សិង្ហបុរីៈ ដោយសារកម្ពុជាជាប្រទេសកំពុងអភិវឌ្ឍន៍បានធ្វើឲ្យឱកាសសម្រាប់វិនិយោគិនមានច្រើនដើម្បីទាញយកអត្ថប្រយោជន៍ពីកំណើនសេដ្ឋកិច្ច និងតម្រូវការពីកំណើននេះ។
មានការវិនិយោគជាច្រើនដែលកំពុងបង្ហាញពីសក្តានុពលនៅក្នុងប្រទេសកម្ពុជាក្នុងនោះរួមមានបដិសណ្ឋារកិច្ច សណ្ឋាគារ ផ្សារទំនើប និងកំណើនអគារពាណិជ្ជកម្មដែលកំពុងជំរុញឲ្យមានកំណើនតម្រូវការម៉ូទ័រទឹកគុណភាពខ្ពស់ ដើម្បីដំណោះស្រាយលើការផ្គត់ផ្គង់ទឹកប្រកបដោយគុណភាព។
នៅប្រទេសសិង្ហបុរីអ្នកយកព័ត៌មានកាសែតភ្នំពេញប៉ុស្ដិ៍ ហ៊ គីមសាយ បានជួបសម្ភាសលោក Tan Chee Meng នាយកផ្នែកពាណិជ្ជកម្មក្នុងតំបន់នៅក្រុមហ៊ុន Water Utility of Grundfos ជាក្រុមហ៊ុន ផលិតម៉ូទ័រទឹកឈានមុខគេជាច្រើនលើពិភពលោកមានមូលដ្ឋាននៅប្រទេសដាណឺម៉ាក ដើម្បីចង់ដឹងអំពីអាជីវកម្មនៅក្នុងប្រទេសកម្ពុជា។
តើក្រុមហ៊ុនលោកបានលក់ផលិតផលនេះនៅកម្ពុជារយៈពេលយូរប៉ុន្មានហើយ? ហើយរហូតមកដល់ពេលនេះ តើវាមានផ្លាស់ប្តូរដូចម្ដេចដែរ?
ក្រុមហ៊ុន Grundfos មានវត្តមាននៅក្នុងប្រទេសកម្ពុជាជាង ១០ ឆ្នាំមកហើយ ហើយបច្ចុប្បន្នគឺជាក្រុមហ៊ុនមួយក្នុងចំណោមក្រុមហ៊ុនផលិតផលម៉ូទ័រទឹកឈានមុខគេនៅក្នុងប្រទេសនេះ។ យើងមានតំណាងផ្នែកលក់នៅក្នុងប្រទេសនេះព្រមទាំងដៃគូដែលទទួលបានសិទ្ធិចែកចាយដូចជាក្រុមហ៊ុន Sun Hour និងក្រុមហ៊ុន DEMEP Co., Ltd ដែលផ្ដោតលើសេវាអគារក្នុងស្រុក និងសេវាប្រើប្រាស់ទឹក។
តើអាជីវកម្មយ៉ាងដូចម្តេចដែរកាលពីឆ្នាំ ២០១៧? ហើយតើការរំពឹងទុកយ៉ាងណាដែរសម្រាប់ឆ្នាំ ២០១៨?
ក្រុមហ៊ុន Grundfos បានទទួលបានកំណើនប្រចាំឆ្នាំជាមធ្យមពី ១០ ទៅ ១៥ ភាគរយនៅក្នុងប្រទេសកម្ពុជាក្នុងរយៈពេល ២ ឆ្នាំកន្លងមក។ កំណើននេះអាចបណ្ដាលមកពីកំណើនតម្រូវការម៉ូទ័របូមទឹកមានគុណភាពខ្ពស់។ យើងរំពឹងថានឹងមើលឃើញកំណើន ២ ខ្ទង់នេះបន្តនៅក្នុងឆ្នាំ ២០១៨។
តើផលិតផលប្រភេទណាដែលបានលក់ភាគច្រើននៅទីផ្សារកម្ពុជា? ហេតុអ្វី?
យើងផ្ដោតលើការផ្ដល់ដល់ទីផ្សារកម្ពុជានូវគុណភាពខ្ពស់ដំណោះស្រាយគុណភាពខ្ពស់ ។ ទាក់ទងនឹងការផ្ដល់អគារពាណិជ្ជកម្មរបស់យើង យើងបានមើលឃើញតម្រូវការម៉ូទ័ររុញទឹក។
បច្ចុប្បន្នយើងទើបនឹងបញ្ចប់គម្រោងសម្រាប់ធនាគារ UCB Bank ជាដៃគូជាមួយ Lotus Green ជាក្រុមហ៊ុនម៉ៅការបន្តគម្រោងក្នុងស្រុកចំពោះអ្នកដែលយើងបានផ្គត់ផ្គង់ម៉ូទ័រទឹកប្រភេទផ្សេងៗសម្រាប់ការប្រើប្រាស់ដូចជា ម៉ាស៊ីនផ្លាស់ប្តូរទឹក ម៉ូទ័ររុញទឹក ការគ្រប់គ្រងទឹកសំណល់ និងម៉ូទ័រទឹកពន្លត់អគ្គិភ័យ។ គម្រោងមួយចំនួនផ្សេងទៀតរួមមានអតិថិជនដូចជា អគារវឌ្ឍនៈ សណ្ឋាគារ Great Duke (អតីត អ៊ីនធើកុងទីណង់តាល់) និងក្រុមហ៊ុន Gate-Way Development & Alexis Condominium។
ទាក់ទងនឹងការប្រើប្រាស់ទឹក យើងកំពុងធ្វើការងារយ៉ាងជិតស្និទ្ធជាមួយរដ្ឋាភិបាល ដើម្បីដោះស្រាយបញ្ហាទឹករបស់ប្រទេសកម្ពុជា តាមរយៈដំណោះស្រាយជំរុញការចែកចាយ។ វាជាប្រព័ន្ធចែកចាយទឹកដ៏វៃឆ្លាតដែលកែតម្រូវជាស្វ័យប្រវត្តិនៃលំហូរចូលទឹក តាមរយៈការប្រើប្រាស់ឧបករណ៍ចាប់សញ្ញាបញ្ជាពីចម្ងាយ ការកាត់បន្ថយសម្ពាធលើសលុបនៅក្នុងទុយោទឹកដែលកម្រិតការធ្លាយ និងការខាតបង់ទឹក កាត់បន្ថយការចំណាយ និងថាមពល។
តើវិស័យដ៏ចម្បងណាមួយក្រុមហ៊ុន Grundfos ផ្តោតទៅលើ? តើវិស័យណាមួយផ្ដល់អត្ថប្រយោជន៍ច្រើនបំផុតសម្រាប់ផលិតផលរបស់អ្នក?
អាជីវកម្មរបស់ក្រុមហ៊ុន Grundfos នៅក្នុងប្រទេសកម្ពុជាភាគច្រើនផ្ដោតលើសេវាអគារពាណិជ្ជកម្ម និងសេវាការប្រើប្រាស់ទឹក។ តាមចក្ខុវិស័យឧស្សាហកម្ម វិស័យដ៏សំខាន់មួយដែលយើងបានផ្ដោតលើគឺឧស្សាហកម្មស្រាបៀរដែលយើងផ្ដល់ម៉ូទ័រផ្លាស់ប្តូរទឹក និងម៉ូទ័ររុញទឹកផ្សេងៗដែលតម្រូវនៅក្នុងដំណើរការផលិតកម្មរបស់ពួកគេ។
វិស័យកំណើនផ្សេងទៀតនៅក្នុងប្រទេសកម្ពុជារួមមានឧស្សាហកម្មបដិសណ្ឋារកិច្ច ដូចជា សណ្ឋាគារ និងផ្សារទំនើប ព្រមទាំងសេវាហិរញ្ញវត្ថុ អគារពាណិជ្ជកម្ម និងមន្ទីរពេទ្យ។
តើអ្នកមានផែនការជាក់លាក់ក្នុងការពង្រីកនៅទីផ្សារកម្ពុជាដែរឬទេ?
ការសម្លឹងឆ្ពោះទៅមុខយើងនឹងផ្ដោតកាន់តែច្រើនលើសេវាអគារក្នុងស្រុក ខណៈការធ្វើគម្រោងសម្រាប់អគារពាណិជ្ជកម្មនានា។ យើងកំពុងស្វែងរកទីផ្សារកម្ពុជាសម្រាប់ឱកាសប្រព្រឹត្តកម្មទឹកសំណល់។
យើងកំពុងធ្វើផែនការលើការពង្រីកធនធានមនុស្សរបស់យើងនៅក្នុងប្រទេសកម្ពុជា ដើម្បីផ្ដល់ដល់ពួកយើងនូវចំណេះដឹង និងជំនាញស៊ីជម្រៅនៅក្នុងវិស័យជាច្រើនដូចជាអគារពាណិជ្ជកម្ម ថាមពល និងស្វ័យប្រវត្ដិកម្ម។
ជាមួយគ្នានេះដែរ យើងនឹងផ្ដោតលើការធ្វើការងារជាមួយក្រុមហ៊ុនម៉ៅការបន្តកម្ពុជាក្នុងស្រុកដែលកំពុងត្រូវការគម្រោងកាន់តែច្រើន និងជួយក្នុងការបង្កើនសមត្ថភាពរបស់ពួកគេក្នុងវិស័យអគារពាណិជ្ជកម្ម និងឧស្សាហកម្ម៕LA