ភ្នំពេញ: សហភាពអឺរ៉ុបនឹងផ្តល់ហិរញ្ញប្បទានជាង ១០០ លានដុល្លារ ដល់រដ្ឋាភិបាលកម្ពុជាដើម្បីជំរុញកំណើនក្នុងវិស័យជលផល។ នេះបើតាមលោក ហ៊ុន សែន នាយករដ្ឋមន្ត្រី។
នៅទំព័រហ្វេសប៊ុកផ្លូវការលោក ហ៊ុន សែន ថ្លែងថាក្នុងជំនួបជាមួយលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជាជិតផុតអាណត្តិកាលពីថ្ងៃម្សិលមិញ EU បានសម្រេចផ្តល់ហិរញ្ញប្បទាននេះសម្រាប់ជួយដល់វិស័យជលផលនៅកម្ពុជា។
លោក ស្រី វុឌ្ឍី អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានប្រាប់ភ្នំពេញប៉ុស្តិ៍ ថា EU បានផ្តល់ហិរញ្ញប្បទានថ្មីលើគម្រោងចំនួន ២ គឺ ទី១ កម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ននៃវារីវប្បកម្មដែលមានទឹកប្រាក់ជិត ៣៩ លានដុល្លារក្នុងនោះប្រមាណ ៥,៥ លានដុល្លារ ជាហិរញ្ញប្បទានឥតសំណងពីទីភ្នាក់ងារបារាំងសម្រាប់អភិវឌ្ឍន៍ (AFD)។ គម្រោងនេះមានរយៈពេល ៦ ឆ្នាំ នឹងចាប់ផ្តើមឆ្នាំ ២០១៨ ដល់ឆ្នាំ ២០២៣ និងគម្រោងទី២ គឺកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន សមាសភាគការនេសាទក្នុងទឹកប្រាក់ជាង ៩៦,៦ លានដុល្លារ ដែលមានរយៈពេល ៥ ឆ្នាំចាប់ពី ឆ្នាំ ២០១៩ ដល់ឆ្នាំ ២០២៣។
លោកថ្លែងថា៖ «ជំនួយឥតសំណងទាំងនោះនឹងជួយជំរុញកំណើននៃការចិញ្ចឹមត្រីឲ្យមានការរីកលូតលាស់ឡើងរួមទាំងជួយដល់បច្ចេកទេស បច្ចេកវិទ្យា និងជួយទាក់ទាញអ្នកវិនិយោគនៅក្នុងវិស័យផលិតកម្មវារីវប្បកម្ម»។
លោកបន្តថា៖ «គម្រោងទី២ ទាក់ទងនឹងការអភិរក្សក្នុងវិស័យជលផលទាំងមូលដែលធ្វើយ៉ាងណាឲ្យធនធានមច្ចាជាតិយើងទាំងទឹកសាប និងទឹកប្រៃមាននិរន្តរភាព ដូច្នេះយើងសូមអរគុណដល់សហភាពអឺរ៉ុបជួយយើងលើផ្នែកនេះ»។
លោក ឱម សាវ៉ាត់ នាយកប្រតិបត្តិអង្គការសម្ព័ន្ធភាពដើម្បីអភិរក្សធនធានជលផលបានប្រាប់ថា ជំនួយ EU នេះនឹងជួយរួមចំណែកការពារធនធានជលផលនៅកម្ពុជា ពិសេសជួយជំរុញការចិញ្ចឹមត្រីឲ្យកាន់តែមានប្រសិទ្ធភាព។ លោកថ្លែងថា៖ «ខ្ញុំគិតថាជំនួយនេះជួយរួមចំណែកយ៉ាងសំខាន់ដល់ស្ថាប័នរដ្ឋ និងអង្គការសង្គមស៊ីវិលមានលទ្ធភាពច្រើនថែមទៀត ដើម្បីជួយការពារ និងអភិរក្សធនធានជលផល»។
លោកបន្តថាកម្ពុជាមានលទ្ធភាពតិចតួចនៅឡើយក្នុងវិស័យវារីវប្បកម្ម ព្រោះកម្ពុជាពឹងផ្អែកតែលើត្រីធម្មជាតិ ដូច្នេះជំនួយនឹងជួយឲ្យកាន់តែប្រសើរ។
លោកបានសង្កេតឃើញថា ក្នុងរយៈពេល ៣ ឆ្នាំចុងក្រោយនេះអាជ្ញាធរមានសមត្ថកិច្ចមានការបង្ក្រាបលើបទល្មើសនេសាទយ៉ាងសកម្ម ប៉ុន្តែការអនុវត្តច្បាប់នៅមានកម្រិតនៅឡើយ។
លោកបន្តទៀតថា៖ «យើងឃើញថា អាជ្ញាធរមានការសហការល្អជាមួយសហគមន៍ក្នុងការល្បាតក្នុងតំបន់ការពារ មានភាពប្រសើរ តែការអនុវត្តច្បាប់យើងនៅធូររលុង»។
គម្រោងជំនួយឥតសំណងនេះនឹងចុះហត្ថលេខានៅថ្ងៃពុធ ទី ២១ ខែ សីហា ឆ្នាំ ២០១៩៕ LA