.jpg)
Furi Times Square ជាមជ្ឈមណ្ឌលពាណិជ្ជកម្មដែលនឹងមានហាងលក់ទំនិញធំៗលំដាប់អន្តរជាតិ ស្ថិតក្នុងខេត្តព្រះសីហនុ។ ហ្វេសប៊ុក
ភ្នំពេញៈ មជ្ឈមណ្ឌលពាណិជ្ជកម្មទី ១ ក្នុងក្រុងព្រះសីហនុដែលមានតម្លៃ ១០ លានដុល្លារជាការវិនិយោគរួមគ្នារវាងក្រុមហ៊ុននៅក្នុងស្រុក Furi Real Estate និងក្រុមហ៊ុនមកពីចិនបានបើកដំណើរការសាកល្បងហើយកាលពីថ្ងៃចន្ទ។
Furi Times Square បានចាប់ផ្តើមសាងសង់កាលពីអំឡុងខែកញ្ញា ឆ្នាំ ២០១៨ លើផ្ទៃដី ១ ហិកតាដោយមានកម្ពស់ ៥ ជាន់ និងមានផ្ទៃសំណង់ ១៥ ០០០ ម៉ែត្រការ៉េ។
កញ្ញា លីម សុខាដាវីន ប្រធានផ្នែកទីផ្សារក្រុមហ៊ុន Furi Real Estate បានប្រាប់ភ្នំពេញប៉ុស្តិ៍កាលពីម្សិលមិញថា នៅក្នុងដំណាក់កាលបើកសាកល្បងនេះមានតែជាន់ទី ១ និងជាន់ទី ២ ប៉ុណ្ណោះដែលបើកឲ្យអតិថិជនចូលកម្សាន្ត ខណៈពិធីបើកជាផ្លូវការនឹងធ្វើឡើងក្នុងពេលឆាប់ៗ។
Furi Times Square ជាមជ្ឈមណ្ឌលពាណិជ្ជកម្មដែលនឹងមានហាងលក់ទំនិញធំៗលំដាប់អន្តរជាតិជាច្រើនដូចជា KFC, Starbucks, LEVINIKE, Amazone Cafe និង G-Shock ជាដើម។
កញ្ញា សុខាដាវីន បានថ្លែងថា៖ «តាមរយៈការបើកដំណើរការរយៈពេល ២ ថ្ងៃនេះ ខ្ញុំសង្កេតឃើញមានអតិថិជនទាំងក្នុងស្រុក និងជនបរទេសជាច្រើនបានចូលមកទស្សនា និងទិញទំនិញនៅក្នុង Furi Times Square»។
កញ្ញាប្រាប់ទៀតថារហូតមកដល់ពេលនេះអត្រាជួលប្រើប្រាស់ក្នុងអគារ Furi Times Square ទាំងមូលមានប្រមាណ ៨០ ភាគរយ។ ទោះជាយ៉ាងណាតម្លៃជួលនៅក្នុងអគារនេះមិនត្រូវបានបង្ហើបឲ្យដឹងនោះទេ។
នៅជាន់ក្រោមដីនៃ Furi Times Square នឹងប្រើប្រាស់សម្រាប់ផ្សារទំនើប ជាន់ទី ១ ជាកន្លែងលក់អាហារ និងភេសជ្ជៈជាន់ទី ២ កន្លែងលក់សម្លៀកបំពាក់ជាន់ទី ៣ ហាងអាហារធំៗ ជាន់ទី ៤ រោងភាពយន្ត និងកន្លែងកម្សាន្តផ្សេងៗ និងជាន់ទី ៥ ជា Skybar។
ខណៈខេត្តព្រះសីហនុទទួលបានកំណើនភ្ញៀវទេសចរជាបន្តបន្ទាប់នោះកញ្ញា ដាវីន បាននិយាយថា តម្រូវការផ្សារទំនើបនៅក្នុងខេត្តព្រះសីហនុនៅមានច្រើនបន្ថែមទៀត។
កញ្ញាអះអាងថា៖ «គោលនយោបាយរបស់រដ្ឋាភិបាលកម្ពុជាក្នុងការអភិវឌ្ឍខេត្តព្រះសីហនុនឹងធ្វើឲ្យចំនួនប្រជាជន និងភ្ញៀវទេសចរកើនឡើងច្រើននៅខេត្តព្រះសីហនុ ហេតុនេះតម្រូវការមជ្ឈមណ្ឌលពាណិជ្ជកម្មក៏នឹងកើនច្រើនដែរនាពេលខាងមុខ»។
របាយការណ៍ក្រសួងរៀបចំដែនដី នគរូបនីយកម្ម និងសំណង់បានឲ្យដឹងថា ទុនវិនិយោគវិស័យសំណង់នៅកម្ពុជាក្នុងឆ្នាំ ២០១៩ នេះមានតម្លៃប្រមាណជាង ៩,៣ ពាន់លានដុល្លារកើនឡើង ៧៨ ភាគរយបើធៀបនឹងឆ្នាំ ២០១៨ ដែលកំណើនភាគច្រើនបានមកពីការសាងសង់ដ៏ច្រើននៅក្នុងខេត្តព្រះសីហនុ៕ LA
