ភ្នំពេញៈ រដ្ឋាភិបាលកម្ពុជានឹងផ្តោតអាទិភាពលើការអភិវឌ្ឍវិស័យថាមពលកកើតឡើងវិញ ជាជាងការផលិតថាមពលវារីអគ្គិសនី។ នេះបើតាមអគ្គនាយកអគ្គិសនីកម្ពុជា (EDC)។
វិស័យឯកជនបានសាទរ និងចាត់ទុកការវិនិយោគលើថាមពលសូឡាថានឹងធ្វើឲ្យវិស័យផលិតរបស់កម្ពុជាមានភាពប្រកួតប្រជែងកាន់តែខ្លាំង។
ថ្លែងក្នុងបទបង្ហាញស្តីពីចក្ខុវិស័យថាមពលឆ្នាំ ២០២០ របស់កម្ពុជាកាលពីថ្ងៃសុក្រលោក កែវ រតនៈ អគ្គនាយកអគ្គិសនីកម្ពុជាបានឲ្យដឹងថាកម្ពុជានឹងពង្រីកគម្រោងវិនិយោគលើថាមពលសូឡាឲ្យបាន ១២ ភាគរយត្រឹមដំណាច់ឆ្នាំ ២០២០ និង ២០ ភាគរយក្នុងរយៈពេល ៣ ឆ្នាំបន្ទាប់ទៀត។
លោកថ្លែងថាការទាញយកថាមពលអគ្គិសនីពីពន្លឺព្រះអាទិត្យឲ្យបានដល់ ២០ ភាគរយដើម្បីបំពេញតម្រូវការប្រើប្រាស់ក្នុងវិស័យឧស្សាហកម្ម និងពាណិជ្ជកម្ម ហើយថានឹងមិនមានការសាងសង់វារីអគ្គិសនីនៅទន្លេមេគង្គទេ។
លោកបន្តថា៖ «យើងចង់បង្កើតរោងចក្រថាមពលពន្លឺព្រះអាទិត្យឲ្យបានច្រើនកន្លែង យើងជឿថាថាមពលពន្លឺព្រះអាទិត្យនឹងផ្តល់តម្លៃទាប។ EDC មិនចង់ឃើញមានការសាងសង់វារីអគ្គិសនីនៅតាមទន្លេមេគង្គសម្រាប់ផលិតអគ្គិសនីទេ»។
លោកបន្ថែមថា៖ «ជាអគ្គនាយក EDC ខ្ញុំមិនចង់ឃើញទន្លេមេគង្គជាផ្នែកណាមួយនៃការបង្កើតវារីអគ្គិសនីទេ»។
តាមលោក កែវ រតនៈ នៅឆ្នាំ ២០២០ កម្ពុជានឹងអាចផលិតថាមពលអគ្គិសនីពីពន្លឺព្រះអាទិត្យបាន ៧០ ម៉ាហ្គាវ៉ាត់ក្នុងនោះ ១០ មេហ្គាវ៉ាត់ពីរោងចក្រផលិតថាមពលពីពន្លឺព្រះអាទិត្យនៅខេត្តស្វាយរៀង និង ៦០ មេហ្គាវ៉ាត់ទៀតពីរោងចក្រផលិតថាមពលពីពន្លឺព្រះអាទិត្យនៅស្រុកឧដុង្គ ខេត្តកំពង់ស្ពឺ។
លោក មូ សារិទ្ធ អគ្គលេខាធិការសហព័ន្ធស្រូវអង្ករកម្ពុជាបានឲ្យដឹងថា គម្រោងពង្រីករោងចក្រផលិតថាមពលអគ្គិសនីពីពន្លឺព្រះអាទិត្យនឹងអាចជួយកាត់បន្ថយការចំណាយលើថ្លៃអគ្គិសនីសម្រាប់ការពង្រីកផលិតកម្មនាំចេញរបស់កម្ពុជា។
លោកបញ្ជាក់ថា៖ «ខ្ញុំគិតថាវាល្អសម្រាប់វិស័យរោងម៉ាស៊ីនកិនស្រូវតម្លៃដើមក្នុងការផលិតកែច្នៃនាំចេញវាទាបជាងមុននាំឲ្យសក្តានុពលរបស់យើងអាចប្រកួតប្រជែងជាមួយប្រទេសគេ វាអាចជួយជំរុញការនាំចេញឲ្យកើនឡើង»។
តម្លៃអគ្គិសនីសម្រាប់ឧស្សាហកម្ម និងពាណិជ្ជកម្មមានតម្លៃចន្លោះពី ៦០០ រៀលទៅ ៨០០ រៀលក្នុង ១ គីឡូវ៉ាត់ម៉ោង។ លោក មូ សារិទ្ធ បន្ថែមថាវិស័យឯកជនចង់ឲ្យតម្លៃធ្លាក់មកនៅ ៤០០ រៀលទៅ ៥០០ រៀលក្នុង ១ គីឡូវ៉ាត់ម៉ោង។ លោកបន្តថារោងម៉ាស៊ីនកិនស្រូវធំៗរបស់សហព័ន្ធស្រូវអង្ករត្រូវចំណាយថ្លៃអគ្គិសនីជាមធ្យមចន្លោះពី ៥០ ០០០ ដុល្លារ ទៅ ១៥០ ០០០ ដុល្លារក្នុង ១ ខែ។
ថ្មីៗនេះរដ្ឋាភិបាលអនុម័តគម្រោងវិនិយោគសាងសង់ស្ថានីយថាមពលសូឡាចំនួន ២ ដែលអាចផលិតថាមពលសរុប ១២០ មេហ្គាវ៉ាត់នៅខេត្តពោធិ៍សាត់ និងខេត្តកំពង់ឆ្នាំងដែលគ្រោងដាក់ឲ្យដំណើរការនៅចុងឆ្នាំ ២០២០ និង ឆ្នាំ ២០២១។ រដ្ឋាភិបាលក៏បានអនុញ្ញាតឲ្យក្រុមហ៊ុន ស្នេ ថេក រីញូវេប៊ល វិនិយោគដំឡើងផ្ទាំងសូឡា ២០ មេហ្គាវ៉ាត់បន្ថែមលើរោងចក្រថាមពលដែលមានស្រាប់ ៦០ មេហ្គាវ៉ាត់នៅស្រុកឧដុង្គ ខេត្តកំពង់ស្ពឺដែលគ្រោងដំណើរការខែធ្នូ ឆ្នាំ ២០១៩។
លោក លឹម ហេង អនុប្រធានសភាពាណិជ្ជកម្មកម្ពុជាបានឲ្យដឹងថាប្រសិនបើ EDC អាចពង្រីករោងចក្រផលិតអគ្គិសនីពីពន្លឺព្រះអាទិត្យវានឹងអាចជួយទាក់ទាញអ្នកវិនិយោគិនបរទេស និងបង្កើតផលិតកម្មដល់វិស័យឧស្សាហកម្មនានា។
លោកបញ្ជាក់ថា៖ «ខ្ញុំយល់ថាវាជារឿងល្អ អគ្គិសនីកាន់ថោក វាកាន់តែល្អ សព្វថ្ងៃបញ្ហាធំអគ្គិសនីមានតម្លៃខ្ពស់ពេក ធ្វើប៉ះពាល់ការផលិត ប្រសិនបើបានថ្លៃភ្លើងថោក វាកាន់តែជំរុញលើកទឹកចិត្តការវិនិយោគមកដែរ។ មួយទៀតបើភ្លើងមានតម្លៃទាប វាជួយដល់វិស័យឧស្សាហកម្មច្រើនដោយសារថ្លៃដើមផលិតវាទាប»៕LA