ភ្នំពេញៈ ក្រុមហ៊ុនហៅតាក់ស៊ីជិះ Grab នឹងដាក់ឲ្យដំណើរការកម្មវិធី GrabMart ដែលជាសេវាដឹកជញ្ជូនទំនិញឆាប់រហ័សប្រចាំថ្ងៃជាផ្លូវការនៅថ្ងៃនេះ (ចន្ទ) ដើម្បីបម្រើអតិថិជននៅទីក្រុងភ្នំពេញ និងជាការរួមចំណែកជួយអតិថិជនក្នុងអំឡុងពេលការរីករាលដាលជំងឺកូវីដ ១៩។
ជាមួយនឹងសេវាកម្មនេះប្រជាពលរដ្ឋនៅក្នុងក្រុងភ្នំពេញអាចទិញគ្រឿងទេស អាហារកញ្ចប់ ផលិតផលថែរក្សាសុខភាព ផលិតផលថែរក្សាសម្រស់ កាដូ និងទំនិញជាច្រើនទៀតតាមរយៈកម្មវិធី Grab ដោយការដឹកជញ្ជូននឹងមានរយៈពេលតិចជាង ១ ម៉ោង។
លោក Hashim Alkaff ប្រធានក្រុមហ៊ុន Grab ប្រចាំកម្ពុជាបានថ្លែងថា ការចាប់ផ្តើមនូវសេវាកម្មថ្មីៗមួយចំនួននេះ គឺដើម្បីជួយសម្រួលដល់ប្រជាជនខ្មែរក្នុងអំឡុងពេលនៃការរាតត្បាតសកលនៃជំងឺកូវីដ១៩។
លោកថ្លែងថា៖ «ទោះយ៉ាងណាយើងអាចផ្ដល់ជូន និងពង្រីកសេវាកម្មថ្មីៗដើម្បីជួយបំពេញតម្រូវការប្រជាពលរដ្ឋ។ នេះក៏ជាឱកាសសម្រាប់ដៃគូបើកបររបស់យើងឲ្យទទួលបានប្រភពប្រាក់ចំណូលបន្ថែមទៀតផងដែរ»។ លោកបន្តថា៖ «ក្នុងកាលៈទេសៈដូចនេះ ប្រជាជនត្រូវការដំណោះស្រាយជាបន្ទាន់ដើម្បីដោះស្រាយភាពខ្វះចន្លោះនៅក្នុងគ្រាដ៏លំបាកបែបនេះ សេវាកម្មរហ័សរបស់យើងនឹងរង់ចាំជួយសម្រួលដល់ពួកគេជានិច្ច»។
នៅក្នុងដំណាក់កាលទើបតែចាប់ផ្ដើមដំបូងសេវាកម្មនេះនឹងមានវត្តមាននៅចំកណ្ដាលរាជធានីភ្នំពេញតែប៉ុណ្ណោះ (សង្កាត់បឹងកេងកង សង្កាត់ទួលទំពូង ខណ្ឌដូនពេញ ខណ្ឌទួលគោក និងតំបន់មួយចំនួនទៀតក្បែរសង្កាត់ទាំងនេះ) ហើយអតិថិជនអាចបង់ថ្លៃសេវាដឹកជញ្ជូនរបស់ពួកគេជាសាច់ប្រាក់ជាមួយដៃគូបើកបរបាន ចំណែកទំនិញដែលដឹកជញ្ជូនត្រូវមានតម្លៃមិនលើសពី ៤០ ដុល្លារនោះទេ។
Grab ក៏គ្រោងនឹងពង្រីកសេវាកម្មនេះទៅគ្រប់ទីកន្លែងនៅក្នុងរាជធានីភ្នំពេញនាពេលអនាគតដ៏ខ្លីខាងមុខនេះផងដែរ ដោយនឹងមានដៃគូពាណិជ្ជកម្មកាន់តែច្រើន ដែលនឹងត្រូវដាក់បញ្ចូលនាពេលឆាប់ៗខាងមុខ។
អតិថិជនអាចគ្រាន់តែបញ្ចូលអាសយដ្ឋានរបស់ពួកគេនៅក្នុងមុខងារកម្មវិធី GrabMart ក្នុងកម្មវិធី Grab អតិថិជននឹងឃើញបញ្ជីរាយនាមមុខទំនិញដែលអាចទិញបាននៅតាមហាងជិតអាសយដ្ឋានបំផុត។ ឈ្មោះហាងទំនិញបង្ហាញនៅក្នុងបញ្ជីទិញទំនិញអាស្រ័យលើទីតាំងរបស់អតិថិជនរួមមាន ហាងថៃហួត គីវីម៉ាត ឱសថស្ថានយូឃែរ និងវីននេសកម្ពុជា។
Grab គឺជាកម្មវិធីសេវាដឹកជញ្ជូនទំនិញឆាប់រហ័សប្រចាំថ្ងៃឈានមុខគេរបស់អាស៊ីអាគ្នេយ៍។ Grab ត្រូវបានដាក់ឲ្យដំណើរការជាផ្លូវការនៅក្នុងប្រទេសកម្ពុជាកាលពីថ្ងៃទី ១៩ ខែធ្នូ ឆ្នាំ ២០១៧។
កាលពីចុងខែមេសាកន្លងមកក្រុមហ៊ុន TADA របស់កូរ៉េខាងត្បូងដែលផ្តល់សេវាដឹកជញ្ជូនដោយប្រើការបញ្ជាតាមទូរស័ព្ទដៃក៏បានបើកដំណើការនូវសេវាកម្មដឹកទំនិញជូនអតិថិជនផងដែរ៕ LA