទេសវៀតណាមដែលអនុញ្ញាតឲ្យមានការលេងល្បែងក្នុងស្រុក។ ទោះបីជាការផ្លាស់ប្តូរនេះកើតឡើងក៏ដោយ ក៏វានឹងមិនមានផលប៉ះពាល់អវិជ្ជមានលើការទិញនេះដែរ»។
ក្រុមហ៊ុន Donaco International Ltd កំពុងប្រតិបត្តិការកាស៊ីណូប្រកបដោយជោគជ័យនៅព្រំដែនវៀតណាមភាគខាងជើងជាប់ខេត្តយូណាន ដែលសណ្ឋាគារ Aristo International Hotel បានចាប់ផ្ដើមដំណើរការពីខែឧសភា ឆ្នាំមុន។ ក្រុមហ៊ុននេះប្រតិបត្តិការអាជីវកម្ម និងគ្រប់គ្រងភាគហ៊ុន៩៥ភាគរយ នៅក្នុងការវិនិយោគរួមជាមួយរដ្ឋាភិបាលវៀតណាម។ បច្ចុប្បន្នក្រុមហ៊ុននេះបានពង្រីកជារមណីយដ្ឋានថ្នាក់ផ្កាយប្រាំដែលមានសណ្ឋាគារមាន៤២៨បន្ទប់។
លោក រស់ ភារុណ អនុប្រធាននាយកដ្ឋានឧស្សាហកម្មហិរញ្ញវត្ថុរបស់ក្រសួងសេដ្ឋកិច្ច និងហិរញ្ញវត្ថុ ថ្លែងថា លោកមិនបានទទួលលិខិតទិញ Star Vegas Resort and Club ពីក្រុមហ៊ុន Donaco International Limited នៅឡើយទេ។
ប៉ុន្តែ លោក ភារុណ ថ្លែងថា ការទិញនេះទំនងជាជំរុញដោយផែនការពង្រីករបស់ក្រុមហ៊ុន Donaco International Limited។ លោកបញ្ជាក់ថា៖ «គឺជារឿងធម្មតាសម្រាប់វិនិយោគិនធំៗដែលអាចទិញអាជីវកម្មថ្មី ហើយអ្នកលក់ [ Star Vegas] នឹងចង់បានលក់អាជីវកម្មរបស់ពួកគេប្រសិនបើការទិញនេះធ្វើឲ្យពួកគេទទួលបានប្រាក់ចំណេញខ្ពស់»។
ប្រទេសកម្ពុជាមានកាស៊ីណូសរុបចំនួន៥៩។ កាស៊ីណូភាគច្រើនមានទីតាំងតាមព្រំដែន។ មានកាស៊ីណូ៧កំពុងប្រតិបត្តិការនៅក្នុងក្រុងប៉ោយប៉ែត។
លោកហូ វណ្ឌី សហប្រធានក្រុមការងារវិស័យទេសចរណ៍ឯកជនរដ្ឋាភិបាលបានថ្លែងថា ទេសចរវៀតណាម ថៃ ចិន និងកូរ៉េ ជាភ្ញៀវទេសចរដ៏សំខាន់សម្រាប់ឧស្សាហកម្មកាស៊ីណូនៅក្នុងប្រទេសកម្ពុជា។ លោកបន្តថា៖«ប្រជាជនវៀតណាម និងប្រជាជនចិនគឺជាភ្ញៀវទេសចរដ៏សំខាន់ចំពោះកាស៊ីណូកម្ពុជាជាប់ព្រំដែនវៀតណាមខណៈដែលភ្ញៀវទេសចរថៃគឺជាភ្ញៀវដ៏សំខាន់សម្រាប់កាស៊ីណូជាប់ព្រំដែនថៃ ចំណែកឯនៅទីក្រុងភ្នំពេញភ្ញៀវទៅលេងកាស៊ីណូគឺជាជនជាតិចិន វៀតណាម បន្ទាប់មកជនជាតិកូរ៉េ និងជនជាតិផ្សេងៗជាច្រើនទៀត»។
លោកបានថ្លែងថា កាស៊ីណូ ផលិតទេសចរដ៏មានសក្ដានុពលដែលអាចជំរុញដល់កំណើនភ្ញៀវទេចរបរទេស។ លោកបន្ថែមថា៖ «កាស៊ីណូកាន់តែច្រើនគឺជារឿងដ៏ល្អសម្រាប់ឧស្សាហកម្មទេសចរណ៍ ប៉ុន្តែវាចាំបាច់ត្រូវតែគ្រប់គ្រងឲ្យបានល្អ»៕PB
