.jpg)
អគ្គនាយកដ្ឋានពន្ធដារ (GDT)។ ហេង ជីវ័ន
ភ្នំពេញៈ អគ្គនាយកដ្ឋានពន្ធដារ (GDT) បានសម្រេចពន្យារពេលរយៈពេល ៣ ខែ សម្រាប់កាលបរិច្ឆេទនៃការកំណត់ឲ្យប្រើប្រាស់ប្រព័ន្ធគ្រប់គ្រងដាក់លិខិតប្រកាសពន្ធតាមអនឡាញ (E-Filing) តាមការស្នើសុំរបស់វិស័យឯកជន ដែលជាការផ្ដល់ពេលវេលាដល់ពួកគេដើម្បីបានរៀនពីការប្រើប្រាស់ប្រព័ន្ធនេះ។
យោងតាមសេចក្ដីប្រកាសបានមកពី GDT កាលពីថ្ងៃទី ១៦ ខែមិថុនា ការពន្យារពេល E-Filing នេះគិតចាប់ពីខែមិថុនាដល់ខែសីហា ឆ្នាំ ២០២០ ហើយនឹងចាប់ផ្ដើមអនុវត្តចាប់ពីខែកញ្ញា ឆ្នាំ ២០២០ តទៅ ដោយសារតែសហគ្រាសមួយចំនួននៅមិនទាន់បានត្រៀមខ្លួនរួចរាល់សម្រាប់ការប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ (E-Filing) នៅឡើយ។
សេចក្ដីប្រកាសនេះបញ្ជាក់ថា៖ «ក្នុងអំឡុងពេលនេះអ្នកជាប់ពន្ធដែលមិនទាន់ត្រៀមខ្លួនរួចរាល់អាចធ្វើការប្រកាសពន្ធប្រចាំខែស្របតាមទម្រង់នៃលិខិតប្រកាសពន្ធប្រចាំខែចាស់ជាបណ្ដោះអាសន្ន ហើយបន្តប្រើប្រាស់ប្រព័ន្ធអនឡាញសម្រាប់ការគ្រប់គ្រងអាករលើតម្លៃបន្ថែមរបស់អគ្គនាយកដ្ឋានពន្ធដារ (Online-VAT Refund and Online-VAT Credit)។ ប៉ុន្តែសម្រាប់អ្នកជាប់ពន្ធដែលចាប់ផ្ដើមធ្វើការដាក់លិខិតប្រកាសដោយប្រើប្រាស់ប្រព័ន្ធគ្រប់គ្រងការដាក់លិខិតប្រកាសពន្ធតាមអនឡាញ (E-Filing) អាចបន្តប្រើប្រាស់ប្រព័ន្ធនេះជាធម្មតា»។
លោក Anthony Galliano អគ្គនាយកក្រុមហ៊ុន Cambodia Investment Management បានប្រាប់ភ្នំពេញប៉ុស្ដិ៍កាលពីថ្ងៃពុធថា E-Filing ដែលត្រូវបានដាក់ឲ្យដំណើរការដោយ GDT គឺជានវានុវត្តន៍ថ្មីបំផុតសម្រាប់ប្រព័ន្ធគ្រប់គ្រងជាមួយនឹងការប្រើប្រាស់បច្ចេកវិទ្យាដែលមានគុណតម្លៃខ្ពស់ ជំនួសឲ្យការធ្វើឡើងដោយដៃដែលហួសសម័យ។
លោកបានប្រាប់ទៀតថា ការដាក់ឲ្យដំណើរការការចុះបញ្ជីអាជីវកម្មតាមប្រព័ន្ធអនឡាញនាពេលថ្មីៗនេះជាមួយនឹងការដំណើរការរបស់ក្រសួងចំនួន ៣ ដំណាលគ្នានៅពេលតែមួយ គឺជាការផ្លាស់ប្តូរសម្រាប់ប្រទេសកម្ពុជា ធ្វើឲ្យខ្លួនបានដើរត្រសងគ្នាជាមួយនឹងប្រទេសសិង្ហបុរី និងទីក្រុងហុងកុង។
លោកថ្លែងថា៖ «ការបន្ថែមប្រព័ន្ធ E-Filing របស់ GDT នឹងជំរុញបន្ថែមទៀតនូវភាពលេចធ្លោរបស់ប្រទេសកម្ពុជាក្នុងការជួយសម្រួលការធ្វើអាជីវកម្មនៃចំណាត់ថ្នាក់ប្រទេសដែលបច្ចុប្បន្នឈរនៅលំដាប់ទាបទី ១៤៤ នៅក្នុងចំណោម ១៩០ ប្រទេស»។
លោកបន្ថែមថា៖ «ការពន្យារពេលនេះគឺជាការប្រុងប្រយ័ត្នមួយដ៏ល្អជាជាងការមានបញ្ហាទីផ្សារជាមួយនឹងប្រព័ន្ធនេះ។ ច្បាស់ណាស់ GDT មិនទាន់បានត្រៀមខ្លួនរួចរាល់ក្នុងការប្រកាសឲ្យដំណើរការនោះទេ។ ការដាក់ឲ្យដំណើរការបច្ចេកវិទ្យាថ្មីទាំង ២ នៅពេលតែ ១ ខណៈដែលទីផ្សារ និងការគ្រប់គ្រងនឹងត្រូវតែជួបការពិបាកបន្តិចដើម្បីឲ្យស្របទៅតាមការផ្លាស់ប្តូរប្រព័ន្ធទាំង ២ នេះ»។
លោកបានពន្យល់ថា ប្រព័ន្ធ E-Filing នឹងធ្វើឲ្យប្រសើរឡើងអន្តរកម្មរបស់អ្នកជាប់ពន្ធ និងផលិតភាពជាជំហានៗ សន្សំពេលវេលាក្នុងការធ្វើដំណើរទៅសាខាពន្ធដារដើម្បីធ្វើឯកសារដោយដៃ ហើយនេះគឺជាជម្រើសដ៏ល្អបំផុតនៅក្នុងបរិយាកាសនៃការទប់ស្កាត់ការឆ្លងជំងឺកូវីដ ១៩ នេះ ដោយសារការធ្វើដំណើរដោយផ្ទាល់ទៅសាខា ឬការធ្វើទំនាក់ទំនងរវាងមនុស្សដោយផ្ទាល់នោះមិនត្រូវបានលើកទឹកចិត្តឡើយនាពេលនេះ៕LA
