.jpg)
ហ្វ្រេងហ្វឺតៈ ការអង្កេតរបស់ធនាគារកណ្ដាលអឺរ៉ុប (ECB) បានបង្ហាញកាលពីថ្ងៃអង្គារថា ប្រទេសក្នុងតំបន់ចាយប្រាក់អឺរ៉ូទទួលបានឥណទានកាន់តែងាយស្រួលនៅត្រីមាសទី ១ ដោយសារតែធនាគារជាច្រើនបានបន្ធូរបន្ថយលក្ខខណ្ឌរបស់ពួកគេសម្រាប់ការផ្ដល់កម្ចីដល់ក្រុមហ៊ុន និងគ្រួសារ។
ធនាគារជាច្រើនបានប្រាប់ ECB ថា ស្ដង់ដារឥណទានជាលក្ខណវិនិច្ឆ័យដែលធនាគារប្រើប្រាស់ក្នុងការកំណត់ថាតើត្រូវផ្ដល់កម្ចីដល់បុគ្គល ឬក្រុមហ៊ុន ត្រូវបានបន្ធូរបន្ថយ «យ៉ាងខ្លាំង» នៅត្រីមាសទី ១ ទាំងសម្រាប់គ្រួសារដែលស្វែងរកកម្ចីទិញផ្ទះ និងសម្រាប់ក្រុមហ៊ុនជាមួយនឹងការបន្ធូរបន្ថយបន្តិចបន្តួចក្នុងកម្ចីសម្រាប់ការចំណាយរបស់អតិថិជន។
ធនាគារទាំងនោះបន្តថា៖ «ទន្ទឹមនឹងនេះរយៈពេល និងលក្ខខណ្ឌលើការសងកម្ចីនៅពេលពួកគេត្រូវបានផ្ដល់ត្រូវបានបន្ធូរបន្ថយនៅក្នុងប្រភេទទាំងអស់ ៣ ។
ECB បានរកឃើញថាធនាគារជាច្រើនបានរាយការណ៍កំណើនជាបន្តលើតម្រូវការពីអ្នកខ្ចីនៅត្រីមាសទី ១។
ក្រុមហ៊ុនបានស្វែងរកសាច់ប្រាក់នៅក្នុងអត្រាការប្រាក់ទាប ភាគច្រើនសម្រាប់ការវិនិយោគ ការច្របាច់បញ្ចូលគ្នា និងការទិញភាគហ៊ុនក្រុមហ៊ុន ខណៈអ្នកទិញផ្ទះបានទាក់ទាញដោយអត្រាការប្រាក់ទាបផងដែរមានទំនុកចិត្តកាន់តែខ្លាំងឡើងៗនៅក្នុងចក្ខុវិស័យសេដ្ឋកិច្ច ហើយសង្ឃឹមថានឹងបានប្រាក់ចំណេញពីកំណើនទីផ្សារលំនៅឋាន។
ECB បានកំណត់អត្រាការប្រាក់ក្នុងកម្រិតទាបជាប្រវត្តិសាស្ដ្រ និងបានចាក់បញ្ចូលសាច់ប្រាក់ជិត ២,៤ ពាន់ពាន់លានអឺរ៉ូ (២,៩ ពាន់ពាន់ដុល្លារ) នៅក្នុងសេដ្ឋកិច្ចតំបន់ចាយប្រាក់អឺរ៉ូតាមរយៈកម្មវិធី «ការចាក់បញ្ចូលសាច់ប្រាក់ក្នុងទីផ្សារ (QE)» របស់ខ្លួន ឬការទិញមូលបត្របំណុល។
គោលបំណងរបស់ខ្លួននឹងចាក់បញ្ចូលសាច់ប្រាក់តាមរយៈប្រព័ន្ធហិរញ្ញវត្ថុ និងនៅក្នុងការគ្រប់គ្រងរបស់ក្រុមហ៊ុន និងអតិថិជនដែលជំរុញកំណើន និងការបង្កើនអតិផរណាឆ្ពោះទៅរកទិសដៅកំណត់របស់ខ្លួនក្រោម ២ ភាគរយ។
ធនាគារទាំងនោះបានប្រាប់ ECB ថាផែនការ QE និងអត្រាការប្រាក់ទាបបានជំរុញការបន្ធូរបន្ថយរយៈពេល និងលក្ខខណ្ឌសម្រាប់ការសងកម្ចី និងផ្ដល់ឥទ្ធិពលដល់ពួកគេដើម្បីខ្ចីប្រាក់កាន់តែច្រើន។
ប្រធានធនាគារត្រូវបានរំពឹងថា នឹងរក្សាគោលនយោបាយទាំង ២ នៅដដែលនៅក្នុងកិច្ចប្រជុំមួយនៅថ្ងៃព្រហស្បតិ៍ ដោយសង្ឃឹមថាគោលនយោបាយទាំងនោះនឹងជួយការពារតំបន់ចាយប្រាក់អឺរ៉ូពីការជួយឧបសគ្គសេដ្ឋកិច្ចនៅពេលខាងមុខដូចជាការគំរាមកំហែងការគាំពារនិយម និងហានិភ័យដោយសារជម្លោះ។ ការអង្កេតនៅខែមេសាត្រូវបានធ្វើឡើងចន្លោះពីថ្ងៃទី ១៥ ខែមីនា និងថ្ងៃទី ៣ ខែមេសាដោយមានការឆ្លើយតបពីធនាគារចំនួន ១៤៩៕ LA
