.jpg)
ក្រុមរដ្ឋមន្ត្រីហិរញ្ញវត្ថុ G7 កំពុងពិភាក្សាគ្នាក្នុងកិច្ចប្រជុំកាលពីថ្ងៃពុធ។ រូបថត AFP ហុង មិនា
ក្រុងហ្សង់ទីលីៈ ក្រុមប្រទេសមានឧស្សាហកម្មរីកចម្រើនទាំង ៧ (G7) ក្នុងពិភពលោក មានក្តីបារម្ភចំពោះរូបិយប័ណ្ណឌីជីថល លីប្រា (Libra) ដែលគ្រោងនឹងបង្កើតឡើងដោយក្រុមហ៊ុន Facebook និងមានការព្រមព្រៀងរួមគ្នាមួយអំពីតម្រូវការក្នុងការចាត់វិធានការឲ្យបានឆាប់រហ័ស។ នេះបើយោងតាមមន្ត្រីបារាំងម្នាក់កាលពីថ្ងៃពុធ។
ក្រុមហ៊ុន Facebook កាលពីខែមុនបានដាក់បង្ហាញផែនការរបស់ខ្លួនសម្រាប់រូបិយប័ណ្ណឌីជីថល លីប្រា ក្នុងការប្រកាសមួយដែលត្រូវបានស្វាគមន៍ជាមួយក្តីបារម្ភពីសំណាក់រដ្ឋាភិបាលនានា និងក្រុមអ្នករិះគន់បណ្តាញសង្គមមួយនេះនៅជុំវិញពិភពលោក។
បញ្ហានេះស្ថិតនៅចំពោះមុខមុនគេរបស់ក្រុមរដ្ឋមន្ត្រី និងមន្ត្រីធនាគារកណ្តាលមកពីក្រុមប្រទេស G7 ដែលជាប្រទេសមានសេដ្ឋកិច្ច និងឧស្សាហកម្មរីកលូតលាស់បំផុតក្នុងពិភពលោក ខណៈដែលក្រុមមន្ត្រីទាំងនោះបានចាប់ផ្តើមកិច្ចប្រជុំរយៈពេល ២ ថ្ងៃ នៅទីក្រុងហ្សង់ទីលី ដែលស្ថិតនៅក្រៅទីក្រុងប៉ារីស ប្រទេស បារាំង កាលពីថ្ងៃពុធ។
មន្ត្រីរូបនេះដែលស្នើសុំមិនបញ្ចេញឈ្មោះបានថ្លែងថា៖ «ចំពោះរូបិយប័ណ្ណឌីជីថល លីប្រា យើងមានការពិភាក្សាប្រកបដោយស្ថាបនា និងលម្អិតខ្លាំងជាមួយនឹងការព្រមព្រៀងរួមគ្នាខ្លាំងបំផុតមួយទៅលើភាពចាំបាច់ក្នុងការចាត់សកម្មភាព»។
មន្ត្រីរូបនេះបានថ្លែងថា៖ «ក្តីបារម្ភត្រូវបានស្តែងឡើងដោយអ្នកចូលរួមទាំងអស់អំពីស្ថានភាពបច្ចុប្បន្ន និងតម្រូវការក្នុងការចាត់វិធានការភ្លាម»។
ស្ថានភាពមិនទាន់សមស្រប
រដ្ឋមន្ត្រីហិរញ្ញវត្ថុរបស់ប្រទេស បារាំង និងអាល្លឺម៉ង់ កន្លងមកបានសម្តែងភាពមិនប្រាកដប្រជាខ្លាំងអំពីផែនការរបស់ក្រុមហ៊ុន Facebook ដោយសារផលប៉ះពាល់ដែលអាចកើតមានរបស់រូបិយប័ណ្ណលីប្រាទៅលើស្ថិរភាពហិរញ្ញវត្ថុពិភពលោក។
លោក Olaf Scholz រដ្ឋមន្ត្រីក្រសួងហិរញ្ញវត្ថុអាល្លឺម៉ង់បានថ្លែងថា៖ «ក្រុមរដ្ឋមន្ត្រីហិរញ្ញវត្ថុ និងមន្ត្រីធនាគារកណ្តាលរបស់ក្រុមប្រទេស G7 ដែលមានវត្តមាននៅទីនេះ [ក្នុងកិច្ចប្រជុំនៅបារាំង] មានក្តីបារម្ភខ្លាំង»។
លោកបន្ថែមថា៖ «យើងចង់ឲ្យមានភាពប្រាកដប្រជាថា រាល់បទប្បញ្ញត្តិជាធរមានទាំងអស់ត្រូវបានគេប្រកាន់ខ្ជាប់ ហើយប្រសិនបើបទប្បញ្ញត្តិទាំងនេះគួរត្រូវបានកែប្រែក្នុងពេលអនាគត ដូច្នេះយើងអាចធានាបាននូវស្ថិរភាពប្រព័ន្ធហិរញ្ញវត្ថុអន្តរជាតិ»។
លោកបន្ថែមថា៖ «យើងកំពុងជជែកអំពីស្ថិរភាពរូបិយប័ណ្ណ សន្តិសុខ ការការពារទិន្នន័យ និងការគ្រប់គ្រងប្រជាធិបតេយ្យ»។
រដ្ឋមន្ត្រីក្រសួងហិរញ្ញវត្ថុបារាំងលោក Bruno Le Maire ដែលបានព្រមានអំពីរូបិយប័ណ្ណលីប្រានេះជាច្រើនដងចាប់តាំងពីការប្រកាសបង្កើតឡើងមកនោះ បានថ្លែងថា៖ «បច្ចុប្បន្ន ស្ថានភាពមិនទាន់ស័ក្តិសមនៅឡើយទេ សម្រាប់ការដាក់ដំណើរការលីប្រា»។
លោកថ្លែងថា លោកសង្ឃឹមថា G7 នឹងពិចារណាលើភាពចាំបាច់ក្នុងការបង្កើត «ក្របខ័ណ្ឌ ឬបទប្បញ្ញត្តិមួយ» ហើយក៏ពិចារណាលើ «អ្វីដែលនឹងតជាលក្ខខណ្ឌដែលនឹងធ្វើឲ្យឧបករណ៍ [ហិរញ្ញវត្ថុបែបនេះ] អាចដំណើរការទៅបាន»។
ការលើកឡើងពីហានិភ័យទាំងនះដោយរដ្ឋមន្ត្រីទាំង ២ រូបនេះ ក៏ទទួលបានការឯកភាពពីលោក Steven Mnuchin រដ្ឋមន្ត្រីហិរញ្ញវត្ថុរបស់អាមេរិក ដែលក៏មានវត្តមាននៅក្នុងកិច្ចប្រជុំនេះផងដែរ។
លោក Mnuchin ថ្លែងថា ក្រុមហ៊ុន Facebook ត្រូវឆ្លើយតប «ទៅនឹងស្តង់ដាខ្ពស់ខ្លាំងមួយ» មុនពេលចាត់វិធានការទៅមុខទៀតសម្រាប់លីប្រា។ លោកបន្ថែមថា និយតករអាមេរិកបានសម្តែងក្តីបារម្ភរួចហើយទៅកាន់ក្រុមហ៊ុននេះ៕ AFP/KC
