.jpg)
លោក សុន សេងហួត (ឆ្វេង) ក្នុងពិធីចុះកិច្ចព្រមព្រៀងជាមួយលោក Gunter Riethmacher តំណាង GIZ កាលពីថ្ងៃម្សិលមិញ។ ធូ វិរៈ
ភ្នំពេញ: អង្គការអភិវឌ្ឍន៍អន្តរជាតិអាល្លឺម៉ង់ (GIZ) បានផ្តល់ជំនួយចំនួន ៤,៥ លានដុល្លារ ដល់គម្រោងលើកកម្ពស់សហគ្រាសធុនតូច និងមធ្យមនៅក្នុងប្រទេសអាស៊ានចំនួន ៤ រួមមានកម្ពុជាផងដែរ។
សម្រាប់កម្ពុជាជំនួយនេះត្រូវបានចុះហត្ថលេខារវាងលោក សុន សេងហួត អនុរដ្ឋលេខាធិការក្រសួងឧស្សាហកម្ម និងសិប្បកម្ម និងតំណាង GIZ កាលពីថ្ងៃព្រហស្បតិ៍ក្នុងសិក្ខាសាលាស្តីពី «គេហទំព័រថ្នាក់ជាតិសម្រាប់សហគ្រាសធុនតូច និងមធ្យម»។ ទាំងតំណាង GIZ និងភាគីកម្ពុជាមិនបានបង្ហាញពីចំនួនទឹកប្រាក់ដែលកម្ពុជានឹងទទួលបាននៅក្នុងចំណោមជំនួយសរុបនេះទេ។
ជំនួយនេះស្ថិតក្រោមគម្រោងកិច្ចសហប្រតិបត្តិការអាស៊ាន អាល្លឺម៉ង់ស្តីពីការពង្រឹងរចនាសម្ព័ន្ធសម្រាប់លើកកម្ពស់សហគ្រាសធុនតូច និងមធ្យមនៅតំបន់អាស៊ាន។
លោក ឡោ សត្យា អគ្គនាយករងនៃអគ្គនាយកដ្ឋានសហគ្រាសធុនតូច និងមធ្យម និងសិប្បកម្មនៃក្រសួងឧស្សាហកម្ម និងសិប្បកម្មបានថ្លែងក្នុងសិក្ខាសាលានោះថា គម្រោងនេះមានរយៈពេល ៣ ឆ្នាំដែល GIZ បានផ្តល់ជំនួយ ៤,៥ លានដុល្លារសម្រាប់អនុវត្តក្នុងប្រទេសកម្ពុជា មីយ៉ាន់ម៉ា ឡាវ និងវៀតណាម។
ជំនួយនេះផ្តល់លើផ្នែកបច្ចេកទេស ព័ត៌មាន និងបទប្បញ្ញត្តិនានាទាក់ទងនឹងសហគ្រាសដែលសហគ្រិនអាចរកបានសម្រាប់ការអភិវឌ្ឍសហគ្រាសរបស់ពួកគេដែលជួយឲ្យសហគ្រាសធុនតូច និងមធ្យមទទួលបានសេវាសាធារណៈផ្នែកព័ត៌មានសំខាន់ៗពាក់ព័ន្ធទៅលើដំណើរការអាជីវកម្ម និងការទទួលបានចំណេះដឹងលើបច្ចេកទេស បច្ចេកវិទ្យាថ្មីៗការទទួលបានសេវាកម្មផ្សេងៗ និងបណ្តាញទំនាក់ទំនងធុរកិច្ច។ នេះបើយោងតាមលោក ឡោ សត្យា។
លោកថ្លែងថា៖ «គម្រោងនេះអាចជួយពង្រឹងសមត្ថភាពសហគ្រាសធុនតូច និងមធ្យមនៅកម្ពុជាឲ្យទទួលបានលទ្ធភាពចូលទៅក្នុងទីផ្សារអន្តរជាតិ ព្រមទាំងសម្របសម្រួលបរិបទគោលនយោបាយ និងបទប្បញ្ញត្តិក្នុងបរិយាកាសធុរកិច្ចថ្នាក់តំបន់»។
លោក សុន សេងហួត បានឲ្យដឹងថាតាមរយៈគេហទំព័រថ្នាក់ជាតិសម្រាប់សហគ្រាសធុនតូច និងមធ្យមសម្រាប់កម្ពុជានេះ វានឹងផ្តល់ព័ត៌មាន សេវាកម្ម បណ្តាញទំនាក់ទំនង លទ្ធភាពជ្រៀតចូលក្នុងទីផ្សារឲ្យមានប្រសិទ្ធភាព និងប្រសិទ្ធផលខ្ពស់របស់ SMEs។
លោកថ្លែងថា៖ «ការចាប់ផ្តើមការងាររៀបចំប្រព័ន្ធផ្តល់ព័ត៌មាន ការប្រឹក្សាយោបល់ និងរចនាសម្ព័ន្ធដែលសមស្របដល់ការអភិវឌ្ឍសហគ្រាសធុនតូច និងមធ្យមកម្ពុជានឹងជួយពង្រឹងសមត្ថភាពខ្ពស់ក្នុងការប្រកួតប្រជែងជាមួយសហគ្រាសធុនតូច និងមធ្យមបរទេស»។
លោក Gunter Riethmacher នាយកអង្គការ GIZ ប្រចាំនៅកម្ពុជាបានឲ្យដឹងថា គម្រោងនេះមានគោលបំណងធ្វើឲ្យប្រសើរឡើងនូវព័ត៌មាន និងសេវាកម្មផ្សព្វផ្សាយសម្រាប់សហគ្រាសធុនតូច និងមធ្យមក្នុងក្របខ័ណ្ឌនៃផែនការសកម្មភាពយុទ្ធសាស្ត្រអាស៊ានសម្រាប់ការអភិវឌ្ឍសហគ្រាសធុនតូច និងមធ្យម ២០២៥។
លោកបន្ថែមថា គម្រោងក៏នឹងធ្វើឲ្យប្រសើរឡើងមជ្ឈមណ្ឌលសហគ្រាសធុនតូច និងមធ្យមអាស៊ាន ការពង្រឹងមជ្ឈមណ្ឌលព័ត៌មានជាតិសហគ្រាសធុនតូច និងមធ្យម និងការលើកកម្ពស់សេវាកម្មសហគ្រាសធុនតូច និងមធ្យមថ្នាក់ជាតិសម្រាប់អន្តរជាតិ។
លោកថ្លែងថា៖ «កិច្ចព្រមព្រៀងរវាង GIZ ជាមួយក្រសួងឧស្សាហកម្ម និងសិប្បកម្មលើគម្រោងសហគ្រាសធុនតូច និងមធ្យមអាស៊ានឆ្នាំ ២០១៩ ដល់ឆ្នាំ ២០២១ ដើម្បីបង្កើតគំនិតក្នុងការអភិវឌ្ឍមជ្ឈមណ្ឌលព័ត៌មានជាតិសហគ្រាសធុនតូច និងមធ្យមសម្រាប់កម្ពុជា និងរៀបចំផែនការសកម្មភាពសម្រាប់អនុវត្តន៍គម្រោង»។
បើតាមលោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យមបានឲ្យដឹងថា តាមការស្ទង់មតិលើវិស័យ SME ចំនួន ៧១ ស្ថាប័ន បង្ហាញថា ពួកគេត្រូវការជំនួយលើស្តង់ដាអនាម័យ ស្វែងរកទីផ្សារ ការអភិវឌ្ឍសេវាកម្ម និងការវេចខ្ចប់ បច្ចេកវិទ្យា ធនធានមនុស្ស និងកម្លាំងពលកម្ម ការទទួលបានហិរញ្ញវត្ថុ ការចុះបញ្ជីអាជីវកម្ម និងការបង់ពន្ធជាដើម៕ LA
