.jpg)
អគ្គនាយកដ្ឋានពន្ធដារ (GDT)។ ហេង ជីវ័ន
ភ្នំពេញៈ អគ្គនាយកដ្ឋានពន្ធដារ (GDT) បានជូនដំណឹងដល់ គ្រឹះស្ថានហិរញ្ញវត្ថុទាំងអស់ត្រូវបញ្ជូនព័ត៌មានគណនីជនជាតិអាមេរិកនៅកម្ពុជាសម្រាប់ឆ្នាំ ២០១៨ មកអគ្គនាយកដ្ឋានពន្ធដារនៅចុងខែមិថុនា ដើម្បីបញ្ជូនទៅអាជ្ញាធរចំណូលក្នុងស្រុករបស់អាមេរិក។ នេះបើយោងតាមសេចក្តីជូនដំណឹងរបស់អគ្គនាយកដ្ឋានពន្ធដារ កាលពីថ្ងៃម្សិលមិញ។
សេចក្តីជូនដំណឹងបានឲ្យដឹងថា អនុលោមតាមកិច្ចព្រមព្រៀងរវាងរដ្ឋាភិបាលកម្ពុជា និងអាមេរិក ដើម្បីធ្វើឲ្យប្រសើរឡើងនៃអនុលោមភាពពន្ធអន្តរជាតិ និងការអនុវត្តច្បាប់ស្តីពីអនុលោមភាពពន្ធចំពោះគណនីក្រៅប្រទេសរបស់អាមេរិក សហគ្រាសធានារ៉ាប់រង និងគ្រឹះស្ថានហិរញ្ញវត្ថុទាំងអស់នៅកម្ពុជា ដែលស្ថិតនៅក្រោមកាតព្វកិច្ចរាយការណ៍ត្រូវបញ្ជូនព័ត៌មាននេះមកអគ្គនាយកដ្ឋានពន្ធដារឲ្យបានត្រឹមថ្ងៃទី ២៨ មិថុនា ជាកំហិត។
អគ្គនាយកដ្ឋានពន្ធដារបានឲ្យដឹងថា ក្នុងករណីហួសកាលកំណត់នេះសហគ្រាសធានារ៉ាប់រង ធនាគារ និងគ្រឹះស្ថានហិរញ្ញវត្ថុត្រូវទទួលខុសត្រូវដោយខ្លួនឯងចំពោះការពិន័យនានាអនុលោមតាមកិច្ចព្រមពៀងនេះ។
សហគ្រាសធានារ៉ាប់រង ធនាគារ និងគ្រឹះស្ថានហិរញ្ញវត្ថុទាំងអស់ ត្រូវបញ្ជូនរបាយការណ៍ព័ត៌មានគណនីជនជាតិអាមេរិក ដែលត្រូវរាយការណ៍ជាទម្រង់បុគ្គល ហើយការបញ្ជូនរបាយការណ៍ព័ត៌មានគណនីជាទម្រង់ Pool report ដែលបានធ្វើរួចហើយរបស់ធនាគារ និងគ្រឹះស្ថានហិរញ្ញវត្ថុទាំងអស់ អគ្គនាយកដ្ឋានពន្ធដារស្នើឲ្យបញ្ជូនជាទម្រង់បុគ្គលវិញ។ នេះបើតាមGDT៕
