ភ្នំពេញៈ សមាគមរោងចក្រកាត់ដេរនៅកម្ពុជា (GMAC) រួមជាមួយដៃគូនឹងចាប់ផ្តើមអនុវត្តគម្រោង Switch Garment ជាផ្លូវការនៅថ្ងៃទី ១១ ខែកញ្ញានេះក្នុងគោលបំណងបង្កើនភាពប្រកួតប្រជែង និងកាត់បន្ថយផលប៉ះពាល់បរិស្ថាននៅក្នុងវិស័យឧស្សាហកម្មកាត់ដេរ តាមរយៈការអនុវត្តថាមពលប្រកបដោយនិរន្តរភាព និងការវិនិយោគលើបច្ចេកវិទ្យាថាមពលស្អាត។
លោក លី តេកហេង អ្នកគ្រប់គ្រងទូទៅនៃសមាគមរោងចក្រកាត់ដេរនៅកម្ពុជា (GMAC) និងជាប្រធានគម្រោង Switch Garment បានប្រាប់ភ្នំពេញ-ប៉ុស្តិ៍ថា GMAC នឹងអនុវត្តគម្រោងនេះរួមគ្នាជាមួយនឹងវិទ្យាស្ថានកំណើនបៃតងសកល (GGGI) និងអង្គការ Geres Cambodia។
លោកបន្តថា ក្នុងឱកាសប្រកាសគម្រោងនៅថ្ងៃសុក្រនេះនឹងមានការចូលរួមពីមន្ត្រីអគ្គិសនីកម្ពុជា ក្រសួងបរិស្ថាន ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីផ្លាស់ប្តូរបទពិសោធគ្នាទៅវិញទៅមកទាក់ទងនឹងការអនុវត្តថាមពលប្រកបដោយនិរន្តរភាពនៅក្នុងឧស្សាហកម្មកាត់ដេរ។
លោកថ្លែងថា៖ «គម្រោងនេះពិតជាមានសារៈសំខាន់ ដោយវានឹងជួយឲ្យសមាជិកសមាគមអាចយល់ដឹងពីការប្រើបច្ចេកវិទ្យាថ្មី និងឧបករណ៍ថ្មីៗដែលធ្វើឲ្យគាត់ប្រើប្រាស់អគ្គិសនីអស់តិច ចំណាយតិច ប៉ុន្តែទទួលបានផលប្រយោជន៍ច្រើន។ យើងក៏បានគិតគូរពីផលប៉ះពាល់បរិស្ថានផងដែរ»។
លោកបន្ថែមថា គម្រោងនេះមានគោលបំណងបង្កើនភាពប្រកួតប្រជែង និងកាត់បន្ថយផលប៉ះពាល់បរិស្ថាននៃឧស្សាហកម្មកាត់ដេរនៅកម្ពុជា តាមរយៈផលិតកម្មប្រកបដោយចីរភាព និងបង្កើនការវិនិយោគលើការអនុវត្តថាមពលប្រកបដោយនិរន្តរភាពដូចជា ប្រសិទ្ធភាពការប្រើប្រាស់បច្ចេកវិទ្យា ការផ្លាស់ប្តូរទៅប្រើថាមពលកកើតឡើងវិញ និងការគ្រប់គ្រងប្រតិបត្តិការប្រកបដោយប្រសិទ្ធភាព។
លោកនិយាយថា៖ «យើងនឹងមានការបណ្តុះបណ្តាលដល់សមាជិកពីផ្នត់គំនិតនៃការប្រើប្រាស់ថាមពលក្នុងឧស្សាហកម្មកាត់ដេរ ព្រោះរោងចក្រមួយចំនួនមិនទាន់មានអ្នកជំនាញយល់ដឹងពីផ្នែកនេះទេ ហើយការប្រើប្រាស់ថាមពលក៏នៅមិនទាន់ត្រឹមត្រូវតាមបច្ចេកទេសឧស្សាហកម្មដែរ»។
លោក វ៉ិចទ័រ ហ្សូនា អគ្គនាយកនៃអគ្គនាយកដ្ឋានថាមពលនៃក្រសួងរ៉ែ និងថាមពលបានឲ្យដឹងថា ក្រសួងគាំទ្រ និងលើកទឹកចិត្តឲ្យម្ចាស់រោងចក្រកាត់ដេរឲ្យប្រើប្រាស់ថាមពលប្រកបដោយប្រសិទ្ធភាព។
លោកថ្លែងថា៖ «យន្តការរបស់រដ្ឋាភិបាលធ្វើយ៉ាងណាឲ្យតម្លៃអគ្គិសនីទាប ថ្លៃដើមផលិតទាប ដើម្បីឲ្យពួកគេមានលទ្ធភាពប្រកួតប្រជែង ហើយយន្តការបញ្ចុះតម្លៃអគ្គិសនីរបស់រដ្ឋាភិបាលក៏ជាការរួមចំណែកផងដែរ»។
យោងតាមស្ថាប័ន Switch Asia គម្រោងគំរូសេដ្ឋកិច្ច GGGI បានប៉ាន់ប្រមាណថា បើការប្រើប្រាស់ថាមពលប្រកបដោយប្រសិទ្ធភាពក្នុងវិស័យកាត់ដេរកើន ២០ ភាគរយ នោះវានឹងធ្វើលទ្ធភាពនៃការប្រើប្រាស់ថាមពលកើន ៣១ ភាគរយនៅក្នុងឆ្នាំ ២០៣០ ដែលនឹងធ្វើឲ្យចំណេញពីការប្រើថាមពលធម្មតាដល់ ២ ពាន់លានដុល្លារ។
Switch Asia បន្តថា ឧស្សាហកម្មកាត់ដេរនៅប្រទេសកម្ពុជាកំពុងធ្លាក់ចុះនូវសមត្ថភាពប្រកួតប្រជែងធៀបនឹងប្រទេសមួយចំនួនដូចជា បង់ក្លាដែស មីយ៉ាន់ម៉ា និងវៀតណាម ដោយសារតែថ្លៃថាមពលខ្ពស់ ក៏ដូចជាការកើនឡើងប្រាក់ឈ្នួលអប្បបរមាប្រចាំខែ កង្វះហេដ្ឋារចនាសម្ព័ន្ធ ផលិតភាព និងភ័ស្តុភារកម្ម។
យោងតាមលោក តេកហេង គម្រោងនេះមានរយៈពេល ៤ ឆ្នាំគឺចាប់ពីឆ្នាំ ២០២០ ដល់ឆ្នាំ ២០២៤ ដែលជាជំនួយរបស់ Switch Asia នូវថវិកាចំនួន ២ ៩៩៥ ៧៤៨ អឺរ៉ូ៕ LA