ភ្នំពេញៈ EZECOM ជាក្រុមហ៊ុនផ្ដល់សេវាអ៊ីនធឺណិត (ISP) ឈានមុខគេរបស់ប្រទេស កម្ពុជា បានសហការជាមួយ Minim ជាក្រុមហ៊ុនហេដ្ឋារចនាសម្ព័ន្ធផ្អែកលើបច្ចេកវិទ្យាអ៊ីនធឺណិត (IoT) ឈានមុខគេរបស់ពិភពលោក ដើម្បីនាំយកប្រព័ន្ធ Wifi គុណភាពខ្ពស់ហៅថា EzeWiFi ដែលអាចផ្ដល់ WiFi ប្រតិបត្តិការខ្ពស់ទូទាំងប្រទេស និងកម្មវិធីទូរស័ព្ទសម្រាប់ការថែរក្សាដោយខ្លួនឯង ការគ្រប់គ្រងដោយក្រុមហ៊ុនមេ និងសន្ដិសុខបណ្ដាញ។
ក្រុមហ៊ុននេះបានប្រកាសកាលពីថ្ងៃចន្ទថា កិច្ចសហប្រតិបត្តិការថ្មីនេះនឹងចាប់ផ្ដើមនៅខែមីនា ដើម្បីធ្វើឲ្យមានភាពងាយស្រួលសម្រាប់អតិថិជនរបស់ខ្លួនជាមួយនឹងដំណោះស្រាយ ដែលនឹងអាចជាឧបករណ៍គាំទ្រថ្មី ដើម្បីជួយសម្រួលដល់ដំណោះស្រាយការថែរក្សាអតិថិជនកាន់តែរហ័ស និងកាត់បន្ថយការចំណាយលើការដឹកជញ្ជូន។
លោកស្រី Yuni Lee-Heathcote អគ្គនាយិកាក្រុមហ៊ុន EZECOM បានឲ្យដឹងថា កិច្ចសហប្រតិបត្តិការនេះគឺជាព្រឹត្តិការណ៍ដ៏សំខាន់ផ្សេងទៀតក្នុងការធ្វើទំនើបកម្មបច្ចេកវិទ្យា និងនវានុវត្តន៍ដែលអាចមានលក្ខណៈផ្ទាល់ខ្លួនកាន់តែច្រើន និងបណ្ដាញសុវត្ថិភាពសម្រាប់អតិថិជន។ លោកស្រីបន្តថា៖ «ក្រុមហ៊ុន EZECOM រីករាយក្នុងការនាំយកឲ្យអតិថិជនរបស់យើងនូវសេវា WiFi ជំនាន់ក្រោយ ដើម្បីគាំទ្រលំនៅឋាន»។
លោកស្រីបញ្ជាក់ថា៖ «ការដាក់ឲ្យដំណើរការដំណោះស្រាយនេះបង្ហាញការប្ដេជ្ញាចិត្តក្រុមហ៊ុនរបស់យើងក្នុងការផ្ដល់សេវាទំនាក់ទំនងគុណភាពខ្ពស់ តាមរយៈនវានុវត្តន៍ និងការកែលម្អជាប្រចាំ។ EzeWiFi រួមបញ្ចូលឧបករណ៍ WiFi បញ្ចូលដែលគួរឲ្យទាក់ទាញជាមួយនឹងកម្មវិធីទូរស័ព្ទចល័តដ៏សាមញ្ញប្រកបដោយឥទ្ធិពល។ ជាមួយនឹង EzeWiFi អតិថិជនរបស់យើងនឹងអាចធ្វើឲ្យមានលក្ខណៈផ្ទាល់ខ្លួន និងសុវត្ថិភាពបណ្ដាញរបស់ពួកគេនៅក្នុងចំណុចតម្លៃទាប ដោយសារតែ Minim ជាដៃគូបច្ចេកវិទ្យារបស់យើង»។
លោក Gray Chynoweth អគ្គនាយកក្រុមហ៊ុន Minim បានថ្លែងថា៖ «យើងមានមោទនភាពដែលត្រូវបានជ្រើសរើសដោយក្រុមហ៊ុន EZECOM សម្រាប់ផលិតផលនេះ»។ លោកបន្តថា៖ «អាស៊ីប៉ាស៊ីហ្វិកត្រូវបានគេព្យាករថា នឹងកើនឡើងខ្លាំងលើទីផ្សារស្មាតហូមត្រឹមឆ្នាំ ២០៣០។ បែបនោះច្បាស់ហើយថា ក្រុមហ៊ុន EZECOM គឺជាក្រុមហ៊ុនផ្ដល់សេវាដែលគិតអំពីផែនការសម្រាប់អនាគតជាមួយនឹងការចងចាំល្អបំផុតរបស់អតិថិជនរបស់ពួកគេ។ យើងមិនអាចរង់ចាំមើលរហូតទាល់តែមាន EzeWiFi នៅក្នុងលំនៅឋានរបស់មនុស្សជាច្រើននោះទេ»។
ក្រុមហ៊ុន Minim គឺជាកម្មវិធីគ្រប់គ្រង WiFi និងសន្ដិសុខដែលជំរុញដោយ AI សម្រាប់លំនៅឋានវៃឆា្លត។ ជាមួយនឹងសេរីភាពនៃជម្រើស CPE ការសម្រុះសម្រួលបណ្ដាញស្វ័យប្រវត្តិរបស់ក្រុមហ៊ុន Minim និងកម្មវិធីដែលអាចប្រើប្រាស់បាន បានជួយដល់ប្រតិបត្តិករបង្កើនទំនុកចិត្ត និងការរក្សាអតិថិជន ខណៈវានឹងកាត់បន្ថយការហៅទូរស័ព្ទ និងការចំណាយលើការដឹកជញ្ជូនដល់ ៥០ ភាគរយ។
ទិន្នន័យបានពីនិយតករទូរគមនាគមន៍កម្ពុជា (TRC) ឲ្យដឹងថាកាលពីខែសីហាឆ្នាំមុន ប្រទេសកម្ពុជាមានក្រុមហ៊ុនផ្តល់សេវាអ៊ីនធឺណិត (ISP) ចំនួន ១៨ ក្នុងនោះក្រុមហ៊ុនអ៊ីនធឺណិតចល័ត ៦ និងអ៊ីនធឺណិតភ្ជាប់ខ្សែ ១២ ជាមួយនឹងអតិថិជនប្រើប្រាស់អ៊ីនធឺណិតជាង ១៦ លាននាក់ធៀបនឹងជាង ១៣,៦ លានកាលពីចុងឆ្នាំ ២០១៨ កើនឡើងជាង ១៧,៦ ភាគរយ៕LA