ភ្នំពេញៈ ក្រុមហ៊ុនធានារ៉ាប់រង Forte បានបើកដំណើរការសេវាធានារ៉ាប់រងលើការធ្វើដំណើរតាមអនឡាញនៅកម្ពុជាដែលជាផលិតផលថ្មីដំបូងនៅក្នុងតំបន់។
មន្រ្តីរដ្ឋាភិបាល និងអ្នកនៅក្នុងវិស័យនេះឲ្យដឹងថាផលិតផលនេះនឹងចាប់យកកំណើនទេសចរកម្ពុជាទៅក្រៅប្រទេស។
ទិន្នន័យបានពីក្រសួងទេសចរណ៍បានបង្ហាញពីចំនួនទេសចរកម្ពុជាដែលចេញទៅក្រៅប្រទសបានកើនឡើងជាង១០ភាគរយកាលពីឆ្នាំ២០១២ដល់ ៧៩២ ៣៩៨នាក់ បើធៀបនឹងឆ្នាំ២០១១ ដែលមាន៧០៩ ៦១៦នាក់។
លោក យុគ ចំរើនរិទ្ធិ អគ្គនាយកក្រុមហ៊ុនធានារ៉ាប់រង Forte បានប្រាប់ភ្នំពេញប៉ុស្ដិ៍កាលពីថ្ងៃពុធថាផលិតផលតាមអនឡាញត្រូវបានចាប់ផ្តើមក្នុងទីផ្សារកម្ពុជាកាលពីសប្តាហ៍មុនដើម្បីផ្ដល់ភាពងាយស្រួលដល់អតិថិជន។
លោកបានបន្តថា៖ «ការធានាលើការធ្វើដំណើរគឺមិនមែនជាផលិតផលថ្មីនោះទេសម្រាប់ឧស្សាហកម្មធានារ៉ាប់រង។ប៉ុន្តែសេវាធានារ៉ាប់រងការធ្វើដំណើរតាមអនឡាញគឺថ្មី»។ លោកបន្តថា សូម្បីតែបណ្ដាប្រទេសជិតខាងក៏មិនទាន់បានផ្ដល់សេវាកម្មនេះនៅឡើយទេ។ លោកថ្លែងថា៖ «យើងគឺជាក្រុមហ៊ុនមុនគេដែលដំណើរការសេវាកម្មនេះក្នុងប្រទេសកម្ពុជា។ចាប់ពីពេលនេះតទៅសម្រាប់អ្នកដែលត្រូវការធានារ៉ាប់រងក្នុងការធ្វើដំណើរពួកគេអាចចូលទៅអ៊ីនធឺណិតខណៈពួកគេតែងតែទៅទាក់ទងភ្នាក់ងារធ្វើដំណើរដោយផ្ទាល់ឬក៏មកកាន់ការិយាល័យរបស់ខ្ញុំ។
លោកឆាយ រតនៈ អគ្គនាយកសមាគមធានារ៉ាប់រងកម្ពុជាទទួលស្គាល់ថាដំណើរការសេវាតាមអ៊ីនធឺណិតផ្តល់ប្រយោជន៍ដល់អតិថិជន។ លោកថ្លែងថា៖«វាគឺជារឿងដំបូងគេក្នុងឧស្សាហកម្មធានារ៉ាប់រងរបស់កម្ពុជាព្រោះវាធម្មតាបានផ្ដល់ដោយក្រុមហ៊ុនបរទេសនៅក្រៅស្រុក»។ លោកបន្តថាចំពោះអ្នកដែលចង់ធ្វើដំណើរទៅអឺរ៉ុបគឺតម្រូវឲ្យទិញការធានារ៉ាប់រងធ្វើដំណើរ៖ «វាជាការចាប់បង្ខំ។ បើពួកគេមិនទិញពួកគេមិនត្រូវបានផ្ដល់ទិដ្ឋាការទេ»។
ទិន្នន័យបានពីសមាគមធានារ៉ាប់រងទូទៅកម្ពុជាបានឲ្យដឹងថាប្រាក់ចំណូលធានាបានកើនឡើងជាង២០ភាគរយពីមួយឆ្នាំទៅមួយឆ្នាំបានទទួល៣៦ លានដុល្លារក្នុងឆ្នាំ២០១២ ខណៈការទារសំណងបានធ្លាក់ចុះយ៉ាងខ្លាំង៕ PB
