.jpg)
GDT បានអំពាវនាវសុំឲ្យម្ចាស់សហគ្រាសចូលរួមឲ្យមានប្រសិទ្ធភាពក្នុងការអនុវត្តការបង់ពន្ធអាករលើតម្លៃបន្ថែម (VAT) ចំពោះការលក់ទ្រព្យសកម្មរូបីរយៈពេលវែង។ រូបថត ភ្នំពេញ ប៉ុស្ដិ៍
ភ្នំពេញ: អគ្គនាយកដ្ឋានពន្ធដារ (GDT) បានអំពាវនាវសុំឲ្យម្ចាស់សហគ្រាសចូលរួមឲ្យមានប្រសិទ្ធភាពក្នុងការអនុវត្តការបង់ពន្ធអាករលើតម្លៃបន្ថែម (VAT) ចំពោះការលក់ទ្រព្យសកម្មរូបីរយៈពេលវែង។
ការអំពាវនាវនេះធ្វើឡើងបន្ទាប់ពី GDT បានកត់សម្គាល់ថា មានសហគ្រាសមួយចំនួននៅមិនទាន់មានភាពច្បាស់ក្នុងការចូលរួមអនុវត្តអាករលើតម្លៃបន្ថែមនេះ។
យោងទៅតាមសេចក្តីណែនាំរបស់ GDT ចេញផ្សាយកាលពីថ្ងៃចន្ទ សហគ្រាសណាមួយដែលធ្វើការលក់ទ្រព្យសកម្មរូបីរយៈពេលវែង ដែលបានប្រើក្នុងអាជីវកម្មរួមទាំងការផ្តល់ជាអំណោយ ឬការផ្គត់ផ្គង់ក្រោមតម្លៃពិត ឬការផ្ទេរទៅក្នុងសហគ្រាស ១ ផ្សេងទៀតត្រូវគិតអាករលើតម្លៃបន្ថែមតាមអត្រាពន្ធ ១០ ភាគរយតាមតម្លៃទីផ្សារ លើកលែងតែការផ្ទេរអាជីវកម្ម។
GDT បន្តថា ចំពោះទ្រព្យសកម្មរូបីរយៈពេលវែងដែលទទួលឥណទានអាករ ដូចចែងក្នុងមាត្រា ៦៤ នៃច្បាប់ស្តីពីសារពើពន្ធត្រូវបានឈប់ប្រើប្រាស់នៅក្នុងអាជីវកម្មរបស់បុគ្គលជាប់អាករ ទ្រព្យនេះត្រូវចាត់ទុកថាបានលក់ និងត្រូវជាប់អាករលើតម្លៃបន្ថែមតាមតម្លៃទីផ្សារនៅពេលឈប់ប្រើការ។
ដោយឡែកចំពោះទ្រព្យសកម្មរូបីរយៈពេលវែងដែលមិនទទួលបានឥណទានអាករលើធាតុចូលពេលឈប់ប្រើប្រាស់ក្នុងអាជីវកម្ម មិនត្រូវចាត់ទុកថាបានលក់ និងមិនមែនជាកម្មវត្ថុត្រូវជាប់អាករលើតម្លៃបន្ថែមតាមអត្រា ១០ ភាគរយឡើយ ប៉ុន្តែបើទ្រព្យនោះត្រូវបានលក់សហគ្រាសត្រូវគិតអាករលើតម្លៃបន្ថែមតាមអត្រា ១០ ភាគរយ។
GDT ពន្យល់ថា ពាក្យ «ទ្រព្យសកម្មរូបីរយៈពេលវែងឈប់ប្រើការ» សំដៅដល់ទ្រព្យសកម្មរូបីរយៈពេលវែងឈប់ប្រើការ» សំដៅដល់ទ្រព្យសកម្មរូបីរយៈពេលវែងទាំងឡាយដែលសហគ្រាសរក្សាទុក និងមិនប្រើប្រាស់ក្នុងអាជីវកម្ម ដើម្បីចូលរួមក្នុងការបង្កើតផលអាជីវកម្ម។
លោក លឹម ហេង អនុប្រធានសភាពាណិជ្ជកម្មកម្ពុជាបានពន្យល់ថា ទ្រព្យសកម្មរូបីរយៈពេលវែងសំដៅដល់សម្ភារណាដែលប្រើក្នុងរយៈពេលយូរឆ្នាំ ដូចជា រថយន្តដឹកទំនិញធំៗ ម៉ាស៊ីនភ្លើង និងគ្រឿងកែច្នៃបម្រើការក្នុងរោងចក្រជាដើមដែលសម្ភារទាំងនេះនឹងត្រូវបង់ពន្ធ ១០ ភាគរយ ជូនរដ្ឋនៅពេលម្ចាស់អាជីវកម្មលក់។
លោកបន្តថា ទោះយ៉ាងណារដ្ឋាភិបាលគួរធ្វើការពន្យារពេលយកពន្ធលើទ្រព្យសកម្មរូបីរយៈពេលវែងរហូតដល់ស្ថានភាពការរីករាលដាលជំងឺកូវីដ ១៩ មានភាពល្អប្រសើរឡើងវិញ។
លោកថ្លែងថា៖ «ខ្ញុំយល់ថា ក្នុងដំណាក់កាលយើងជួបបញ្ហាសេដ្ឋកិច្ចដោយសារតែវិបត្តិជំងឺកូវីដ១៩ យើងគួរតែពន្យារពេលការអនុវត្តយកពន្ធប្រភេទនេះមួយរយៈសិនទៅ ដើម្បីពួកគេដកដង្ហើមបន្តិច»។
ដោយឡែក សហគ្រាសទាំងឡាយណាដែលធ្វើការផ្គត់ផ្គង់មិនជាប់អាករដូចចែងនៅក្នុងមាត្រា ៥៧ នៃច្បាប់ស្តីពីសារពើពន្ធដែលបានទិញទ្រព្យសកម្មរូបីរយៈពេលវែង ប៉ុន្តែមិនត្រូវបានអនុញ្ញាតឥណទានអាករលើធាតុចូលដូចចែងក្នុងមាត្រា ៦៥ នៃច្បាប់ស្តីពីសារពើពន្ធ នៅពេលលក់ទ្រព្យសកម្មរូបីរយៈពេលវែងត្រូវគិតអាករលើតម្លៃបន្ថែមអត្រា ១០ ភាគរយ។
សេចក្តីណែនាំនេះត្រូវបានដាក់ឲ្យប្រើជំនួសសេចក្តីណែនាំលេខ ១១ ៥៨១ អពដ ចុះថ្ងៃទី ៥ ខែឧសភា ឆ្នាំ ២០២០ ស្តីពីការអនុវត្តអាករលើតម្លៃបន្ថែមចំពោះការបញ្ចេញទ្រព្យសកម្មអាជីវកម្ម។ សេចក្តីណែនាំធ្វើឡើងដើម្បីពង្រឹងប្រសិទ្ធភាពការអនុវត្តច្បាប់ និងបទប្បញ្ញត្តិស្តីពីពន្ធដារឲ្យបានច្បាស់លាស់ តម្លាភាព និងសង្គតិភាព។
សេចក្តីណែនាំបញ្ជាក់ថា៖ «អគ្គនាយកដ្ឋានពន្ធដារសង្ឃឹមយ៉ាងមុតមាំថាគ្រប់សហគ្រាសជាអ្នកជាប់ពន្ធតាមរបបស្វ័យប្រកាសដែលធ្វើសកម្មភាពនៅក្នុងព្រះរាជាណាចក្រកម្ពុជានឹងយកចិត្តទុកដាក់អនុវត្តតាមខ្លឹមសារសេចក្តីណែនាំនេះឲ្យបានប្រសិទ្ធភាពខ្ពស់»៕ LA
