ភ្នំពេញៈ អាជ្ញាធរអគ្គិសនីកម្ពុជាបានប្រកាសអ្នកដែលបានឈ្នះការដេញថ្លៃកាលពីថ្ងៃម្សិលមិញ សម្រាប់គម្រោងពង្រីក និងការចែកចាយអគ្គិសនីនៅទីក្រុងភ្នំពេញក្រោមការផ្ដល់មូលធនដោយទីភ្នាក់ងារសហប្រតិបត្តិការអន្តរជាតិជប៉ុន (JICA)។
ក្រុមហ៊ុន Toenec Corporation និងក្រុមហ៊ុន Sumitomo Electric Industries Ltd ព្រមទាំងក្រុមហ៊ុន Siemens Limited បានឈ្នះនូវការដេញថ្លៃ ៥០,៧៦ លានដុល្លារនេះពីអគ្គិសនីកម្ពុជាដែលទទួលមូលនិធិពី JICA។
លោក កែវ រតនៈ អគ្គនាយកអគ្គិសនីកម្ពុជា (EDC) បានថ្លែងថា ការផ្ដល់កម្ចីពី JICA នឹងជួយដល់ការពង្រីកការបញ្ជូន និងការចែកចាយអគ្គិសនីនៅទីក្រុងដែលនឹងជួយបញ្ចប់នូវការផ្គត់ផ្គង់អគ្គិសនីមិនទៀងទាត់ កាត់បន្ថយការចំណាយលើអគ្គិសនីព្រមទាំងការពង្រឹងពាណិជ្ជកម្ម និងឧស្សាហកម្មនៅក្នុងទីក្រុងផងដែរ។
លោក កែវ រតនៈ បានលើកឡើងថា៖ «សម្រាប់ថវិកានេះនឹងពង្រីកការចែកចាយអគ្គិសនីរបស់យើង ការចំណាយលើអគ្គិសនីរបស់យើងនឹងធ្លាក់ចុះ បន្ទាប់ពីគម្រោងនេះត្រូវបានធ្វើរួច»។ លោកបានបន្តថា៖ «យើងនឹងមិនប្រឈមការផ្គត់ផ្គង់អគ្គិសនីមិនទៀងទាត់ទៀតទេ»៕LA