ភ្នំពេញ: អង្គការ GIZ របស់អាលឺ្លម៉ង់ និងក្រសួងឧស្សាហកម្ម និងសិប្បកម្មបានជួបពិភាក្សាគ្នា ដើម្បីស្វែងរកយន្តការជួយសម្រួលដល់ការនាំចេញទំនិញ និងនាំចូលវត្ថុធាតុដើមសម្រាប់គាំទ្រវិស័យសហគ្រាសខ្នាតតូច និងមធ្យមនៅកម្ពុជា តាមរយៈគម្រោងការគាំទ្រសមាហរណកម្មអាស៊ានបូកកម្ពុជា (ARISE plus Cambodia)។ នេះបើតាមប្រធាននាយកដ្ឋានសហគ្រាសធុនតូច និងមធ្យម។
លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យមនៃក្រសួងឧស្សាហកម្ម និងសិប្បកម្មបានប្រាប់ភ្នំពេញប៉ុស្តិ៍ពីថ្ងៃព្រហស្បតិ៍ថា គម្រោងនេះនឹងជួយគាំទ្រក្រសួងឧស្សាហកម្ម និងសិប្បកម្ម ដើម្បីជួយគាំទ្រដល់វិស័យ SME នៅកម្ពុជា។
លោកថ្លែងថា៖ «ជាព័ត៌មានបឋមក្រសួងនឹងធ្វើការជ្រើសរើសសហគ្រាសធុនតូច និងមធ្យមដែលមានសក្តានុពលឲ្យចូលរួមក្នុងគម្រោងនេះ ហើយចូលរួមបង្កើតជាយន្តការរួមគ្នាឲ្យស្របជាមួយនឹងនាយកដ្ឋានពន្ធគយ ដើម្បីសម្រួលដល់ SME ធ្វើការនាំចេញទំនិញ និងចូលសម្ភារ និងវត្ថុធាតុដើមបម្រើដល់អាជីវកម្មរបស់ពួកគេប្រកបដោយរលូន»។
លោកបន្តថា គម្រោង ARISE plus Cambodia ជាការផ្តល់ហិរញ្ញប្បទានរួមគ្នាពីសហភាពអឺរ៉ុប និង BMZ អនុវត្តដោយ GIZ របស់អាលឺ្លម៉ង់ដែលអនុវត្តចាប់ពីឆ្នាំ ២០១៩ ដល់ឆ្នាំ ២០២៣ ដែលមានចំនួន ៩,៣៥ លានអឺរ៉ូ (១០,៥ លានដុល្លារ)។ គម្រោងនេះនឹងត្រូវអនុវត្តដោយក្រសួងចំនួន ៣ រួមមានក្រសួងសេដ្ឋកិច្ច និងហិរញ្ញវត្ថុ និងក្រសួងឧស្សាហកម្ម និងសិប្បកម្មដែលក្រសួងពាណិជ្ជកម្មជាតំណាងទទួលហិរញ្ញប្បទាននេះកាលឆ្នាំមុន។
លោកបន្ថែមថា ក្រសួងឧស្សាហកម្មនឹងទទួលបានចំណែកខ្លះពីហិរញ្ញប្បទាននេះ ដោយផ្តោតលើការសម្រួលដល់ការនាំចេញ និងនាំចូលរបស់សហគ្រាសខ្នាតតូច និងមធ្យម ប៉ុន្តែលោកនិយាយថា ថវិកាប្រើប្រាស់សម្រាប់គម្រោងនេះវាអាស្រ័យទៅលើទំហំនៃផែនការ។
លោកបញ្ជាក់ថា៖ «គម្រោងនេះប្រសិនបើទទួលបានជោគជ័យក្នុងការអនុវត្តវិស័យ SME នឹងទទួលបានផលប្រយោជន៍ផ្ទាល់ក្នុងការពង្រីកអាជីវកម្មតាមរយៈការពង្រឹងសមត្ថភាព ពង្រឹងគុណភាពផលិតផលពួកគាត់ដែលអាចនាំទៅទីផ្សារអន្តរជាតិ»។
លោកស្រី Christine Bower ប្រធានគម្រោង ARISE plus ថ្លែងក្នុងជំនួបជាមួយក្រសួងនេះកាលពីថ្ងៃអង្គារថា៖ «តាមការរំពឹងទុកគម្រោងនេះនឹងសម្រេចបាន ៣ ចំណុចសំខាន់រួមមាន ការធ្វើឲ្យប្រសើរឡើងផ្នែកពន្ធគយ ការសម្រួលពាណិជ្ជកម្ម ស្តង់ដា និងការពង្រឹងគុណភាពស្ថាប័ន ការអនុវត្តបទប្បញ្ញត្តិរួមទាំងបង្កើនការចូលរួមរបស់វិស័យឯកជន ជាពិសេសវិស័យ SME»។
របាយការណ៍របស់ក្រសួងឧស្សាហកម្ម និងសិប្បកម្មបានបង្ហាញថា កម្ពុជាមានសហគ្រាសសរុប ៥១៣ ៧៥៩ ក្នុងនោះជាង ៩៧ ភាគរយជាសហគ្រាសខ្នាតតូច និង ២,២ ភាគរយជាសហគ្រាសខ្នាតធំ។
កាលពីខែវិច្ឆិកា ឆ្នាំមុន GIZ បានផ្តល់ជំនួយចំនួន ៤,៥ លានដុល្លារដល់ក្រសួងឧស្សាហកម្ម និងសិប្បកម្មលើគម្រោងលើកកម្ពស់សហគ្រាសធុនតូច និងមធ្យមនៅប្រទេសកម្ពុជា មីយ៉ាន់ម៉ា ឡាវ និងវៀតណាមស្តីពីការបង្កើតមជ្ឈមណ្ឌលព័ត៌មានជាតិតាម Online៕LA