ភ្នំពេញៈ ក្រុមហ៊ុន Emerald Resources ដែលទទួលសិទ្ធិអភិវឌ្ឍន៍អណ្តូងរ៉ែមាសអូរខ្វាវ នៅខេត្ត មណ្ឌលគិរី អាចនឹងចាប់ផ្តើមដំណើរការទាញយកមាសលើទឹកដីកម្ពុជាជាលើកដំបូងនៅដើមឆ្នាំ ២០២០ បន្ទាប់ពីបានទទួលអាជ្ញាប័ណ្ណធ្វើអាជីវកម្មរ៉ែមាសកាលពីខែកក្កដា។ នេះបើយោងតាមអ្នកនាំពាក្យក្រសួងរ៉ែ និងថាមពល។
ក្រុមហ៊ុន Emerald Resource ដែលចុះបញ្ជីក្នុងផ្សារភាគហ៊ុនអូស្រ្តាលីបានចេញសេចក្តីជូនដំណឹងមួយកាលពីចុងសប្តាហ៍មុន ដោយបញ្ជាក់ថា ក្រុមហ៊ុនទើបសម្រេចកៀរគរដើមទុនបាន ២៧ លានដុល្លារអូស្ត្រាលី (១៩,៥ លានដុល្លារអាមេរិក) តាមរយៈការបោះផ្សាយលក់មូលបត្រ ដើម្បីជាប្រភពទុនក្នុងការអភិវឌ្ឍអណ្តូងរ៉ែមាសនៅអូរខ្វាវ របស់កម្ពុជានេះ។
លោក យស មុនីរ៉ាត់ អ្នកនាំពាក្យក្រសួងរ៉ែ និងថាមពល បានឲ្យដឹងកាលពីម្សិលមិញថា ក្រុមហ៊ុន Emerald Resources បានទទួលអាជ្ញាប័ណ្ណរុករករ៉ែកាលពីខែកក្កដា ហើយបន្ទាប់ពីនោះមក ក្រុមហ៊ុននេះកំពុងប្រមូលមូលនិធិយ៉ាងសកម្ម ដើម្បីអភិវឌ្ឍហេដ្ឋារចនាសម្ព័ន្ធរបស់ខ្លួន។ លោកបន្ថែមថា ក្រុមហ៊ុននេះត្រូវបានរំពឹងថា នឹងចាប់ផ្តើមផលិតមាសជាលើកដំបូងនៅដើមឆ្នាំ ២០២០។
លោក មុនីរ៉ាត់ មិនអាចផ្ដល់ការប៉ាន់ប្រមាណពីប្រាក់ចំណូលដែលរដ្ឋាភិបាលនឹងទទួលបានពីការអភិវឌ្ឍនេះនៅឡើយទេ ប៉ុន្តែលោកឲ្យដឹងថា នៅពេលគម្រោងនេះចាប់ផ្ដើមប្រតិបត្តិការ វានឹងបង្កើតប្រាក់ចំណូលដល់រដ្ឋាភិបាល ផ្ដល់ការងារ និងបង្កើតសកម្មភាពសេដ្ឋកិច្ចរបស់កម្ពុជា។
លោកថ្លែងថា៖ «សម្រាប់ប្រាក់ចំណូលផ្ទាល់ យើងនឹងទទួលបានពីសួយសារ ពន្ធ និងតម្លៃជួលពីការជួលដី សម្រាប់គម្រោងនេះ»។
លោកបានបន្តថា Emerald Resources គឺជាក្រុមហ៊ុនធំដំបូង ដែលទទួលបានអាជ្ញាប័ណ្ណរុករករ៉ែពីក្រសួង។
រហូតមកដល់ពេលនេះលោកបានឲ្យដឹងថា ក្រសួងបានផ្ដល់អាជ្ញាប័ណ្ណរុករករ៉ែចំនួន ៥០។
ក្រុមហ៊ុន Emerald Resources បានចេញផ្សាយការសិក្សាលទ្ធភាពច្បាស់លាស់ (DFS) របស់ខ្លួន កាលពីខែឧសភា ឆ្នាំ ២០១៧ និងបានបង្ហាញថា គម្រោងមាសអូរខ្វាវ អាចផលិតមាសបាន ១០៦ ០០០ អោនស៍ ក្នុងមួយឆ្នាំជាមធ្យម។
ក្រុមហ៊ុននេះប៉ាន់ប្រមាណថា ប្រតិបត្តិការទាញយករ៉ែនឹងមានរយៈពេល ៧ ឆ្នាំ ដោយប្រើទុនវិនិយោគ ៩៨ លានដុល្លារ។
លោក Morgan Hart នាយកគ្រប់គ្រងនៅក្រុមហ៊ុន Emerald បានឲ្យដឹងនៅក្នុងឯកសារនេះថា មូលនិធិ ២៧ លានដុល្លារអូស្ដ្រាលី ដែលរកបាននេះ នឹងត្រូវប្រើប្រាស់មួយផ្នែកក្នុងការចាប់ផ្ដើមសកម្មភាពអភិវឌ្ឍន៍នៅអូរខ្វាវ។
លោកបានថ្លែងថា៖ «យើងសប្បាយរីករាយដោយមានការគាំទ្រទទួលបានពីភាគទុនិកបច្ចុប្បន្ន និងភាគទុនិកស្ថាប័នថ្មីរបស់យើង។ ការគាំទ្រនេះបង្ហាញពីលក្ខណៈដ៏រឹងមាំនៃគម្រោងរ៉ែមាសអូរខ្វាវ និងការគាំទ្រយុទ្ធសាស្ដ្ររបស់ក្រុមហ៊ុននៃការក្លាយជាក្រុមហ៊ុនផលិតមាសកម្ពុជាទ្រង់ទ្រាយធំដ៏ទំនើបដំបូងគេ»។
លោក ប៉ិច ពិសី នាយកកម្មវិធីជាន់ខ្ពស់នៅអង្គការតម្លាភាពកម្ពុជា បានឲ្យដឹងកាលពីម្សិលមិញថា វាជាវិធានការល្អមួយសម្រាប់កម្ពុជាក្នុងការមានក្រុមហ៊ុនផលិតមាស ខណៈលោកបានថ្លែងថា វានឹងជួយបង្កើនប្រាក់ចំណូលរដ្ឋាភិបាល។
ប៉ុន្តែ លោក ពិសី បានឲ្យដឹងថា ការធានាតម្លាភាពលើការគ្រប់គ្រងប្រាក់ចំណូលបានពីប្រភពរុករករ៉ែនេះ មានសារៈសំខាន់ណាស់ ហើយសាធារណជន តែងតែលើកឡើងពីការបារម្ភរបស់ពួកគេលើបញ្ហានេះ ខណៈក្រសួងមិនបានចេញផ្សាយព័ត៌មានគ្រប់គ្រាន់អំពីសក្ដានុពលរបស់គម្រោងនេះ។
លោកបន្តថា ទោះបីជាព័ត៌មានអំពីការអភិវឌ្ឍការរុករករ៉ែមិនត្រូវបានចេញផ្សាយគ្រប់គ្រាន់ក៏ដោយ ក៏អ្នកសង្កេតការណ៍បានពឹងផ្អែកលើសេចក្ដីប្រកាសពីក្រុមហ៊ុន ជាពិសេសក្រុមហ៊ុនដែលត្រូវបានចុះបញ្ជីនៅផ្សារហ៊ុនបរទេស។
លោកថា៖ «យើងជំរុញឲ្យរដ្ឋាភិបាលធានាថា ក្រុមហ៊ុនទាំងនោះ នឹងបង្ហាញប្រាក់ចំណូលពិតប្រាកដបានពីអាជីវកម្មរបស់ពួកគេទាំងអាជីវកម្មរ៉ែមាស និងប្រេងកាត»។
យោងតាមលោក ប៉ិច ពិសី តម្រូវឲ្យមានយន្តការដើម្បីតាមដានការអភិវឌ្ឍពិតប្រាកដរបស់ក្រុមហ៊ុន។
លោកបានលើកឡើងថា៖ «ក្រសួងខ្លួនឯង គួរតែត្រួតពិនិត្យប្រព័ន្ធគ្រប់គ្រងហិរញ្ញវត្ថុផ្ទាល់របស់ខ្លួន ដើម្បីគេចផុតពីអំពើពុករលួយណាមួយ នៅពេលប្រមូលចំណូលពីក្រុមហ៊ុន»៕LA