ភ្នំពេញៈ Emerald Resources NL ជាក្រុមហ៊ុនចុះបញ្ជីនៅប្រទេសសិង្ហបុរី បានប្រកាសកាលពីថ្ងៃអង្គារថា ខ្លួនសម្រេចបានកិច្ចព្រមព្រៀងហិរញ្ញប្បទានតម្លៃ ៦០ លានដុល្លារលើគម្រោងអូរខ្វាវដែលបានផ្ដល់ដោយក្រុមហ៊ុន Sprott Private Resource Lending II L.P.(Sprott)។
សេចក្ដីប្រកាសព័ត៌មានបានឲ្យដឹងថា កិច្ចព្រមព្រៀងហិរញ្ញប្បទាននេះ គឺជាលទ្ធផលនៃការបំពេញគ្រប់លក្ខខណ្ឌទាំងអស់ដែលរួមមានការបន្តវិធានការត្រួតពិនិត្យល្អិតល្អន់ផ្នែកបច្ចេកទេសផ្នែកច្បាប់ និងសុវត្ថិភាពល្អបំផុត។
ការប្រើប្រាស់ហិរញ្ញប្បទាននៃគម្រោងរ៉ែមាសអូរខ្វាវតម្លៃ ៦០ លានដុល្លារអាចធ្វើបានភ្លាមៗដើម្បីឆ្លើយតបទៅតាមគោលដៅអភិវឌ្ឍន៍គម្រោងទាន់ពេលវេលាជាមួយនឹងទឹកប្រាក់ ១០ លានដុល្លារលើកដំបូង។
ការលក់ភាគហ៊ុនឲ្យក្រុមហ៊ុន Sprott ដែលត្រូវបានយល់ព្រមដោយភាគទុនិកកាលពីថ្ងៃទី ១៣ ខែ មីនា ឆ្នាំ ២០២០ ក៏បានផ្ដល់លទ្ធភាពក្នុងការបានទទួលទឹកប្រាក់ពីការទិញចំនួន ១០០ លានដុល្លារផងដែរ។
លោក Morgan Hart នាយកគ្រប់គ្រងក្រុមហ៊ុន Emerald Resources NL បានថ្លែងថា៖ «យើងរីករាយយ៉ាងខ្លាំងក្នុងការសម្រេចបានគោលដៅដ៏សំខាន់ផ្សេងទៀតស្របជាមួយដំណើរផ្លូវអភិវឌ្ឍន៍សម្រាប់គម្រោងរ៉ែមាសអូរខ្វាវ បន្ទាប់ពីការអនុវត្តការរៀបចំឯកសារគម្រោងទាំងអស់ និងការទទួលបាននូវសុវត្ថិភាពដ៏ល្អបំផុតសម្រាប់គម្រោងអូរខ្វាវ»។
លោកលើកឡើងថា៖ «លើសពីនេះទៅទៀតការប្ដេជ្ញាចិត្តរបស់ក្រុមហ៊ុន Sprott រួមជាមួយនឹងភាគទុនិករបស់ខ្លួនគឺដើម្បីពង្រឹងបន្ថែមទៀតតួនាទីហិរញ្ញវត្ថុរបស់ក្រុមហ៊ុននៅក្នុងអំឡុងពេលដែលលក្ខខណ្ឌទីផ្សារពិភពលោកប្រែប្រួលនៅពេលបច្ចុប្បន្នជាប់ទាក់ទងនឹងបញ្ហាវីរុសកូរ៉ូណាកាន់តែខ្លាំងឡើងៗ»។
លោកបានបន្ថែមថា៖ «សំខាន់ជាងនេះទៅទៀតនៅពេលក្រុមហ៊ុន Emerald បានចាប់ផ្ដើមបង្កើតមូលនិធិពេញលេញរបស់ខ្លួនដែលគ្រប់គ្រង ១០០ ភាគរយលើគម្រោងរ៉ែមាសអូរខ្វាវ ហើយរំពឹងថានឹងសម្រេចបានការទាញយករ៉ែមាសលើកដំបូងពីគម្រោងនេះនៅកម្ពុជាក្នុងត្រីមាសទី ២ ឆ្នាំ ២០២១»។
លោក យស មុនីរ៉ាត់ អគ្គនាយកនៃអគ្គនាយកដ្ឋានធនធានរ៉ែបានថ្លែងក្នុងសន្និសីទសារព័ត៌មានស្តីពី «វឌ្ឍនភាព និងទិសដៅការងាររបស់ក្រសួងរ៉ែ និងថាមពល» កាលពីសប្តាហ៍មុនថា សកម្មភាពអភិវឌ្ឍន៍លើគម្រោងរ៉ែមាសនៅអូរខ្វាវកំពុងដំណើរការយ៉ាងរលូន បើទោះបីជាកំពុងមានការរាតត្បាតជំងឺកូវីដ ១៩។
លោកបន្តថា ក្រុមហ៊ុននេះបានសាងសង់ផ្លូវចូលទៅកាន់គម្រោងរួចរាល់ហើយ ខណៈក្រុមហ៊ុនកំពុងធ្វើការដ្ឋានសាងសង់រោងចក្រចម្រាញ់មាស ដើម្បីឈានទៅដល់ការទាញយករ៉ែមាសជាលើកដំបូងទៅតាមផែនការ។
លោកថ្លែងថា៖ «យើងប៉ាន់ប្រមាណថា គម្រោងនេះនឹងអាចចម្រាញ់មាសក្នុងបរិមាណសរុប ១ លានអោន ឬជិត ១ លានតម្លឹង»។ លោកបន្តថា៖ «ក្រសួងនឹងជំរុញក្នុងការផ្តល់អាជ្ញាប័ណ្ណស្វែងរករ៉ែមាសបន្ថែមទៀតនៅក្នុងតំបន់ជុំវិញគម្រោងអូរខ្វាវនេះ ដើម្បីបង្កើនការធ្វើអាជីវកម្មរ៉ែមាស»។
បើយោងតាមលោក យស មុនីរ៉ាត់ បច្ចុប្បន្នក្រសួងបានផ្តល់អាជ្ញាប័ណ្ណសិក្សាស្វែងរករ៉ែលោហៈចំនួន ៤០ នៅទូទាំងប្រទេសកម្ពុជា។
លោក មុនីរ៉ាត់ បានឲ្យដឹងថា កម្ពុជាទទួលបានចំណូលមិនមែនសារពើពន្ធពីវិស័យរ៉ែប្រមាណ ២១ លានដុល្លារកាលពីឆ្នាំ ២០១៩ កើនឡើង ៥ ភាគរយធៀបនឹងឆ្នាំ ២០១៨ ដែលមាន ២០ លានដុល្លារ៕LA