ភ្នំពេញ: អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ (GDT) បានពន្យារពេល ១ ខែសម្រាប់ការបង់ពន្ធលើអចលនទ្រព្យឆ្នាំ ២០២០ ដើម្បីផ្តល់លទ្ធភាពឱ្យម្ចាស់អចលនទ្រព្យដែលមិនទាន់ប្រកាសពន្ធមកបំពេញកាតព្វកិច្ចបង់ពន្ធ។
អគ្គនាយកដ្ឋានពន្ធដារបានឱ្យដឹងក្នុងសេចក្តីជូនដំណឹងថា ខ្លួនសម្រេចពន្យារកាលបរិច្ឆេទផុតកំណត់ប្រកាសបង់ពន្ធលើអចលនទ្រព្យសម្រាប់ឆ្នាំ ២០២០ រហូតដល់ថ្ងៃទី ៣១ ខែតុលា ឆ្នាំនេះ ដែលកាលបរិច្ឆេទបង់ពន្ធតម្រូវកាលលើកមុននឹងត្រូវផុតកំណត់ត្រឹមដំណាច់ខែនេះ។
ការសម្រេចពន្យារពេលនេះធ្វើឡើងបន្ទាប់ពីអគ្គនាយកដ្ឋានពន្ធដារកត់សម្គាល់ថា មានម្ចាស់អចលនទ្រព្យមួយចំនួនមិនទាន់បានបំពេញកាតព្វកិច្ចប្រកាសបង់ពន្ធប្រភេទនេះស្របតាមសេចក្តីជូនដំណឹងមុននៅឡើយ។
សេចក្តីប្រកាសព័ត៌មាន៖ «អគ្គនាយកដ្ឋានពន្ធដារសង្ឃឹមយ៉ាងមុតមាំថា ក្នុងអំឡុងពេលនៃការពន្យារការបង់ពន្ធប្រភេទនេះ ម្ចាស់អចលនទ្រព្យទាំងអស់នឹងរួសរាន់មកប្រកាសបង់ពន្ធបានទាន់ពេលវេលា និងគ្រប់ៗគ្នាតាមការកំណត់ជាក់ជាមិនខាន»។
លោក ប៉ូ អ៊ាវគង់ អគ្គនាយក និងជាស្ថាបនិកក្រុមហ៊ុន Advance Real Estate Co,. Ltd ប្រាប់ភ្នំពេញប៉ុស្តិ៍កាលពីថ្ងៃចន្ទថា ការសម្រេចពន្យារពេលការបង់ពន្ធប្រភេទនេះ គឺជាការផ្តល់លទ្ធភាពបន្ថែមទៀតដល់អ្នកជាប់ពន្ធទៅបង់ពន្ធនៅអគ្គនាយកដ្ឋានពន្ធដារ ប៉ុន្តែលោកយល់ថា ការពន្យារពេលនេះគួរអូសបន្លាយរហូតដល់ដំណាច់ឆ្នាំព្រោះកតា្តប្រឈមជាច្រើន។
លោកថ្លែងថា៖ «ខ្ញុំគិតថាជារឿងល្អ និងជាការលើកទឹកចិត្តដល់អ្នកដែលមិនទាន់បានបង់ពន្ធឱ្យគាត់ចូលមកប្រកាស បង់ពន្ធអចលនទ្រព្យប្រចាំឆ្នាំ ប៉ុន្តែរដ្ឋគួរពន្យារពេលនេះដល់ចុងឆ្នាំនេះកាន់តែល្អ ព្រោះបញ្ហាជំងឺកូវីដ ១៩ និងភាពស្មុគស្មាញនៃការបំពេញបែបបទឯកសារបង់ពន្ធប្រភេទនេះនឹងក្លាយជាឧបសគ្គសម្រាប់អ្នកជាប់ពន្ធ»៕ LA