ក្រុងប៊ុយណូស៊ែៈ តម្លៃរូបិយប័ណ្ណប៉េសូរបស់អាហ្សង់ទីនកាលពីថ្ងៃសុក្របានបញ្ចប់ភាពចលាចលដែលកើតមានរយៈពេលមួយសប្ដាហ៍មកនេះ ដែលបានធ្លាក់ចុះ ២០ ភាគរយនៃតម្លៃរបស់ខ្លួនធៀបទៅនឹងប្រាក់ដុល្លារអាមេរិក ខណៈទីភ្នាក់ងារវាយតម្លៃចំណាត់ថ្នាក់បំណុល Fitch និង S&P បានទម្លាក់ចំណាត់ថ្នាក់បំណុលរយៈពេលវែងរបស់ប្រទេសអាមេរិកខាងត្បូងមួយនេះ ដោយលើកឡើងពីភាពមិនច្បាស់លាស់ និងហានិភ័យនៃការកើតមានភាពក្ស័យធន។
តម្លៃប្រាក់ប៉េសូបានកើនឡើង ២,៧៥ ភាគរយដោយជួញដូរក្នុងតម្លៃ ៥៨,១២ ធៀបនឹងប្រាក់ដុល្លារកាលពីថ្ងៃសុក្រ បន្ទាប់ពីការធ្លាក់ចុះតម្លៃខ្លាំងជាច្រើនថ្ងៃត្រូវបានបញ្ឈប់កាលពីថ្ងៃព្រហស្បតិ៍ បន្ទាប់ពីមានការអំពាវនាវរួមគ្នាមួយឲ្យមានការស្ងៀមស្ងាត់ដែលធ្វើឡើងដោយលោកប្រធានាធិបតី Mauricio Macri និងលោក Alberto Fernandez ដែលជាដៃគូប្រកួតប្រជែងប្រកាន់កណ្ដាលឆ្វេងនិយមក្នុងការបោះឆ្នោតជ្រើសរើសប្រធានាធិបតីរបស់ប្រទេសអាហ្សង់ទីន។
ប៉ុន្តែចក្ខុវិស័យនៅតែមិនច្បាស់លាស់ បន្ទាប់ពីទីផ្សារនានាបានធ្លាក់ចូលក្នុងភាពចលាចល បន្ទាប់ពីការបរាជ័យយ៉ាងខ្លាំងរបស់លោកប្រធានាធិបតី Macri ដែលកំពុងកាន់អំណាចក្រោមថ្វីដៃរបស់លោក Fernandez ដែលជាអ្នកនយោបាយប្រជានិយមនៅក្នុងការបោះឆ្នោតជុំដំបូងនៅទូទាំងប្រទេសកាលពីថ្ងៃអាទិត្យ ទី ១១ ខែសីហា។
ក្រុមអ្នកវិភាគមកពីក្រុមហ៊ុន Capital Economics បានឲ្យដឹងក្នុងរបាយការណ៍មួយថា៖ «តម្លៃប្រាក់ប៉េសូរបស់ប្រទេសអាហ្សង់ទីនមានស្ថិរភាពឡើងវិញក្នុងរយៈពេលជួញដូរ ២-៣ ថ្ងៃកន្លងមកនេះ ប៉ុន្តែការធ្លាក់ចុះនៅដើមសប្ដាហ៍មុន បានធ្វើឲ្យភាពគ្មានលទ្ធភាពសងបំណុលរបស់រដ្ឋាភិបាលទំនងជាកើនឡើងយ៉ាងខ្លាំង»។
ទីភ្នាក់ងារវាយតម្លៃ Fitch បានទម្លាក់ចំណាត់ថ្នាក់ឥណទានរបស់រដ្ឋាភិបាលអាហ្សង់ទីនដែលរងផលប៉ះពាល់ដោយវិបត្តិមួយនេះ ២ ចំណាត់ថ្នាក់ពី «B» មកនៅត្រឹម «CCC»។ ក្រុមហ៊ុន Standard &Poor''s បានទម្លាក់ចំណាត់ថ្នាក់ឥណទានមួយចំណាត់ថ្នាក់ពី «B» មកត្រឹម «B-»។
ទីភ្នាក់ងារវាយតម្លៃ S&P បានឲ្យដឹងថា៖ «ភាពចលាចលរបស់ទីផ្សារហិរញ្ញវត្ថុដែលបានប្រកាសឡើងជាមួយនឹងការធ្លាក់ថ្លៃខ្លាំងនៃប្រាក់ប៉េសូរបស់ប្រទេសអាហ្សង់ទីន និងការកើនឡើងអត្រាការប្រាក់បានធ្វើឲ្យចុះខ្សោយយ៉ាងខ្លាំងនូវប្រវត្តិហិរញ្ញវត្ថុដែលងាយទទួលរងគ្រោះរួចហើយ (របស់ប្រទេសអាហ្សង់ទីន)»។
ទីភ្នាក់ងារវាយតម្លៃ Fitch បានឲ្យដឹងក្នុងសេចក្ដីប្រកាសរបស់ខ្លួនថា៖ «ការទម្លាក់ចំណាត់ថ្នាក់ឥណទានរបស់ប្រទេសអាហ្សង់ទីនឆ្លុះបញ្ចាំងពីភាពមិនច្បាស់លាស់ផ្នែកគោលនយោបាយដែលកំពុងកើនឡើង ការរឹតបន្តឹងកាន់តែខ្លាំងនៃលក្ខខណ្ឌហិរញ្ញវត្ថុ និងភាពកាន់តែអាក្រក់ទៅតាមការរំពឹងទុកនៃបរិយាកាសម៉ាក្រូសេដ្ឋកិច្ចដែលបង្កើនលទ្ធភាពនៃការកើតមានភាពក្ស័យធន សងបំណុល ឬការរៀបចំរចនាសម្ព័ន្ធមួយចំនួនឡើងវិញ»។
ទីភ្នាក់ងារវាយតម្លៃ Fitch បានឲ្យដឹងថា ការបរាជ័យផ្នែកនយោបាយយ៉ាងខ្លាំងរបស់គណបក្សប្រកាន់កណ្ដាលស្ដាំនៅក្នុងការបោះឆ្នោតជុំដំបូង «បង្កើនហានិភ័យនៃការបែកបាក់ដោយសារយុទ្ធសាស្ដ្រនយោបាយរបស់រដ្ឋាភិបាលបច្ចុប្បន្នរបស់លោក Mauricio Macri ដែលបានដឹកនាំដោយកម្មវិធីមួយជាមួយនឹងមូលនិធិរូបិយវត្ថុអន្តរជាតិ (IMF)»៕ LA