ភ្នំពេញៈ សមាគមរោងចក្រកាត់ដេរកម្ពុជា(GMAC) បានចុះហត្ថលេខាទទួលកម្ចី៣,៥លានដុល្លារពីទីភ្នាក់ងារបារាំងសម្រាប់ការអភិវឌ្ឍ(AFD)ដើម្បីកសាងសាលាបណ្តុះបណ្តាលវិស័យកាត់ដេរដំបូងនៅកម្ពុជា។
លោក វ៉ាន់ ស៊ូអៀង ប្រធានGMAC ដែលមានវត្តមាននៅក្នុងពិធីចុះហត្ថលេខានោះបានឲ្យដឹងថា សាលារៀននេះនឹងបណ្តុះបណ្តាលដល់កម្មករកាត់ដេរគ្មានជំនាញនិងប្រជាជនកម្ពុជាផ្សេងៗទៀត ដែលចង់បម្រើការងារលើមុខតំណែងខ្ពស់នៅក្នុងរោងចក្រកាត់ដេរឲ្យកាន់តែមានជំនាញជាជាងជួលបុគ្គលិកពីក្រៅប្រទេសដែលមានប្រាក់ខែខ្ពស់។
លោកបន្តថាមកទល់ពេលនេះ ប្រជាជនកម្ពុជាភាគច្រើន ដែលបម្រើការងារនៅក្នុងឧស្សាហកម្មនេះ មិនមានជំនាញឡើយ ដោយពួកគេគ្រាន់តែចេះកាត់ និងដេរប៉ុណ្ណោះ ប៉ុន្តែសម្រាប់ការងារជំនាញគឺយើងជ្រើសរើសពីបរទេស ដោយផ្តល់ប្រាក់ខែខ្ពស់។
លោក ស៊ូអៀង បានបន្ថែមថា៖ «សម្រាប់ការងារបច្ចេកទេស និងការងារដែលមានមុខតំណែងខ្ពស់ក្នុងឧស្សាហកម្មនេះ យើងតែងតែជ្រើសរើសជនជាតិបរទេសឲ្យមកបម្រើការងារនៅកម្ពុជា ដោយសារយើងមិនមានកម្មករកម្ពុជាមានជំនាញ»។លោកលើកឡើងថា ពិធីចុះហត្ថលេខានេះគឺដើម្បីកសាងសាលាបណ្តុះបណ្តាលកម្មករកម្ពុជាឲ្យទទួលបានសមត្ថភាពក្នុងមុខតំណែងខ្ពស់នៅក្នុងរោងចក្រ និងដើម្បីគ្រប់គ្រងកម្មករទាំងនោះ។
កម្ពុជា នឹងមានប្រជាជនកម្ពុជាដែលមានជំនាញដើម្បីជំនួសឲ្យជនបរទេសដែលទទួលបានប្រាក់ខែខ្ពស់នៅក្នុងឧស្សាហកម្មនេះ។
លោកវ៉ាន់ ស៊ូអៀង បានថ្លែងថា៖ «ខ្ញុំសង្ឃឹមថា សាលានេះនឹងបណ្តុះបណ្តាលប្រជាជនកម្ពុជា ឲ្យទទួលបានជំនាញ ដើម្បីធ្វើការក្នុងមុខតំណែងខ្ពស់នៅក្នុងឧស្សាហកម្មនេះ ដែលជាធម្មតា យើងតែងជ្រើសរើសពីបរទេស ដូចជា ផ្នែកលក់ ការគ្រប់គ្រងផ្នែកលក់ ហើយមួយចំនួនទៀតជាការងារបច្ចេកទេស។ វាគ្រាន់តែជាការងារធម្មតាដែលពួកគេអាចគ្រប់គ្រងបាន និងបណ្តុះបណ្តាលដល់កម្មករ»។
បច្ចុប្បន្ន បរទេសភាគច្រើន មកពីចិន ម៉ាឡេស៊ី ហ្វីលីពីន។ល។
លោក កាំង ម៉ូនីកា អ្នកគ្រប់គ្រងផ្នែកអភិវឌ្ឍន៍ពាណិជ្ជកម្មនៅGMAC បានប្រាប់អ្នកយកព័ត៌មានថា កម្ចីមានរយៈពេល១៥ឆ្នាំនេះនឹងយកទៅប្រើសម្រាប់កសាងសាលានៅតំបន់សេដ្ឋកិច្ចពិសេសភ្នំពេញ ដោយការសាងសង់នឹងមានរយៈពេល២ឆ្នាំ។
សាលានេះនឹងបើកទូលាយសម្រាប់ប្រជាជនកម្ពុជា និងនិស្សិតទើបបញ្ចប់ការសិក្សាទាំងអស់ដែលចង់បម្រើការងារនៅក្នុងឧស្សាហកម្មនេះដោយទទួលបានមុខតំណែងខ្ពស់។
លោក ម៉ូនីកា បានឲ្យដឹងថា ពួកគេនឹងជួលគ្រូបច្ចេកទេសមកពីបរទេស សម្រាប់មកបង្រៀនកម្មករម្នាក់ៗ ហើយក៏មានគ្រូជាជនជាតិកម្ពុជាផងដែរ។
សាលារៀននេះមិនរកប្រាក់កម្រៃឡើយ ប៉ុន្តែថ្លៃឈ្នួលនឹងយកទៅប្រើសម្រាប់ប្រតិបត្តិការប្រចាំថ្ងៃ ការចំណាយផ្សេងៗ និងដើម្បីធានានិរន្តរភាព។
ទិន្នន័យពី GMAC បង្ហាញថា កម្ពុជាមានរោងចក្រកាត់ដេរប្រហែល៥០០ ជាសមាជិករបស់GMAC ដែលអាចស្រូបទាញកម្មករជាង៥០ម៉ឺននាក់។
ការនាំចេញសម្លៀកបំពាក់ និងវាយនភ័ណ្ឌសរុបនៅកម្ពុជា បានកើនឡើងប្រហែល១០ភាគរយដល់៣,៤៤២ពាន់លានដុល្លារក្នុងរយៈពេល៩ខែដំបូង ឆ្នាំនេះ បើធៀបនឹងរយៈពេលដូចគ្នាកាលពីខែមុនដែលមានចំនួន៣,១៣២ពាន់លានដុល្លារ។ នេះបើយោងតាមទិន្នន័យទទួលបានពីក្រសួងពាណិជ្ជកម្ម៕ CS
