The Phnom Penh Post Search

Search form




Logo of Phnom Penh Post newspaper Phnom Penh Post - GMAC ពិចារណា​ផ្អាក​ការ​បញ្ជា​ទិញ

GMAC ពិចារណា​ផ្អាក​ការ​បញ្ជា​ទិញ

GMAC ពិចារណា​ផ្អាក​ការ​បញ្ជា​ទិញ

131226_11
កម្មការិនីកំពុងធ្វើការនៅក្នុងរោងចក្រកាត់ដេរសម្លៀកបំពាក់មួយនៅភ្នំពេញនាពេលកន្លងមក ភ្នំពេញ ប៉ុស្តិ៍

ភ្នំពេញៈ សមាគម​រោងចក្រ​កាត់ដេរ​កម្ពុជា (GMAC) កំពុង​ពិចារណា​ពី​ការ​ផ្អាក​ទទួល​ការ​បញ្ជា​ទិញ​ប្រសិន​បើ​កូដកម្ម​របស់​កម្មករ​នៅ​តែ​បន្ត​ទោះ​បី​របាយ​ការណ៍​បង្ហាញ​ថា ការ​នាំ​ចេញ​សម្លៀក​បំពាក់ និង​ស្បែក​ជើង​នៅ​កម្ពុជា​កំពុង​មាន​កំណើន​ក៏​ដោយ។

របាយ​ការណ៍​ពី​ក្រសួង ពាណិជ្ជកម្ម ចេញ​ផ្សាយ​កាល​ពី​សប្តាហ៍​មុន​បង្ហាញ​ថា ការ​នាំ​ចេញ​ផលិតផល​សម្លៀក​បំពាក់ និង​ស្បែក​ជើង​របស់​កម្ពុជា​នៅ​ក្នុង​រយៈ​ពេល ១១ ខែ​ឆ្នាំ​នេះ​មាន​ទំហំ​ទឹក​ប្រាក់ ៥,០៧ ពាន់​លាន​ដុល្លារ​កើន​ឡើង ២២ ភាគរយ បើ​ធៀប​រយៈ​ពេល​ដូច​គ្នា​ពី​ឆ្នាំ​ទៅ​ដែល​មាន ៤,១៥ ពាន់​លាន​ដុល្លារ។

លោក ជាតិ ខេមរា មន្ដ្រី​ជាន់​ខ្ពស់​នៃ​សមាគម​រោងចក្រ​កាត់​ដេរ​នៅ​កម្ពុជា​និយាយ​ថា តួលេខ​វិជ្ជមាន​នេះ​គឺជា​លទ្ធផល​នៃ​ការ​បញ្ជា​ទិញ​កាល​ពី ២០១២ និង​មិន​មែន​ជា​ការ​ឆ្លុះ​បញ្ចាំង​ពី​កំណើន​ក្នុង​វិបត្តិ​ដែល​កើត​មាន​ក្នុង​វិស័យ​កាត់ដេរ​នៅ​ឆ្នាំ ២០១៣ នេះ​ទេ។ លោក​ថា៖ «ចុង​ឆ្នាំ​នេះ​សមាជិក​យើង​កំពុង​ពិភាក្សា​និង​ពិចារណា​ថា​តើ​ត្រូវ​ទទួល​ការ​បញ្ជា​ទិញ​ថ្មីៗ​ពី​អ្នក​ទិញ​ទាំង​អស់ ឬ​អត់?»។

លោក​បន្ត​ថា៖ «យើង​ប្រហែល​ជា​មិន​ទទួល​ការ​បញ្ជា​ទិញ​រហូត​ដល់​អ្វីៗ​ដំណើរការ​ល្អ​វិញ​ឬ​ក៏​ស្នើ​អ្នក​បញ្ជា​ទិញ​ឲ្យ​បង្វែរ​ទីផ្សារ​ទៅ​ប្រទេស​ជិត​ខាង ឬ​ទទួល​ការ​បញ្ជា​ទិញ​ដែរ តែ​ក្នុង​លក្ខណៈ​កុងត្រា​ខ្លីៗ ព្រោះ​យើង​មិន​អាច​ទទួល​ការ​ខាត​បង់​នៅ​ពេល​ទទួល​ហើយ​មិន​មាន​សមត្ថភាព​ផលិត​នោះ​ទេ»។ លោក​បន្ថែម​ថា រោងចក្រ​នឹង​ប្រឈម​មុខ​នឹង​ការ​ខាត​បង់​បើ​មិន​អាច​ប្រគល់​ផលិតផល​តាម​ការ​កំណត់​ដល់​អ្នក​បញ្ជា​ទិញ ខណៈ​កូដកម្ម​កើត​ឡើង​ជា​ញឹក​ញាប់។

សហរដ្ឋ​អាមេរិក និង​សហភាព អឺរ៉ុប​ជា​ទីផ្សារ​នាំ​ចេញ​ធំ​បំផុត​នៃ​ផលិតផល​សម្លៀក​បំពាក់ និង​ស្បែក​ជើង​របស់ កម្ពុជា។ ក្នុង​នោះ​ពី​ខែ មករា រហូត​ដល់​ខែ វិច្ឆិកា ឆ្នាំ ២០១៣ កម្ពុជា​បាន​នាំ​ចេញ​ផលិតផល​សម្លៀក​បំពាក់ និង​ស្បែក​ជើង ទៅ​ទីផ្សារ​អាមេរិក​ក្នុង​តម្លៃ​ទឹក​ប្រាក់​សរុប ១,៩៦ ពាន់​លាន​ដុល្លារ​កើន​ឡើង ៩ ភាគរយ និង​សហភាព​អឺរ៉ុប ១,៨១ ពាន់​លាន​ដុល្លារ កើន​ឡើង ៣៣ ភាគរយ។

ការ​នាំ​ចេញ​ទៅ​បណ្តា​ប្រទេស​ផ្សេងៗ​ទៀត​នៅ​ក្នុង​តំបន់ និង​ពិភពលោក​មាន​តម្លៃ ១,២៨ ពាន់​លាន​ដុល្លារ​កើន​ឡើង ៣១ ភាគរយ បើ​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន។

ដើម​សប្ដាហ៍​នេះ​កម្មករ​រោងចក្រ​កាត់​ដេរ​រាប់​ពាន់​នាក់​មក​ពី​ទូទាំង​ប្រទេស​បាន​ដើរ​ចេញ​ពី​ការងារ​បន្ទាប់​ពី​ក្រសួង ការងារ បាន​សម្រេច​បង្កើន​ប្រាក់​ឈ្នួល​ដល់ ១៦០ ដុល្លារ​ក្នុង​រយៈ​ពេល ៥ឆ្នាំ។

បើ​តាម​របាយ​ការណ៍​សមាគម​រោងចក្រ​កាត់ដេរ​កម្ពុជា ដោយ​មិន​រាប់​បញ្ចូល​ខែ ធ្នូ មាន​បាតុកម្ម​សរុប ១៣១ លើក​នៅ​ឆ្នាំ ២០១៣ ជា​ចំនួន​ច្រើន​បំផុត​ចាប់​តាំង​ពី​ការ​ចាប់​ផ្ដើម​ប្រមូល​ទិន្នន័យ​កាល​ពី​ឆ្នាំ ២០០៣។

លោក អាត់ ធន់ ប្រធាន​សម្ព័ន្ធ​សហជីព​ប្រជាធិបតេយ្យ​កម្មករ​រោងចក្រ​កាត់ដេរ កម្ពុជា និយាយ​ថា អាមេរិក និង អឺរ៉ុប នឹង​មិន​បញ្ឈប់​ការ​បញ្ជា​ទិញ​ពី​ប្រទេស​កម្ពុជា​នោះ​ទេ។ លោក​បាន​ថ្លែង​ថា៖ «កម្ពុជា​មិន​មែន​ជា​កន្លែង​ផលិត​សម្លៀក​បំពាក់​ធំ​របស់​គេ ដូច​ប្រទេស បង់ក្លាដែស នោះ​ទេ។ អាមេរិក និង អឺរ៉ុប នាំ​ចូល​សម្លៀក​បំពាក់​ពី កម្ពុជា ព្រោះ​គេ​អាណិត​កម្ពុជា។ ដូច្នេះ​ពួកគេ​នឹង​មិន​ផ្លាស់​ប្តូរ​ការ​បញ្ជា​ទិញ​របស់​ពួក​គេ​ទេ»។ លោក​បាន​បន្ត​ថា កូដកម្ម​នឹង​បន្ត​រហូត​ទាល់​តែ​មាន​ដំណោះស្រាយ​មួយ។

លោក ស្រី ចន្ធី ប្រធាន​សមាគម​សេដ្ឋកិច្ច​កម្ពុជា អំពាវនាវ​ឲ្យ​ប្រញាប់​ប្រញាល់​ក្នុង​ការ​ដោះស្រាយ​ជម្លោះ​ប្រាក់​ឈ្នួល និង​លក្ខខណ្ឌ​ការងារ​នៅ​ក្នុង​វិស័យ​កាត់ដេរ​នេះ ដោយ​សម្តែង​ក្តី​បារម្ភ​ថា កម្ពុជា​នឹង​មិន​អាច​សម្រេច​បាន​កំណើន​សេដ្ឋកិច្ច​តាម​ការ​ព្យាករ​នោះ​ទេ។ លោក​បន្ត​ថា៖ «បើ​កម្មករ​មិន​អាច​ទទួល​បាន​ប្រាក់​ខែ​តាម​ពួកគេ​ស្នើ​សុំ​នោះ​ទេ ពួក​គេ​នឹង​ដើរ​ចេញ​ពី​រោងចក្រ​មក​ធ្វើ​កូដកម្ម​រួម​គ្នា។ នេះ​គឺជា​អ្វី​ដែល​យើង​គួរ​បារម្ភ»៕ PB

អត្ថបទគួរចាប់អារម្មណ៍