ភ្នំពេញៈ ក្រុមហ៊ុនអាកាសចរណ៍ Emirates Airlines មានមូលដ្ឋាននៅទីក្រុងឌូបៃដែលបានប្រតិបត្តិការជើងហោះហើរភ្នំពេញ-ទីក្រុងឌូបៃរយៈពេលមួយឆ្នាំមកនេះកំពុងបង្ហាញតម្រូវការខ្លាំងពីទីផ្សារដ៏តូចមួយនេះ។ នេះបើយោងតាមប្រធានគ្រប់គ្រងក្រុមហ៊ុន Emirates Cambodia។
ការលើកឡើងបែបនេះធ្វើឡើងនៅក្នុងការរំឭកខួប ១ ឆ្នាំរបស់ក្រុមហ៊ុនអាកាសចរណ៍មួយនេះនៅក្នុងប្រទេសកម្ពុជាកាលពីថ្ងៃម្សិលមិញ។
តាមទិន្នន័យក្រុមហ៊ុនក្នុងរយៈពេលមួយឆ្នាំនៃការដំណើរការនៅទីផ្សារនេះ Emirates បានដឹកជញ្ជូនអ្នកដំណើរចេញពីកម្ពុជាទៅទីក្រុងឌូបៃបានជាង ៧០ ០០០ នាក់។
លោក Abdulla Adnan អ្នកគ្រប់គ្រងក្រុមហ៊ុនអាកាសចរណ៍នេះបានថ្លែងកាលពីម្សិលមិញនៅក្នុងសណ្ឋាគារ Rosewood Hotel ក្នុងអំឡុងខួប ១ ឆ្នាំរបស់ក្រុមហ៊ុនថាឧស្សាហកម្មអាកាសចរណ៍នៅក្នុងប្រទេសកម្ពុជាកំពុងបង្ហាញកំណើនដ៏រឹងមាំ។
លោកថ្លែងថា៖ «កម្ពុជាជាប្រទេសមួយក្នុងចំណោមប្រទេសជាច្រើនដែលរីកចម្រើនរហ័សបំផុតលើពិភពលោក។ នៅពេលនេះយើងមានមោទនភាពដោយសារបានរួមចំណែកដល់កំណើនសេដ្ឋកិច្ចរបស់ប្រទេសកម្ពុជា»។
ក្រុមហ៊ុនអាកាសចរណ៍ Emirates បានចាប់ផ្តើមចូលមកទីផ្សារកម្ពុជាក្នុងការផ្តល់សេវាហោះហើរទិសដៅភ្នំពេញទៅឌូបៃកាលពីថ្ងៃទី ១ ខែកក្កដា ឆ្នាំ ២០១៧ ដែលបានធ្វើឲ្យទិសដៅបណ្ដាញពិភពលោករបស់ក្រុមហ៊ុននេះបានកើនឡើងដល់ ១៥៧ កន្លែង។ នេះបើយោងតាមលោក Abdulla Adnan។
លោកថ្លែងថាជើងហោះហើរប្រចាំថ្ងៃតភ្ជាប់រវាងទីក្រុងភ្នំពេញ និងទីក្រុងឌូបៃតាមរយៈការឈប់សំចតនៅទីក្រុងយ៉ាំងហ្គោន ប្រទេសមីយ៉ាន់ម៉ាដោយប្រើប្រាស់យន្តហោះ Boeing 777-300 ER។
នៅឆ្នាំនេះគេរំពឹងថានឹងមានក្រុមហ៊ុនអាកាសចរណ៍ថ្មី ៣ បើកដំណើរការនៅកម្ពុជាដែលធ្វើឲ្យចំនួនក្រុមហ៊ុនអាកាសចរណ៍សរុបនឹងកើនឡើងដល់ ១០ ក្រុមហ៊ុន។
វិស័យអាកាសចរណ៍កម្ពុជាត្រូវបានគេមើលឃើញថាមានកំណើនយ៉ាងរហ័សក្នុងរយៈពេលជាច្រើនឆ្នាំថ្មីៗនេះ ពីក្រុមហ៊ុនអាកាសចរណ៍ ២ ដែលមានយន្តហោះ ៧ គ្រឿងកាលពីឆ្នាំ ២០១៣ ដល់ចំនួនក្រុមហ៊ុនអាកាសចរណ៍ ៧ នៅបច្ចុប្បន្នដែលមានយន្តហោះ ៣០ គ្រឿង។
មជ្ឈមណ្ឌលអាកាសចរណ៍អាស៊ីប៉ាស៊ីហ្វិក ព្យាករថានឹងមានយន្តហោះ ៤៥ គ្រឿងដែលហោះហើរទៅ និងមកកម្ពុជាត្រឹមចុងឆ្នាំនេះ។
បច្ចុប្បន្ន Emirates Airlines ក៏កំពុងបម្រើសេវាដឹកទំនិញតាមអាកាសពីកម្ពុជាផងដែរ។
ក្រុមហ៊ុន Emirates SkyCargo កំពុងប្រតិបតិ្តការសេវាដឹកជញ្ជូនទំនិញរបស់ខ្លួននៅក្នុងប្រទេសកម្ពុជាចាប់តាំងពីឆ្នាំ ២០១៦ ដែលបានដឹកទំនិញនាំចេញ នាំចូល បាន ១១ ០០០ តោន ខណៈកម្ពុជាគឺជាទីផ្សារកំពុងអភិវឌ្ឍន៍ជាមួយនឹងការនាំចេញសម្លៀកបំពាក់ និងស្បែកជើង។
លោក Abdulla Adnan ថ្លែងថា៖ «យើងមានទំនុកចិត្តខ្លាំងលើទីផ្សារកម្ពុជា ហើយនឹងបន្តក្នុងការស្វែងរកឱកាសបន្ថែមទៀតក្នុងការអភិវឌ្ឍការតភ្ជាប់ការធ្វើដំណើររវាងកម្ពុជា និងពិភពលោកតាមរយៈមជ្ឈមណ្ឌលក្រុមហ៊ុនអាកាសចរណ៍ Emirates នៅទីក្រុងឌូបៃ»៕LA