.jpg)
ការបង់ពន្ធអចលនទ្រព្យសម្រាប់ឆ្នាំ ២០២០ នេះនឹងត្រូវបញ្ចប់នៅថ្ងៃទី ៣០ ខែកញ្ញាខាងមុខ។ ហុង មិនា
ភ្នំពេញៈ រដ្ឋាភិបាលបានកំណត់យកថ្ងៃទី ៣០ ខែកញ្ញា សម្រាប់ពេលវេលាកំណត់របស់ម្ចាស់អចលនទ្រព្យត្រូវបង់ពន្ធសម្រាប់ឆ្នាំ ២០២០ ខណៈនៅមានម្ចាស់អចលនទ្រព្យមួយចំនួននៅមិនទាន់បានបំពេញកាតព្វកិច្ចប្រកាសបង់ពន្ធនៅឡើយនាពេលនេះ។
យោងតាមសេចក្តីជូនដំណឹងពីអគ្គនាយកដ្ឋានពន្ធដារ (GDT) រហូតមកដល់ពេលនេះ GDT សង្កេតឃើញថា មានម្ចាស់អចលនទ្រព្យមួយចំនួននៅមិនទាន់បានបំពេញកាតព្វកិច្ចប្រកាសបង់ពន្ធអចលនទ្រព្យសម្រាប់ឆ្នាំ ២០២០ នៅឡើយ។
សារាចរនេះឲ្យដឹងថា៖ «ដើម្បីលើកកម្ពស់ការប្រមូលពន្ធលើអចលនទ្រព្យ និងដីធ្លីមិនបានប្រើប្រាស់សម្រាប់ឆ្នាំ ២០២០ និងដើម្បីចៀសវាងបាននូវការកកស្ទះ ការប្រជ្រៀតគ្នាមកប្រកាសបង់ពន្ធនៅថ្ងៃជិតផុតកំណត់ ម្ចាស់អចលនទ្រព្យទាំងនោះត្រូវបង់ពន្ធត្រឹមថ្ងៃទី ៣០ ខែកញ្ញា»។ សារាចរនេះបន្តថា ចំពោះអ្នកដែលខកខានមិនបានដាក់លិខិតប្រកាសពន្ធទាន់ពេលវេលាកំណត់ខាងលើ ម្ចាស់អចលនទ្រព្យនឹងរងនូវទោសទណ្ឌតាមច្បាប់ជាធរមាន។
មន្ដ្រី ១ រូបនៅ GDT ដែលសុំមិនបញ្ចេញឈ្មោះបានប្រាប់ភ្នំពេញប៉ុស្តិ៍កាលពីថ្ងៃពុធថា បច្ចុប្បន្នក្រុមមន្ដ្រីរបស់ GDT កំពុងចុះដោយផ្ទាល់ទៅម្ចាស់អចលនទ្រព្យដែលត្រូវបង់ពន្ធ ដើម្បីជូនដំណឹងដល់ពួកគេអំពីកាតព្វកិច្ច និងការវាយតម្លៃឡើងវិញអចលនទ្រព្យដែលសាងសង់បន្ថែម ឬថ្មី។
មន្ដ្រីរូបនោះថ្លែងថា៖ «យើងមានក្រុមមន្ដ្រីរបស់យើងចុះទៅជួបដោយផ្ទាល់នៅតាមខណ្ឌទាំងអស់នៃរាជធានីភ្នំពេញ ដើម្បីធ្វើបច្ចុប្បន្នភាពតម្លៃអចលនទ្រព្យ និងជូនដំណឹងដល់ម្ចាស់អចលនទ្រព្យផ្សេងទៀតដែលមិនបានដឹងថា អចលនទ្រព្យរបស់ពួកគេជាប់កាតព្វកិច្ចបង់ពន្ធ»។
ប្រភពខាងលើបានបន្ថែមថា៖ «ពិតហើយ ពន្ធវាមិនច្រើនទេ ប៉ុន្តែយើងចង់បង្កើតវប្បធម៌នៃការបង់ពន្ធរបស់ប្រជាជនយើង»។
យោងតាមមន្ត្រីដដែលរូបនេះបានឲ្យដឹងថា បន្ទាប់ពីភ្នំពេញ ក្រុមមន្ដ្រីពន្ធដារនៅក្នុងខេត្តសំខាន់ៗមួយចំនួនក៏នឹងចុះទៅដើម្បីជូនដំណឹង និងវាយតម្លៃអចលនទ្រព្យសម្រាប់ម្ចាស់ផងដែរ ដើម្បីចៀសវាងការផាកពិន័យណាមួយនៅពេលអនាគត នៅពេលពួកគេចង់លក់អចលនទ្រព្យនោះ។
លោក Anthony Galliano អគ្គនាយកក្រុមហ៊ុន Cambodian Investment Management បានប្រាប់ភ្នំពេញប៉ុស្ដិ៍ថា ពន្ធអចលនទ្រព្យរបស់ប្រទេសកម្ពុជា គឺមានកម្រិតទាប និងខុសគ្នាពីប្រទេសផ្សេងទៀតក្នុងតំបន់ដែលទទួលបានអត្ថប្រយោជន៍ពីអត្រាពន្ធជាក់ស្ដែង។
លោកថ្លែងថា៖ «ការកើនដ៏ច្រើននៃខុនដូ បុរី និងភាពល្អប្រសើរនៃទីផ្សារអចលនទ្រព្យក្នុងរយៈពេលជាង ៥ ឆ្នាំនេះគួរតែមានការបង្កើនពន្ធដែលនឹងរួមចំណែកដល់ថវិកាជាតិ។ ផ្ទុយទៅវិញប្រាក់ចំណូលពីពន្ធអចលនទ្រព្យនៅតែទាប និងពិបាកអនុវត្តដោយមានត្រឹម ០,១ ភាគរយ នៃផលិតផលក្នុងស្រុកសរុបរបស់ប្រទេស»៕LA
