.jpg)
ថ្នាក់ដឹកនាំក្រសួងពាណិជ្ជកម្មជួបប្រជុំជាមួយថ្នាក់ដឹកនាំ Ezecom។ រូបថត សហការី
ភ្នំពេញៈ EZECOM ដែលជាក្រុមហ៊ុនមួយក្នុងសម្ព័ន្ធរ៉ូយ៉ាល់គ្រុប (Royal Group) មានផែនការក្នុងការបង្កើតគម្រោងតំបន់ពាណិជ្ជកម្មសេរីឌីជីថល (Digital Free Trade Zone-DFTZ) ដែលជាគម្រោងកិច្ចសម្រួលពាណិជ្ជកម្មមួយ អាចជួយគ្រប់គ្រង ផ្ទុក និងវិភាគទិន្នន័យដែលគ្មានក្រដាសស្នាមប្រកបដោយភាពសុក្រឹតខ្ពស់ ភាពប្រាកដប្រជា និងចំណាយតិច សម្រាប់សកម្មភាពពាណិជ្ជកម្មតាមប្រព័ន្ធអេឡិចត្រូនិក។
ក្រុមហ៊ុនបានបង្ហាញគម្រោងនេះក្នុងអំឡុងពេលបើកវេទិការពាណិជ្ជកម្មអេឡិចត្រូនិកពិភពលោក ដែលសហការរៀបចំដោយក្រសួងពាណិជ្ជកម្ម និងរ៉ូយ៉ាល់គ្រុប (Royal Group) នៅក្រសួងពាណិជ្ជកម្មកាលពីថ្ងៃពុធ។
តំណាងក្រុមហ៊ុនបានអះអាងថា៖ «គម្រោងនេះក៏នឹងផ្តល់ផលប្រយោជន៍ដល់រាជរដ្ឋាភិបាលកម្ពុជាក្នុងការឈានទៅសម្រេចបានគោលដៅប្រែក្លាយសេដ្ឋកិច្ចកម្ពុជាទៅជាសេដ្ឋកិច្ចឌីជីថលនៅឆ្នាំ ២០២៣»។
លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានបង្ហាញការស្វាគមន៍ចំពោះគម្រោងដ៏មានសារៈប្រយោជន៍នេះ តែតម្រូវឱ្យមានការពិគ្រោះយោបល់ជាមួយក្រសួងស្ថាប័នពាក់ព័ន្ធជាមុនសិន។
លោកថា ខណៈពេលដែលកម្ពុជាកំពុងឈានទៅសម្រេចបានសេដ្ឋកិច្ចបែបឌីជីថលតាមរយៈការចុះហត្ថលេខាលើកិច្ចព្រមព្រៀងក្របខ័ណ្ឌកិច្ចសម្រួលពាណិជ្ជកម្មដោយគ្មានក្រដាសស្នាមឆ្លងកាត់ព្រំដែននៅអាស៊ី និងប៉ាស៊ីហ្វិក កាលឆ្នាំ ២០១៧ ការផ្តល់សច្ចាប័នលើកិច្ចព្រមព្រៀងពាណិជ្ជកម្មអេឡិចត្រូនិកអាស៊ានកាលពីឆ្នាំ ២០១៩ ព្រមទាំងការដាក់ឱ្យដំណើរការគម្រោងបញ្ជរតែមួយជាតិកម្ពុជា អនុលោមតាមផែនការបញ្ជរតែមួយអាស៊ាន។
លោកថ្លែងថា៖ «កំណែទម្រង់របស់ក្រសួងពាណិជ្ជកម្មកម្ពុជាមួយចំនួនពិសេសការដាក់ឱ្យដំណើរការការចុះបញ្ជីពាណិជ្ជកម្មតាមប្រព័ន្ធអនឡាញ ការធ្វើស្វ័យប្រវត្តិកម្មក្នុងការស្នើសុំវិញ្ញាបនបត្របញ្ជាក់ប្រភពដើមទំនិញ និងការបង្កើតច្បាប់ស្តីពីពាណិជ្ជកម្មតាមប្រព័ន្ធអេឡិចត្រូនិកជាដើម»។
លោកបានលើកទឹកចិត្តដល់ក្រុមហ៊ុន EZECOM បន្តការធ្វើបទបង្ហាញនេះ និងជំរុញឲ្យមានបទបង្ហាញបែបនេះដល់ក្រសួងស្ថាប័នពាក់ព័ន្ធសម្រាប់ការយល់ដឹងកាន់តែទូលាយពីគម្រោងនេះ។
កាលពីចុងខែកក្កដា កន្លងទៅនេះលោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ច និងហិរញ្ញវត្ថុបានជំរុញឱ្យមន្ត្រីពាក់ព័ន្ធ និងក្រុមការងារអន្តរក្រសួងពន្លឿនការងារបញ្ចប់សេចក្តីព្រាងឯកសារទស្សនទានស្តីពីគោលនយោបាយរដ្ឋាភិបាលឌីជីថល និងត្រូវមានភាពស៊ីចង្វាក់គ្នាជាមួយគោលនយោបាយសេដ្ឋកិច្ចឌីជីថល។
លោកថ្លែងថា៖ «ការអភិវឌ្ឍរដ្ឋាភិបាលឌីជីថលត្រូវដើរទន្ទឹមគ្នានឹងការរៀបចំនូវប្រព័ន្ធអភិបាលកិច្ចឯកភាពរួមមួយដែលគ្រប់ក្រសួងស្ថាប័ន បំពេញ មុខងាររៀងៗខ្លួនជាទម្រង់ឌីជីថល។ រដ្ឋាភិបាលឌីជីថលជាផ្នែកដ៏សំខាន់មួយរបស់សេដ្ឋកិច្ចឌីជីថល»។
សេចក្ដីព្រាងផែនការយុទ្ធសាស្ដ្ររដ្ឋាភិបាលអេឡិចត្រូនិកកម្ពុជាឆ្នាំ ២០១៨-២០២៣ ដែលព្រាងដោយក្រសួងប្រៃសណីយ៍ និងទូរគមនាគមន៍ស្របជាមួយនឹងផែនការមេ ICT កម្ពុជា ឆ្នាំ ២០២០ និងគោលនយោបាយ Telecom-ICT ឆ្នាំ ២០២០៕LA
