ភ្នំពេញៈ អគ្គិសនីកម្ពុជាបានដាក់ឱ្យដំណើរការអនុស្ថានីយអគ្គិសនីថ្មីមួយ និងខ្សែបញ្ជូនតង់ស្យុងខ្ពស់ ២៣០ គីឡូវ៉ុល នៅខេត្តត្បូងឃ្មុំ ដែលជាការខំប្រឹងប្រែងមួយរបស់រដ្ឋាភិបាលនៅក្នុងការលើកកម្ពស់ស្ថិរភាពថាមពលអគ្គិសនី។
លោក កែវ រតនៈ អគ្គនាយកអគ្គិសនីកម្ពុជា (EDC) ប្រាប់ភ្នំពេញប៉ុស្តិ៍កាលពីចុងសប្តាហ៍មុនថា ការដាក់ឱ្យដំណើរការអនុស្ថានីយថ្មីនេះ គឺបន្ទាប់ពី EDC បានបញ្ចប់ការធ្វើតេស្តសាកល្បងដោយជោគជ័យនាថ្ងៃទី ១៤ ខែមករា។ លោកបានឱ្យដឹងថា អនុស្ថានីយនេះត្រូវបានសាងសង់ដោយក្រុមហ៊ុន TBEA Co., Ltd មកពីប្រទេសចិន និងត្រួតពិនិត្យដោយវិស្វករអគ្គិសនីកម្ពុជា ដែលផ្តល់ជំនួយពីទីប្រឹក្សាបច្ចេកទេសនៃអគ្គិសនីបារាំង (EDF)។
លោកថ្លែងថា៖ «អនុស្ថានីយអគ្គិសនីនេះ គឺជាសមិទ្ធផលផ្លែផ្កានៃកិច្ចសហការគ្នាល្អរវាងរដ្ឋាភិបាលកម្ពុជា និងរដ្ឋាភិបាលសាធារណរដ្ឋបារាំងតាមរយៈទីភ្នាក់ងារបារាំងសម្រាប់ការអភិវឌ្ឍ (AFD)»។
លោកបន្ថែមថា ចំណែកខ្សែបញ្ជូនតង់ស្យុងខ្ពស់ ២៣០ គីឡូវ៉ុល គឺជាកិច្ចសហប្រតិបត្តិការរវាងរដ្ឋាភិបាលកម្ពុជាជាមួយរដ្ឋាភិបាលចិនក្នុងគោលដៅរួមគ្នាអភិវឌ្ឍវិស័យអគ្គិសនី។ អនុស្ថានីយនេះត្រូវបានសាងសង់ដោយក្រុមហ៊ុនចិន CHMC។
លោកប្រាប់ថា៖ «នេះជាអនុស្ថានីយអគ្គិសនីទី១ បានដាក់ដំណើរការនៅក្នុងខេត្តត្បូងឃ្មុំ។ កាលពីមុនការផ្គត់ផ្គង់អគ្គិសនីក្នុងខេត្តនេះ ត្រូវបានទាញថាមពលពីខេត្តកំពង់ចាម ព្រៃវែង និងនាំចូលពីវៀតណាម»។
អនុស្ថានីយនេះនឹងផ្គត់ផ្គង់ក្នុងខេត្តត្បូងឃ្មុំទាំងមូល ព្រមទាំងចែកចាយទៅខេត្តព្រៃវែងតាមខ្សែបញ្ជូន ២៣០ គីឡូវ៉ុលនេះដែលនឹងដំណើរការដំណាក់កាលដំបូង ១១៥ គីឡូវ៉ុល ហើយខ្សែបញ្ជូននេះនឹងតភ្ជាប់ទៅខេត្តស្វាយរៀងផងដែរ តាមរយៈខ្សែបញ្ជូនអគ្គិសនីតង់ស្យុងខ្ពស់ ១១៥ គីឡូវ៉ុល ដែលមានស្រាប់។ នេះបើតាមលោក រតនៈ។
លោកបញ្ជាក់ថា៖ «អនុស្ថានីយនេះនឹងជួយផ្គត់ផ្គង់អគ្គិសនីដល់ប្រជាជនកាន់តែមានស្ថិរភាព និងគុណភាពជាងមុន»។
អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពល លោក វិចទ័រ ហ្សូនា បាននិយាយថា អនុស្ថានីយថ្មីនេះត្រូវបានទាញថាមពលពីរោងចក្រផលិតថាមពលអគ្គិសនីទាំងអស់ពីខេត្តព្រះសីហនុ។ រហូតមកទល់ពេលនេះ រដ្ឋាភិបាលបានដាក់ឱ្យដំណើរការអនុស្ថានីយចំនួន ៣៤ នៅទូទាំងប្រទេស (រួមទាំងអនុស្ថានីយនៅត្បូងឃ្មុំនេះ)។
លោកប្រាប់ថា៖ «អនុស្ថានីយថ្មីនេះគឺជាផ្នែកមួយនៃផែនការពង្រីកខ្សែបណ្តាញបញ្ជូនជាតិក្នុងក្របខ័ណ្ឌថ្នាក់ជាតិដែលវានឹងរួមចំណែកលើកកម្ពស់ស្ថិរភាពនៃការផ្គត់ផ្គង់ថាមពលជូនប្រជាពលរដ្ឋ អ្នកក្នុងឧស្សាហកម្ម និងសេវាកម្ម»។
កាលពីចុងឆ្នាំ ២០២០ រោងចក្រអគ្គិសនីដំណើរការដោយប្រេងខ្មៅតម្លៃ ៣៨០ លានដុល្លារ អនុភាព ៤០០ មេហ្គាវ៉ាត់ នៅស្រុកល្វាឯម ខេត្តកណ្តាល បានបញ្ចប់ការសាងសង់ហើយដោយត្រៀមនឹងបញ្ចេញថាមពលអគ្គិសនីប្រើប្រាស់ពេលមានតម្រូវការខ្ពស់។
ការប្រើប្រាស់អគ្គិសនីឆ្នាំមុនបានធ្លាក់ចុះចន្លោះពី ១០ ទៅ ១២ ភាគរយ ដោយសារការរីករាលដាលជំងឺកូវីដ ១៩ ដែលបង្កផលប៉ះពាល់ដល់ផលិតកម្មកាត់ដេរ។ លោកបន្តថា ផលប៉ះពាល់ខ្លាំងបំផុតដល់ការប្រើប្រាស់នៅក្នុងផលិតកម្មកាត់ដេរមានចំនួនជាង ៤០ ភាគរយនៃការប្រើប្រាស់សរុប។ នេះបើតាមលោក ហ្សូនា៕ LA