The Phnom Penh Post Search

Search form




Logo of Phnom Penh Post newspaper Phnom Penh Post - DPL វិនិយោគ​លើ​ខ្សែ​បញ្ជូន​អគ្គិសនី

DPL វិនិយោគ​លើ​ខ្សែ​បញ្ជូន​អគ្គិសនី

សកម្មភាព​រាយ​បណ្តាញ​អគ្គិសនី​នៅ​ទីក្រុង​ភ្នំពេញ នា​ពេល​កន្លង​មក។
សកម្មភាព​រាយ​បណ្តាញ​អគ្គិសនី​នៅ​ទីក្រុង​ភ្នំពេញ នា​ពេល​កន្លង​មក។ ម៉ៃ វីរៈ

DPL វិនិយោគ​លើ​ខ្សែ​បញ្ជូន​អគ្គិសនី

ភ្នំពេញៈ ក្រុម​ហ៊ុន​ Diamond​ Power ​Limited ​(DPL) ដែល​ជា​ក្រុម​ហ៊ុន​បុត្រ​សម្ព័ន្ធ​របស់​​ Pestech International Bhd របស់​ម៉ាឡេស៊ី​នា​ដើម​សប្តាហ៍​នេះ​បាន​សម្រេច​កិច្ច​ព្រម​ព្រៀង​ជាមួយ​រដ្ឋាភិបាល​កម្ពុជា​ដើម្បី​ទទួល​សិទ្ធិ​សាង​សង់​គម្រោង​ខ្សែ​បញ្ជូន​អគ្គិសនី ២៣០​ គីឡូ​វ៉ុល​ដើម្បី​បញ្ជូន​អគ្គិសនី​ភ្ជាប់​ខេត្ត​កំពង់ចាម និង​ក្រចេះ​។

ក្រុមហ៊ុន Pestech ​International​ ដែល​មាន​ភាគ​ហ៊ុន​នៅ​ក្នុង​ក្រុម​ហ៊ុន​ DPL ៦០​ ភាគរយ​បាន​ឲ្យ​ដឹង​ថា​ក្រុម​ហ៊ុន​បាន​ចុះ​កិច្ច​សន្យា​ជា​មួយ​ក្រសួង​រ៉ែ​ និង​ថាមពល​កម្ពុជា​ និង​អគ្គិសនី​កម្ពុជា (EDC) ដើម្បី​ទទួល​សិទ្ធិ​បញ្ជូន​អគ្គិសនី​ពី​រោងចក្រ​វារីអគ្គិសនី​សេសាន​ក្រោម ២ នៅ​ខេត្ត​ស្ទឹងត្រែង ​ទៅ​ខេត្ត​ក្រចេះ​។ នេះ​បើ​យោង​តាម​សេចក្តី​ប្រកាស​ព័ត៌មាន​របស់​ក្រុម​ហ៊ុន​កាល​ពី​ថ្ងៃ ៨ មេសា​។

គម្រោង​នេះ​នឹង​សាងសង់​ឡើង​ក្រោម​កិច្ច​សហការ​ឯក​ជន​រដ្ឋ ក្រោម​ទម្រង់​ សាងសង់ ប្រតិបត្តិការ ​និង​ផ្ទេរ ​(BOT) ​ដែល​មាន​រយៈ​ពេល​ ២៥ ឆ្នាំ។

សេចក្តី​ប្រកាស​ព័ត៌មាន​បាន​ឲ្យ​ដឹង​ថា​៖ «​ក្រុម​ហ៊ុន​ DPL នា​ពេល​នេះ​បាន​សម្រេច​រាល់​លក្ខខណ្ឌ​ច្បាប់​សំខាន់ៗ ដែល​មាន​ន័យ​ថា​ក្រុម​ហ៊ុន​បាន​ក្លាយ​ជា​ម្ចាស់​នៃ​គម្រោង​នេះ»​។

គម្រោង​សាង​សង់​នេះ​គ្រោង​នឹង​ចាប់​ផ្តើម​អនុវត្ត​នៅ​ថ្ងៃ​ទី ៣០ វិច្ឋិកា​ ឆ្នាំ ២០១៧ ហើយ​ក្រុម​ហ៊ុន​ Pestech បាន​លើក​ឡើង​ថា​ គម្រោង​នេះ​អាច​នឹង​ចំណាយ​ទឹក​ប្រាក់​សរុប​ ៩២,២១ លាន​ដុល្លារ​។

នៅ​អំឡុង​រយៈ​ពេល​បី​ឆ្នាំ​ដំបូង​នៃ​ប្រតិបត្តិការ​អាជីវកម្ម (នៅ​ចុង​ឆ្នាំ ២០១៧​) ​អគ្គិសនី​កម្ពុជា​នឹង​បង់​ជូន​ក្រុម​ហ៊ុន​ DPL​ ១២,២៥ លាន​ដុល្លារ​ក្នុង​មួយ​ឆ្នាំ ហើយ​ចាប់​ពី​ឆ្នាំ ២០២០ តទៅ ក្រុមហ៊ុន DPL នឹង​បាន​ទទួល​ទឹក​ប្រាក់ ១៨,២២ លាន​ដុល្លារ​ក្នុង​មួយ​ឆ្នាំ​រហូត​ដល់​បញ្ចប់​គម្រោង​។

ភ្នំពេញ​ប៉ុស្តិ៍​ព្យាយាម​ទាក់​ទង​សុំ​ព័ត៌មាន​បន្ថែម​ពី​ក្រសួង​រ៉ែ និង​ថាមពល​ តែ​មិន​អាច​ទាក់​ទង​សុំ​ព័ត៌មាន​បាន​ពី​ម្សិលមិញ។

យ៉ាង​ណា​ក៏​ដោយ​ សេចក្តី​ប្រកាស​ព័ត៌មាន​របស់​ក្រុម​ហ៊ុន​ Pestech បាន​ឲ្យ​ដឹង​ថា​ក្រុមហ៊ុន​ពិត​ជា​មាន​ទំនុក​ចិត្ត​ចំពោះ​គម្រោង​វិនិយោគ​នេះ​ ហើយ​មិន​មាន​ការ​ព្រួយ​បារម្ភ​ពី​ហានិភ័យ​អី​ធំ​ដំ​ឡើយ​ លើក​លែង​តែ​បញ្ហា​ប្រឈម​ធម្មតា​នា​នា​ក្នុង​ប្រតិបត្តិការ​អាជិវកម្ម។

សេចក្តី​ប្រកាស​ព័ត៌មាន​បាន​លើក​ឡើង​ថា៖ «​ក្រុម​ហ៊ុន​នឹង​ព្យាយាម​ធ្វើ​សកមុ្ម​ភាព​សំខាន់ៗ​នានា​ដើម្បី​កាត់​បន្ថយ​ហានិភ័យ​ដែល​អាច​កើត​មាន​ប្រសិន​មាន​កើត​ឡើង»៕ PB

អត្ថបទគួរចាប់អារម្មណ៍