.jpg)
កម្មករកំពុងបំពេញការងារក្នុងរោងចក្រមួយកន្លែងនៅរាជធានីភ្នំពេញ។ រូបថត ភ្នំពេញ ប៉ុស្តិ៍
ភ្នំពេញ៖ សមាគមរោងចក្រកាត់ដេរនៅកម្ពុជា (GMAC) បានធ្វើការអំពាវនាវដល់ភាគីពាក់ព័ន្ធទាំងអស់ ជាពិសេសអ្នកបញ្ជាទិញមិនត្រូវដាក់ទោសទណ្ឌ ឬផ្អាកការបញ្ជាទិញលើសមាជិករបស់ខ្លួនអំឡុងពេលដែលរដ្ឋាភិបាលបានធ្វើការបិទខ្ទប់ភូមិសាស្រ្តរាជធានីភ្នំពេញទាំងមូល និងក្រុងតាខ្មៅ នៃខេត្តកណ្តាលរយៈពេល ១៤ ថ្ងៃ គិតចាប់ពីថ្ងៃទី ១៥ មេសា។
ជាមួយនឹងការបន្តកើនឡើង និងរកឃើញនូវអ្នកកើតជំងឺកូវីដ ១៩ ជារៀងរាល់ថ្ងៃ ជាពិសេសភាគច្រើន គឺជាប់ពាក់ព័ន្ធនឹងព្រឹត្តិការណ៍ ២០ កុម្ភៈ រាជរដ្ឋាភិបាលកម្ពុជាកាលពីថ្ងៃទី ១៤ ខែមេសា បានចេញបទបញ្ជាបិទខ្ទប់ភូមិសាស្រ្តរាជធានីភ្នំពេញទាំងមូល និងក្រុងតាខ្មៅ នៃខេត្តកណ្តាល ចាប់ពីថ្ងៃទី ១៥ ខែមេសា ដល់ថ្ងៃទី ២៨ ខែ មេសា ឆ្នាំ ២០២១ ដើម្បីគ្រប់គ្រងការឆ្លងរាលដាលនៃជំងឺកូវីដ ១៩។
បញ្ហាបិទខ្ទប់នេះ តម្រូវឲ្យបិទអាជីវកម្មទាំងឡាយណាដែលមិនចាំបាច់ និងតម្រូវឲ្យប្រជាពលរដ្ឋត្រូវនៅក្នុងផ្ទះ និងអាចចេញក្រៅផ្ទះលុះត្រាតែមានករណីបន្ទាន់ ឬចាំបាច់បំផុត។
យោងតាមសេចក្តីអំពាវនាវរបស់ GMAC ធ្វើឡើងកាលពីថ្ងៃទី ១៩ ខែមេសា វិស័យកាត់ដេរសម្លៀកបំពាក់ ស្បែកជើង និងផលិតផលធ្វើដំណើរមិនត្រូវចាត់ទុកថា ជាវិស័យចាំបាច់ដែលត្រូវបើកដំណើរការប្រតិបត្តិការក្នុងអំឡុងការបិទខ្ទប់នេះទេ ហេតុដូច្នេះ វិស័យនេះក៏ត្រូវតែបិទដំណើរការដែរ។ សមាគមថា ការខ្ទប់នេះក៏កំពុងបណ្តាលឲ្យមានការរាំងស្ទះដល់វិស័យភស្តុភារ ហើយយើងមិនអាចដឹកជញ្ជូនវត្ថុធាតុដើម និងផលិតផលសម្រេចបានដោយសេរី។
សមាគមបានថ្លែងបន្តថា៖ «សមាជិករបស់យើងមួយចំនួនដែលមិនស្ថិតនៅក្នុងតំបន់បិទខ្ទប់ក៏រងប៉ះពាល់ផងដែរ ដោយសារបុគ្គលិករបស់គេរស់នៅរាជធានីភ្នំពេញ និងក្រុងតាខ្មៅ ហើយត្រូវបានហាមឃាត់មិនឲ្យធ្វើដំណើរទៅធ្វើការ។ រោងចក្រទាំងនេះមិនអាចប្រតិបត្តិការដូចធម្មតា។ នេះបានបណ្តាលឲ្យមានការពន្យារពេលផលិតកម្ម ព្រមទាំងការខកខានមិនអាចបំពេញបានតាមកាលវិភាគដឹកជញ្ជូនទំនិញដែលបានព្រមព្រៀងគ្នា»។
សមាគមសូមអំពាវនាវឲ្យមានការយោគយល់ និងជួយសម្របសម្រួលសម្រាប់ស្ថានភាពដ៏លំបាកនេះ។ យើងទាំងអស់គ្នាត្រូវតែសហការ និងគោរពតាមការណែនាំរបស់រាជរដ្ឋាភិបាល និងត្រូវរួមគ្នាប្រយុទ្ធនឹងជំងឺកូវីដ ១៩។ សមាគមសូមជំរុញភាគីពាក់ព័ន្ធទាំងអស់មិនត្រូវដាក់ទោសទណ្ឌលើសមាជិករបស់សមាគមចំពោះស្ថានភាពដ៏លំបាកដែលលើសពីការគ្រប់គ្រងរបស់យើង»។ នេះបើយោងតាមការអំពាវនាវរបស់ GMAC។
លោក កាំង ម៉ូនីកា អគ្គលេខាធិការរងរបស់ GMAC បានថ្លែងប្រាប់ ភ្នំពេញ ប៉ុស្តិ៍ កាលពីព្រឹកថ្ងៃទី ២០ ខែមេសានេះថា ជាមួយនឹងការបិទខ្ទប់នេះ អាជ្ញាធរពាក់ព័ន្ធក៏បានជួយសម្រួលខ្លះដែរដល់ការដឹកជញ្ជូននូវត្ថុធាតុដើមមួយចំនួនទៅកាន់តំបន់រោងចក្រដែលមិនជាប់ពាក់ព័ន្ធនឹងការបិទខ្ទប់ ប៉ុន្តែវាស្ថិតនៅក្នុងកម្រិតមួយប៉ុណ្ណោះ ដោយអនុលោមតាមវិធានសុខាភិបាល។
លោកថ្លែងថា៖ «បាទ គឺយើងទទួលបានការសម្របសម្រួលខ្លះ ប៉ុន្តែការសម្របសម្រួលនោះគឺអនុវត្តទៅតាមសុវត្ថិភាពសុខភាពសាធារណៈ គឺដើម្បីធានាបាននូវលទ្ធផលដ៏មានប្រសិទ្ធភាពនៃការបិទខ្ទប់នេះ។ យើងសុខចិត្តឈឺចាប់រយៈពេលខ្លី ប៉ុន្តែដើម្បីចំណេញរយៈពេលវែង»។
យោងតាមរបាយការណ៍ប្រចាំឆ្នាំរបស់ក្រសួងពាណិជ្ជកម្ម ការនាំចេញផលិតផលសម្លៀកបំពាក់ ស្បែកជើង និងទំនិញធ្វើដំណើរសរុបមានចំនួន ៩,៥ ពាន់លានដុល្លារក្នុងឆ្នាំ ២០២០ ដែលបានធ្លាក់ចុះជាង ១០ ភាគរយ ពី ១០,៦ ពាន់លានដុល្លារ ក្នុងឆ្នាំ ២០១៩៕
