.jpg)
កសិករកំពុងច្រូតស្រូវក្នុងរដូវប្រមូលផលកន្លងមក។ ភ្នំពេញ ប៉ុស្តិ៍
ភ្នំពេញៈ អង្គការស្បៀង និងកសិកម្មនៃអង្គការសហប្រជាជាតិ (FAO) បានផ្ដល់មូលនិធិ ១,៣ លានដុល្លារ សម្រាប់ការធ្វើការអង្កេតចន្លោះជំរឿនកសិកម្មនៅកម្ពុជាដើម្បីកំណត់ផលិតផលកសិកម្មមានសក្ដានុពលណាមួយ សម្រាប់ក្រុមវិនិយោគិនដែលសម្លឹងមើលនៅក្នុងវិស័យនេះ។
ការអង្កេតចន្លោះជំរឿនកសិកម្មសម្រាប់ឆ្នាំ ២០១៩ ដែលបានគាំទ្រមូលនិធិដោយ USAID និងមូលនិធិ Bill and Melinda Gates Foundation ត្រូវបានចុះហត្ថលេខាកាលពីម្សិលមិញ រវាងអង្គការ FAO និងក្រសួងផែនការ ដើម្បីប្រមូលស្ថិតិកសិកម្មពិតប្រាកដនៅកម្ពុជា ហើយនឹងត្រូវបានប្រើប្រាស់ ជាគោលនយោបាយគោលការណ៍ណែនាំសម្រាប់ក្រុមវិនិយោគិន។
ការអង្កេតចន្លោះជំរឿនកសិកម្មនេះ នឹងអនុវត្តនៅឆ្នាំ២០១៩ ហើយការអង្កេតចន្លោះជំរឿននេះ នឹងធ្វើឡើងជារៀងរាល់ឆ្នាំក្នុងរយៈពេល១០ឆ្នាំ។
លោក Alexandre Huynh តំណាងអង្គការ FAO ប្រចាំនៅប្រទេស កម្ពុជា បានឲ្យដឹងថាកម្ពុជា គឺជាប្រទេសដំបូងនៅក្នុងតំបន់ដែលត្រូវបានជ្រើសរើសសម្រាប់កម្មវិធីនេះ។
លោកថ្លែងថា៖ «លទ្ធភាព និងការទទួលបានទិន្នន័យទាន់ពេលវេលា និងជឿទុកចិត្តបាន គឺពិតជាមានសារៈសំខាន់ សម្រាប់ការអភិវឌ្ឍគោលនយោបាយឆ្លើយតបនឹងកម្មវិធីកសិកម្ម ដែលរីកចម្រើន ព្រមទាំងរួមចំណែកយ៉ាងសំខាន់ដល់ប្រតិបត្តិការវិនិយោគ និងទីផ្សារនៅក្នុងប្រទេស»។
លោកបន្ថែមថា កម្មវិធីនេះនឹងដាក់ជាធាតុចូលទៀងទាត់នៃស្ថិតិកសិកម្ម និងមូលដ្ឋានដ៏រឹងមាំ សម្រាប់ការធ្វើឲ្យប្រសើរដល់គោលនយោបាយ និងការសម្រេចចិត្តនៅក្នុងវិស័យកសិកម្ម។
លោកបន្តថា៖ «គំនិតផ្ដួចផ្ដើមនេះ ត្រូវបានបង្កើតឡើង ដើម្បីផ្ដល់ព័ត៌មានដល់អ្នកបង្កើតគោលនយោបាយ និងបម្រើដល់ការអភិវឌ្ឍបន្ថែម នៃវិស័យនេះ ដើម្បីលើកកម្ពស់សន្ដិសុខស្បៀង និងជីវភាពកសិករខ្នាតតូច ព្រមទាំងដើម្បីការកាត់បន្ថយភាពក្រីក្រ»។
ជំរឿនកសិកម្មកម្ពុជាថ្នាក់ជាតិដំបូងរបស់កម្ពុជា ចាប់ផ្ដើមកាលពីឆ្នាំ ២០១៣ ដោយចំណាយជាង ៥,២ លានដុល្លារ ដែលផ្ដល់ដោយរដ្ឋាភិបាល អង្គការ AusAid ទីភ្នាក់ងារអភិវឌ្ឍន៍អន្តរជាតិស៊ុយអែត អង្គការ FAO និង USAID។
លទ្ធផលជំរឿន ៣៣ ទំព័របញ្ជាក់ថា ប្រជាជន ២,២ លានគ្រួសារ ក្នុងចំណោម ២,៦ លានគ្រួសារ ឬ៨៥ ភាគរយនៃគ្រួសារទាំងអស់ចូលរួមក្នុងសកម្មភាព ដែលជាប់ទាក់ទងនឹងកសិកម្ម ដូចជា ការដាំដុះស្រូវ ការចិញ្ចឹមបសុសត្វ ការនេសាទ និងកៅស៊ូ។
លោក ឆាយ ថន រដ្ឋមន្ដ្រីក្រសួងផែនការ បានឲ្យដឹងថា ការអង្កេតនឹងធ្វើការងារទូទាំងប្រទេស តាមរយៈការជ្រើសរើសគំរូភូមិ ៨០០ ដើម្បីប្រមូលស្ថិតិកសិកម្ម។
លោកថ្លែងថា៖ «លទ្ធផលនៃការអង្កេតនេះ មានតួនាទីដ៏សំខាន់ ក្នុងការអភិវឌ្ឍលើគោលនយោបាយកសិកម្ម ដើម្បីលើកកម្ពស់កំណើនសេដ្ឋកិច្ច»។
លោកបន្ថែមថា វានឹងជាធាតុចូលសម្រាប់ការជំរឿនថ្នាក់ជាតិសម្រាប់ផែនការ ៥ ទៅ ១០ ឆ្នាំ នៃការអភិវឌ្ឍកសិកម្ម៕LA
