ភ្នំពេញៈ លោក វ៉ាន់ ស៊ូអៀង ប្រធានសមាគមរោងចក្រកាត់ដេរនៅកម្ពុជា (GMAC) បានឲ្យដឹងកាលពីថ្ងៃអង្គារថា សមាគមរោងចក្រកាត់ដេរនៅកម្ពុជា កំពុងសិក្សាលើការផ្គត់ផ្គង់វត្ថុធាតុដើមពីប្រទេសចិន ដើម្បីវាយតម្លៃតម្រូវការបច្ចុប្បន្ន បន្ទាប់ពីកុងតឺន័រជិត ២០០ បានមកដល់ប្រទេសកម្ពុជាកាលពីយប់ថ្ងៃចន្ទ។
លោក ស៊ូអៀង បានប្រាប់ភ្នំពេញ-ប៉ុស្ដិ៍ថា GMAC នឹងធ្វើដំណើរទៅកំពង់ផែស្វយ័តក្រុងព្រះសីហនុ ដើម្បីគណនានាវាដឹកវត្ថុធាតុដើមពីប្រទេសចិន។ លោកបញ្ជាក់ថា៖ «យើងនឹងត្រួតពិនិត្យថា តើកុងតឺន័រប៉ុន្មានចូលមក? ដើម្បីវាយតម្លៃការប្រើប្រាស់របស់រោងចក្រនានាដែលយើងកំពុងបន្តការងារនោះ»។
ទន្ទឹមនឹងនេះដែរ លោក កាំង ម៉ូនីកា អគ្គលេខាធិការរង GMAC បានប្រាប់ភ្នំពេញប៉ុស្ដិ៍កាលពីថ្ងៃពុធថា ការមកដល់វត្ថុធាតុដើមពីប្រទេសចិននឹងជួយសម្រាលដល់បន្ទុកមួយចំនួន និងជាបណ្ដើរៗ ខណៈស្ថានការណ៍វីរុសកូវីដ ១៩ នៅក្នុងប្រទេសចិនបានស្ងប់ស្ងាត់។
លោកថ្លែងថា៖ «យើងសង្ឃឹមថា ការផ្គត់ផ្គង់នឹងកាន់តែធំ និងកាន់តែរហ័ស ដែលនឹងជួយកាត់បន្ថយបញ្ហារបស់យើងដល់កម្រិតអតិបរមា»។
លោក កាំង ម៉ូនីកា បញ្ជាក់ថា៖ «វាមិនទាន់ច្បាស់នោះទេ តើរោងចក្រអ្វីត្រូវបានផ្អាកការផលិតជាបណ្ដោះអាសន្ននោះ។ យើងមិនទាន់ដឹងផលិតផលណាមួយនឹងចូលមកនោះទេ»។
យោងតាមសេចក្ដីប្រកាសព័ត៌មានរបស់ GMAC កាលពីថ្ងៃពុធបានឲ្យដឹងថា ដោយមានអន្តរាគមន៍ពីភាគីរដ្ឋាភិបាលចិន វត្ថុធាតុដើមសម្រាប់វិស័យកាត់ដេរបានមកដល់ SAP កាលពីថ្ងៃចន្ទ និងកុងតឺន័រទាំងអស់ត្រូវបានទម្លាក់ចុះជាបន្ទាន់ពីនាវា និងដាក់នៅកន្លែងផ្ទុកទំនិញ។
សេចក្ដីប្រកាសព័ត៌មាននេះបន្តថា៖ «យើងរំពឹងថា នាវា ១២ គ្រឿងដឹកជញ្ជូនវត្ថុធាតុដើមនឹងមកដល់ SAP ជាបន្តបន្ទាប់រហូតដល់ថ្ងៃអាទិត្យ»។
«វត្ថុធាតុដើមត្រូវបានដឹកជញ្ជូនមករោងចក្រនៅក្នុងតំបន់ផ្សេងៗដែលរួមទាំងទីក្រុងភ្នំពេញផងដែរ»។ នេះបើយោងតាមសេចក្ដីប្រកាសព័ត៌មាន។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានឲ្យដឹងកាលពីថ្ងៃអង្គារថា រោងចក្រ ៥០ បានផ្អាកប្រតិបត្តិការ ដោយសារតែកង្វះវត្ថុធាតុដើម។ រោងចក្រ ៧ នៅពេលនេះចាប់ផ្ដើមសកម្មភាពឡើងវិញ បន្ទាប់ពីការមកដល់កុងតឺន័រទាំងនេះ។
លោក ហេង សួរ ថ្លែងថា៖ «នាវាទាំងនេះអាចជានាវាតូច ប៉ុន្តែជួយដល់រោងចក្រក្នុងស្រុកឲ្យចាប់ផ្ដើមការផលិតឡើងវិញ»។
រោងចក្រកាត់ដេរជាច្រើននៅប្រទេសកម្ពុជាត្រូវបានចាប់ផ្ដើមប្រតិបត្តិការឡើងវិញដោយសារតែកុងតឺន័រជិត ២០០ បានមកដល់កំពង់ផែស្វយ័តក្រុងព្រះសីហនុ (PAS) កាលពីថ្ងៃចន្ទ ដើម្បីបន្ធូរបន្ថយកង្វះវត្ថុធាតុដើមនៅក្នុងវិស័យនេះ។
លោក លូ គឹមឈន់ ប្រធានអគ្គនាយក PAS បានប្រាប់ភ្នំពេញប៉ុស្ដិ៍កាលពីថ្ងៃអង្គារថា នាវាដឹកកុងតឺន័រ ៤ បានចូលដល់កំពង់ផែនេះបាននាំមកវត្ថុធាតុដើមសម្រាប់រោងចក្រនៅក្នុងប្រទេសកម្ពុជា។
លោកបានថ្លែងថា នាវាប្រហែល ១៥ គ្រឿងដែលដឹកជញ្ជូនវត្ថុធាតុដើមនឹងមកដល់រាល់សប្ដាហ៍។ លោកបានបន្តថា៖ «ផែនការនឹងបង្កើនចំនួនការដឹកជញ្ជូនវត្ថុធាតុដើមពីប្រទេសចិនដើម្បីជួយសម្រាលដល់កង្វះខាតនៅទីនេះ»៕ LA