.jpg)
ទិដ្ឋភាពចំណតផែកុងតឺន័រនៅកំពង់ផែស្វយ័តក្រុងព្រះសីហនុ។ វិស័យដឹកជញ្ជូនក៏ស្ថិតក្នុងចំណុចដែលត្រូវកែលម្អក្នុងសៀវភៅ «ស» ផងដែរ។ ហេង ជីវ័ន
ភ្នំពេញៈ សភាពាណិជ្ជកម្មអឺរ៉ុបនៅកម្ពុជា (EuroCham) បានចេញផ្សាយសៀវភៅ «ស» លើកទី៣ របស់ខ្លួនសម្រាប់ឆ្នាំ ២០១៩ ដើម្បីបង្កើនភាពទាក់ទាញវិស័យធុរកិច្ចរបស់កម្ពុជាក្នុងចំណោមវិនិយោគិនអឺរ៉ុប ខណៈក៏មានការបារម្ភការព្យួរ EBA ផងដែរ។
សៀវភៅ «ស» ដែលជាកម្រងអនុសាសន៍ស្តីពីគោលនយោបាយពាណិជ្ជកម្ម និងការវិនិយោគ ត្រូវបានរៀបចំដោយសភាពាណិជ្ជកម្មអឺរ៉ុបនៅកម្ពុជា ដើម្បីដាក់ជូនរដ្ឋាភិបាលកម្ពុជាពិចារណា លើឧបសគ្គផ្នែកបទប្បញ្ញត្តិ និងរចនាសម្ព័ន្ធ ដែលជួបប្រទះនៅក្នុងការធ្វើធុរកិច្ចនៅកម្ពុជា។
លោក អារណូ ដាក ប្រធានសភាពាណិជ្ជកម្មអឺរ៉ុបនៅកម្ពុជា បានថ្លែងថា សៀវភៅ «ស» នឹងជួយធ្វើឲ្យបរិយាកាសវិស័យធុរកិច្ចនៅកម្ពុជាកាន់តែមានភាពល្អប្រសើរ។
លោកថា៖ «យើងរំពឹងទុកថានៅក្នុងរយៈពេលប៉ុន្មានឆ្នាំខាងមុខ កំណែទម្រង់ដែលយើងចងក្រងតាមរយៈសៀវភៅនេះ នឹងជួយធ្វើឲ្យបរិយាកាស ធុរកិច្ចនៅកម្ពុជាកាន់តែល្អប្រសើរឡើង»។ លោកបន្តថា៖ «សៀវភៅនេះនឹងជួយជំរុញកំណើនវិនិយោគកាន់តែច្រើនថែមទៀតមកពីតំបន់ទ្វីបអឺរ៉ុប និងតំបន់ផ្សេងទៀត»។
នេះជាការធ្វើបច្ចុប្បន្នភាពលើកទី៣ នៃសៀវភៅ «ស» ក្រោមការណែនាំពីអ្នកជំនាញឯកទេសនៃគណៈកម្មាធិការវិស័យចំនួន ១០។ វិស័យទាំងនោះរួមមាន វិស័យការពារការវិនិយោគ ធនធានមនុស្ស យានយន្តគយ ការដឹកជញ្ជូន និង ភ័ស្តុភារ ធុរកិច្ច បចេ្ចកវិទ្យាគមនាគមន៍ និងព័ត៌មាន ធុរកិច្ចបៃតង់ សុខាភិបាល អចលនទ្រព្យ និងសំណង់។
ទោះបីយ៉ាងនេះក្តី លោក អារណូ ដាក ក៏បានដាក់ក្តីព្រួយបារម្ភពីការព្យួរប្រព័ន្ធអនុគ្រោះពន្ធអ្វីគ្រប់យ៉ាងលើកលែងតែអាវុធ (EBA) របស់សហភាពអឺរ៉ុបផងដែរ។ លោកបន្តថា ប្រសិនបើ EBA ត្រូវបានព្យួរពីកម្ពុជា នឹងប៉ះពាល់ដល់សេដ្ឋកិច្ច។ លោកថ្លែងថា៖ «ការព្យួរ EBA វានឹងកម្រិតការនាំចេញកម្ពុជាទៅសហភាពអឺរ៉ុប មានសម្ភារកីឡា កង់ និងវិស័យវាយនភណ្ឌ»។
លោកបន្តទៀតថា ការពឹងផ្អែកខ្លាំងទៅលើប្រភពហិរញ្ញវត្ថុពីចិនអាចបង្កហានិភ័យទៅថ្ងៃមុខ។ លោកថ្លែងថា៖ «ជាហានិភ័យដល់កម្ពុជាដែលអាស្រ័យលើលំហូរហិរញ្ញវត្ថុ ពីទេសចរចិនអាចនាំឲ្យប៉ះពាល់ដល់សេដ្ឋកិច្ចកម្ពុជា»។
ចិនជាប្រទេសផ្តល់កម្ចីធំបំផុតរបស់កម្ពុជា ដែលគិតត្រឹមពាក់កណ្តាលឆ្នាំ ២០១៨ បំណុលចិនមានជិតពាក់កណ្តាលនៃបំណុលពីខាងក្រៅសរុបរបស់កម្ពុជា ដែលមានរហូតដល់ ៤៨,៤ ភាគរយ។ នេះបើយោងតាមរបាយការណ៍របស់ធនាគារពិភពលោក។ បច្ចុប្បន្នចិនក៏ជាវិនិយោគិនឈានមុខគេរបស់កម្ពុជាផងដែរ។
លោក សុក ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) ថ្លែងថា កម្ពុជាបើកចំហអ្នកវិនិយោគទូទាំងពិភពលោកមិនចំពោះតែអ្នកវិនិយោគិនចិនទេ។
លោកបានបញ្ជាក់ទៀតថា៖ «ប្រសិនបើគ្មានចិនតើនរណាអ្នកសាងសង់ផ្លូវល្បឿនលឿនពីព្រះសីហនុភ្នំពេញ តើលោកមានបញ្ហាដែលក្រុមហ៊ុនចិនសាងសង់ផ្លូវល្បឿនលឿនពីព្រះសីហនុ-ភ្នំពេញ ខ្ញុំមិននិយាយ [ជំនួស] រដ្ឋាភិបាលចិនទេ ខ្ញុំជាអ្នកការទូត»។
ក្រុមហ៊ុនចិន Cambodian PPSHV Expressway Co Ltd គ្រោងចំណាយទុនវិនិយោគជិត ២ ពាន់លានដុល្លារ ក្នុងការសាងសង់ផ្លូវល្បឿនលឿនពីភ្នំពេញទៅខេត្តព្រះសីហនុមានប្រវែង ១៩០ គីឡូម៉ែត្រ ដែលគម្រោងនឹងបញ្ចប់នៅឆ្នាំ ២០២៣៕LA
